?Haos Blong Yu i Save Stanap Strong Taem Graon i Seksek?

Man blong Wekap! long Japan i raetem store ya

“!PLIS givhan long mi! !Plis givhan long mi!” Long moning blong Janewari 17, 1994, taem ples i tudak yet, wan man i singaot olsemia. Hem i stap long faswan store blong wan store haos, we tufala store blong hem antap i foldaon antap long faswan store ya. Hemia taem graon i seksek bigwan long Los Enjeles, Kalifonia, Yunaeted Stet, we oli makem paoa blong hem se 6.6. Sikistin man oli ded long store haos ya. Long eria ya, bitim 50 man oli ded.

Long Septemba 30, 1993, long Maharastra long wes India, graon i seksek bigwan tu, be paoa blong hem i daon lelebet long hemia antap. Samwe 30,000 man oli ded. Wan man we i stap stadi long fasin we graon i seksek, Sri Krishna Singh, i talem se: “Sipos graon i bin seksek olsem long wan narafala ples we . . . oli wokemgud ol haos, bambae i no gat plante man i ded olsem.” Bighaf blong ol haos long eria ya, oli wokem long sofmad.

Be, long 1985, long Tokyo, Japan, graon i seksek wetem sem paoa olsem India. Hem i strong moa long ol narafala taem we graon i bin seksek long ol 56 yia we oli pas. Be, i no gat wan man i ded, i no gat ol faea, i no spolem plante haos. ?From wanem i defren?

Wan samting se, fasin blong wokem ol haos. Long plante kantri we graon i stap seksek, oli mekem loa se ol man we oli wokem plan blong ol haos, oli mas folem ol strong rul blong mekem se ol haos oli save stanap strong taem graon i seksek. Yumi luk wan eksampel, hemia fasin blong ol man Japan blong wokem ol haos we oli save stanap strong, taem graon i seksek.

Fasin Blong Wokem Haos We i Save Stanap Strong

Ol haos we ol man Japan oli wokem longtaem bifo, oli gat ol gudfala fasin blong mekem olgeta oli stanap strong taem graon i seksek. Be ol olfala oli no save se oli stap mekem olsemia. From we oli wokem bighaf blong ol haos long wud, oli joenem long plante ples. Samting ya i mekem se haos i save muvmuf mo ben smol, be hem i no foldaon, taem graon i seksek. Ol tempel mo haos blong ol king we oli wokem plante handred yia bifo long fasin ya, oli stap kasem naoia. Taem ol man oli stadi long ol haos ya, oli luksave se bigfala samting we i mekem oli stanap strong, hemia from we oli save muvmuf, oli no stret tumas. Tede, oli yusum sem fasin ya blong wokem ol haos.

Long ol store haos, fasin blong yusumgud ol aean, i save mekem haos i stanap strong taem graon i seksek. Oli yusum ol aean blong sapotem haos, be tu oli putum ol longfala aean insaed long ol pos, floa, mo wol we oli wokem long simen, blong mekem oli strong, be oli save muvmuf smol tu. Ol aean ya, oli mekem se haos ya i save ben smol, mo from samting ya, hem i save stanap strong taem graon i seksek.

Mo tu, long ol nyufala stadi we oli mekem, oli faenemaot olsem wanem wan haos i muvmuf taem graon i seksek. Samting ya i lidim olgeta blong tingbaot wan impoten samting, taem oli mekem plan blong ol haos we oli save stanap strong taem graon i seksek, hemia: hamas taem haos ya i seksek. Wan smol haos we i no save ben tumas, i stap seksek moa bitim wan haos we i hae mo i save ben smol. Taswe, wan smol haos i save foldaon kwiktaem bitim wan hae haos. Mo tu, i impoten we oli wokem haos, blong i seksek long defren fasin long graon we haos ya i stanap long hem. Samting ya i daonem namba blong taem we hem i seksek, mekem se i daonem paoa blong graon i seksek tu.

Narafala samting blong tingbaot, hemia faondesen. Wan kampani i testem wan haos, mo oli luk se i gud. Oli wokem haos ya antap long ol kaojuk pilo we oli stanap long samting olsem glu we i sofsof. Samting ya i mekem se hem i no seksek strong, mo paoa blong graon we i seksek i godaon 60 pesen long haf blong haos we i antap olgeta. Samtaem, oli pusum ol longfala pos oli godaon gogo oli kasem graon we i moa strong bitim hemia antap. Sipos oli wokem wan rum blong haos daon aninit long graon, maet samting ya nomo i naf blong mekem se haos ya i no lei.

Bildim Wan Haos We i Stanap Strong Taem Graon i Seksek

Long 1989, Watch Tower Sosaeti long Japan i ademap wan nyufala haf long ol haos we oli yusum blong prentem ol buk. Nyufala haos ya i longfala olsem 67 mita, i bigfala olsem 45 mita, mo i gat sikis store blong hem, mo wan bigfala rum blong hem we oli wokem aninit long graon. Blong mekem se haos ya i save stanap strong taem graon i seksek, oli pusum 465 pos we oli wokem long simen oli godaon long graon.

Long ples ya we oli wokem haos ya long hem, oli yusum wan fasin we i no gat noes, mo i no seksekem graon, blong pusum ol pos ya oli godaon. Ol pos ya we oli bigfala olsem 80 sentimita, mo longfala olsem 12 mita, oli olsem paep. Oli pusum wan aean we i save digim graon i go insaed long paep, ale oli stanemap paep ya long stret ples we hem i mas godaon. Taem oli tanem aean ya we i stap insaed long hem, hem i digim ol graon long medel blong paep ya, mo sloslou oli fosem paep blong godaon long hol ya we hem i stap mekem. Sipos i mas go dip moa, oli save joenem wan narafala paep long hemia we i godaon fastaem.

Taem oli pusum i godaon kasem mak we oli wantem, oli mekem ol naef we oli stap digim graon long en blong aean ya, oli seraot. Nao hem i digim wan hol we i bigwan moa daon long en blong paep. Biaen, oli tekemaot aean, nao oli kafsaedem simen i godaon long paep gogo i fulumap hol ya daon. Taem simen ya i kam strong, paep i stap strong long ples blong hem.

Afta we oli putum ol pos ya oli stap strong long faondesen, oli fasem olgeta wetem ol aean we bambae oli sapotem floa mo ol wol blong bigfala rum we oli bildim aninit long graon. Wan faondesen olsem i save mekem se haos ya i save stanap strong taem graon i seksek bigwan.

?Haos blong yu i wan sefples taem graon i seksek? I no gat wan plan, no fasin blong wokem, no sam narafala samting we man i save mekem, blong promes se wan haos bambae i stanap strong taem graon i seksek. Maet graon i seksek wetem wan bigfala paoa we i save mekem ol haos we oli wokem long nambawan fasin oli foldaon, olsem i hapen long Kobe, Japan, long Janewari. Nating se i olsem, sipos yu jusum blong stap long wan haos we oli wokemgud, yu save harem se yu stap long wan ples we i moa sef, taem graon i seksek long ples blong yu.