Wokem Gud Helt Blong Ol Man
I NO longtaem, namba tu bos blong New African magasin, i raetem se: “Yu save go long eni kantri long Afrika tede, mo bambae yu faenem smol namba blong man we oli rij, mo bigfala hif blong man we oli harem nogud long laef we i strong tumas from fasin pua. . . . ?Olsem wanem yumi save ronwe long fasin pua we i holemtaet plante man? Isi ansa se: tekemaot ol rijman mo serem mane blong olgeta. Be samting ya i no save wok. Wan risen se, i no gat naf mane blong serem long olgeta man. Namba tu samting, tekemaot ol rijman mo kwiktaem nomo sam narafala man bambae oli kam rij mo tekem ples blong olgeta. Namba tri samting se, fasin blong laef we sam kantri oli traem finis, we evri samting i blong gavman ale oli seremaot long ol man, [risal blong hem] se oli jes seremaot fasin pua i go long olgeta man wanwan.
“I gat wan rod nomo blong mekem wol i kamgud moa, we i bin wok gud long olgeta kantri mo long olgeta yia we oli pas: ol man wanwan oli mas kamgud moa. Ol man nao oli mekemap ol kantri. Ol man we oli skulgud, gat gud helt, gudfala tingting mo waes blong wokem ol samting, oli save mekem se ol kantri oli fulap long ol man we oli gat gud helt mo oli wok strong.”
Sipos namba tu bos ya i stap lukaot wan eksampel blong samting ya, hem i save lukluk ol Wetnes blong Jeova. Long Afrika, yes long ful wol, ol Wetnes oli stap wok had blong halpem olgeta man blong kasem edukesen, mo blong gat gud helt. Wan long ol samting we oli mekem se, oli tijim ol bigman we oli no skul, blong rid mo raet. Long ol buk blong olgeta, oli tijim ol man long saed blong fasin klin, fasin blong lukaot long helt, mo fasin fren insaed long famle. Long ol miting blong olgeta, mo wanwan, ol Wetnes oli givgivhan long olgeta blong folem advaes blong Baebol blong no stil mo gyaman, blong wok had, mo blong yusum waes long ol gudfala rod.
Frut we i kamaot se, i gat wan grup blong kolosap faef milyan man long wol we oli gat paoa, mo oli wok had. Be ol Wetnes oli no leftemap olgeta bakegen from samting ya. Oli talem se God ya we i laef, i mekem olgeta oli haremgud long saed blong speret. Hem i talem se: ‘Mi, Jeova, mi mi God blong yufala, mi mi Man ya we i stap tijim yufala blong kasem gudfala frut long laef blong yufala, Man ya we i mekem yufala i wokbaot long rod we yufala i mas wokbaot long hem.’—Aesea 48:17.
Sipos yu wantem kasem moa save long saed blong Baebol mo ol advaes blong hem we i wokgud, plis go luk ol Wetnes blong Jeova long Haos Kingdom long ples blong yu. Sipos no, raet i go long “Les Témoins de Jéhovah,” B.P. 787, Nouméa, Nouvelle-Calédonie.