Flamingo “Ol Pijin Blong Wan Grup”

Man blong !Wekap! long Spen i raetem store ya

FLAMINGO i wan pijin we i save pulum ae blong ol man be i had blong kasem save long ol fasin blong hem—hem i gat fasin blong fren wetem man be tu hem i no wantem soemaot ol fasin blong hem, hem i no muvmuf long fasin we i naes tumas be tu hem i save muf long naes fasin, hem i laekem blong stap hem wan be tu hem i laekem blong stap wetem grup blong ol fren blong hem.

Kolosap evri man oli save long hem, pija blong hem i stap long ol olfala hanraet blong ol man Ijip (hemia i saen blong kala ya red), ol pija we oli pentem bifo long ol hol blong ston, mo ol pija blong tede. Be i gat plante samting we ol man oli no save yet long saed blong ol flamingo. Ples we oli karem pikinini long hem i stap longwe tumas, mo plante long ol bigwan oli bin faenemaot nomo long ol 50 yia we i pas. Mo ol man mo woman flamingo oli sem mak mekem se ol man blong stadi long ol pijin oli save luksave nomo weswan i man mo weswan i woman taem oli yusum wan tul blong lukluk insaed long wan haf blong bodi blong olgeta nomo.

Ol longfala leg blong hem we i olsem bun nomo mo longfala nek blong hem—we hem i mekem i goraon mo i putum aninit long wing blong hem olsem we oli bin mekem wetem lastik—oli mekem hem i luk olsem we i no luk naes taem hem i muvmuf. Be, taem hem i stap wokbaot sloslou long ples we wora i no dip no i stap lukaot ol krab no naura aninit long wora we hem i stap kakae, hem i gat wan prapa fasin blong hem we i naes, mo hem i luk naes tumas taem i flae i go antap.

I no gat plante samting we yumi luk raonabaot long yumi we i luk naes tumas olsem wan grup blong flamingo taem oli stap flae. Red mo blak kala long wing blong olgeta i defren long pink no waet kala long bodi blong olgeta.a I luk olsem plante taosen fan we oli saksakem long semtaem taem bigfala hif i flae sloslou i go antap long skae. Mo taem oli stap flae ol nambawan kala blong olgeta mo fasin blong muf blong olgeta i jenisim olgeta i kam ol nambawan pijin long wol we oli danis folem oda.

Sore tumas, i no isi nating blong luk samting ya. Ol flamingo oli ol pijin we oli stap long wan hif, be oli no laekem blong joen wetem ol narafala kaen pijin—oli wan eksampel we i stretgud olgeta blong “ol pijin blong wan grup.” Oli ronwe long ol ples we i gat ol narafala pijin long hem mo plante taem oli hivap wantaem long wan ples farawe we i gat lugun no long ol flat ples we i gat sofmad long hem.

Ol Nambawan Fasin

Blong kasem moa save long saed blong ol nambawan pijin ya, man blong !Wekap! i askem kwestin long Manuel Rendón, daerekta blong Fuente de Piedra Reserve, long Malága, hemia long Spen.

?Yu ting se ol flamingo oli no strong olsem taem yu luk bodi blong olgeta? “No gat. Oli stap long ol raf ples long ol lugun antap long ol ples long ol hil ya Andes long ples ya we ol narafala pijin oli no save stap long hem. Plante taem, oli stap long ol lugun blong Afrika, wora blong hem i hot tumas mo i konkon we i save bonem skin blong yu, be ol skin afsaed long leg blong ol flamingo i blokem ol leg blong olgeta blong no kasem trabol.”

?Wanem bigfala trabol blong olgeta? “I hadwok long olgeta blong faenem wan stret ples blong karem pikinini. Oli nidim wan lugun we i kwaet, ol solwora we oli no dip tumas mo i gat ol smosmol aelan we oli save mekem ol bed blong olgeta. Naoia ol ples olsem i hadwok tumas blong faenem. Yes, long olgeta ples long wes saed blong Mediteranea, naoia mifala i gat tu ples nomo olsem: wan long Spen mo wan long Franis.b

“Long ples ya long Fuente de Piedra, oli gat wan narafala hadtaem. Wora we oli stap karem pikinini long hem i stap drae kwiktaem from hot san blong Andalusia—bifo we ol smolwan oli kam strong inaf blong flae.”

?Bambae wanem samting i hapen sipos wora ya i drae olgeta? “Blong mekem se ol pikinini we oli karem oli no lus evriwan, sam yia mifala i mas mekem wora i ron i go long ples ya. Mifala i faenem se sipos mifala i mekem wora i stap long wan ples we i gat sikis hekta, hemia i stret, nating samting ya i minim se ol bigbigfala flamingo oli mas go long olgeta ples longwe long ol lugun blong kasem kakae. Bambae ol flamingo oli spenem plante moa taem blong flae i go blong kakae long ples we oli save kasem kakae blong olgeta long hem mo oli kambak, taem oli livim yangwan i stap long kea blong sam pijin we oli bigwan finis—samting we i kolosap olsem wan kindagarden.”

?Yu bin faenem wanem samting bakegen? “From we mifala i makem ol pijin ya, mifala i bin lanem plante samting long saed blong fasin blong olgeta blong go olbaot. Ol flamingo oli no flae i go evri yia long narafala kantri no ples we i stap farawe, be oli stap go long defren ples blong kasem kakae, taem oli wantem mekem olsem. Taswe, maet wan long ol pijin ya i save spenem hot taem long Spen mo koltaem long Not Afrika, taem wan narafala i mekem i defren long hemia. Bambae yu save talem se oli go from samting we oli wantem haremgud long hem nomo, be fasin blong olgeta blong go olbaot i blong kasem kakae blong olgeta bitim narafala samting we oli wantem haremgud long hem.

“Samting we i klia se sipos ol flamingo oli kasem smol help blong lukaotgud long olgeta, namba blong olgeta i save go antap kwiktaem. Long ol yia biaen long 1970 i no gat plante we oli karem pikinini mo i gat smol namba nomo long ples ya. Taem mifala i blokem ol man blong oli no mekem trabol long olgeta mo mifala i lukaotgud long mak blong wora we ol yangwan oli stap long hem kasem taem we oli save flae, mifala i bin luk wan bigfala namba blong olgeta we i go antap. Long 1988 mifala i bin lukaotgud long kolosap 10,000 pikinini blong olgeta.”

Wan Sapraes Long Samting We God i Mekem

Ol man we oli bin luk ol flamingo we oli wael bambae oli no save fogetem ekspiryens ya. From we ol pijin ya oli laekem blong stap long ol ples farawe mo from hadwok blong ol man blong lukaot long olgeta, i gat sam gudfala ples yet long wol we yumi save luk ol bigfala grup oli save stap long hem.

Wol ya bambae i no wan gudfala ples sipos i no gat ol nambawan samting olsem we God i mekem we yumi save luk wetem ae mo i save leftemap tingting blong yumi. Tru ya, yumi save talem se ol pijin ya, “ol pijin blong wan grup,” oli joenem voes blong olgeta “wetem ol pijin” we oli presem nem blong Jeova.—Ol Sam 148:10, 13.

[Ol Futnot]

[Foto Credit Line blong pija long pej 25]

Photos top and bottom: Zoo de la Casa de Campo, Madrid