?Yumi Stap Go Wea?

TRAEM tingbaot se yu stap wokbaot long wan ples we yu neva luk bifo. Yu luk se taem i stap pas, be yu no kasem yet ples ya we yu wantem go long hem. Ol saen long rod, ol nem blong ol taon, mo ol samting raonabaot long yu, oli no sem mak olsem ol samting we yu bin ting se bambae yu faenem. Yu tingting se, ‘?Mi mi stap wea? ?Mi stap folem stret rod?’

Tede, wol ya i kasem sem trabol ya. I olsem we ol man oli stap long wan ples we oli no save long hem, taem oli stap luk we fasin blong laef raonabaot long olgeta i stap godaon bigwan, i bitim bifo. Wetem olgeta save long saed blong sayens mo ol teknik we oli kam antap bigwan, i luk olsem se naoia wol blong yumi i mas kamgud moa. Long buk ya Great Ages of Man, man ya Russell Bourne, i makem se long ol yia 1900 nomo, “maet i gat rod blong wokem olfala tingting ya se olgeta man long wol oli mas joen olsem ol brata.”

Be, ol man oli mestem mak ya we “olgeta man long wol oli mas joen olsem ol brata.” Olgeta promes blong man se bambae i no moa gat trabol long saed blong mane, bambae i gat naf kakae, helt blong ol man bambae i kam moagud, mo ol famle oli hapi, oli no kamtru tede. Buk ya Milestones of History, i talem se: “Long plante rod, save long saed blong sayens we i kam antap bigwan, i bin joen stret wetem fasin blong spolem ol samting mo raf fasin blong ol man.”

Yes, i olsem we ol man tede oli lus finis long wan ples we oli no save long hem. Oli mestem bigwan, rod we oli wantem go long hem. Mo oli stap longwe long pis mo seftaem we, long stat blong ol yia 1900, oli ting se bambae oli kasem. Taswe, plante man tede oli stap askem advaes blong faenem stret rod, oli se: “?Olsem wanem nao yumi kam kasem ples ya? ?Wol ya i stap go wea? ?Yumi stap finis long ol las dei?”

Blong faenemaot weples nao yumi stap long hem, fastaem yumi mas makemaot ol samting we oli stap raonabaot long yumi. Samfala oli talem se yumi stap kolosap nomo long wan nyufala laef long wol ya. Sam narafala, oli talem se yumi stap kolosap nomo long taem we bambae yumi lus olgeta. Baebol, we i olsem wan map blong soemaot rod, i save halpem yumi blong luksave stret ples we yumi stap long hem, mo weples yumi stap go long hem.

Taem yu stap wokbaot, i impoten blong lukluk ol samting raonabaot long yu we oli halpem yu blong luksave ples we yu stap long hem. Long sem fasin, Baebol i tokbaot sam samting—trabol mo fasin blong wol—we oli makemaot taem ya we hem i kolem ‘ol las dei.’ (2 Timote 3:1-5) Tok ya, ‘ol las dei’ i no tokbaot en blong prapa skae mo wol. Be, hem i minim “fasin blong wol ya i kasem en blong hem,” no “en blong laef ya,” olsem wan Baebol i talem.—Matyu 24:3; Today’s English Version.

Kristin aposol Pol i raetem se: ‘Long taem blong ol las dei blong wol, laef long wol ya bambae i kam strong tumas.’ (2 Timote 3:1) I tru, maet i luk olsem we tok ya i laenap wetem sam narafala taem bifo. Yes, ol wanwan yia oli bin gat prapa trabol blong olgeta.

?Wanem risen nao, i stap, blong bilif se ol tok ya oli stret long taem blong yumi?

[Foto Credit Line blong pija long pej 3]

Tom Haley/Sipa Press