Ol Fasin We Yumi No Save Bos Long Olgeta—?Oli Lidim Laef Blong Yumi?
Keith i talem se: “Mi stap wekap long 6 klok evri moning.a Evri naet, mi mekem klok blong mi i rere blong krae long 6 klok evri moning. Mi save se hem i rere finis. Mi neva jenisim. Be nating se i olsem, mi mas jekem. Evri naet mi jekem bitim faef taem bifo mi go slip. Mo faea tu—mi mas mekem sua se hem i ded. Mi luk se hem i ded finis, be mi mas gobak mo lukluk bakegen, maet tu no tri taem—jes blong mekem sua. Afta, mi mas jekem aesbokis, bakegen mo bakegen, blong mekem sua se doa i sat. Afta, mi jekem doa blong haos, blong mekem sua se mi bin lokem, mo afta, ol narafala doa long haos . . . ”
KEITH i gat wan sik we oli kolem OCD. Hem i wan sik we man i no save bos long ol tingting mo aksin blong hem.b Wan man we i gat OCD i harem se ol tingting mo aksin ya oli kamaot olgeta nomo. I olsem we wan samting i fosem hem blong tingting mo mekem olsem, samting ya i bos long hem.
Sam samtaem, olgeta man mo woman oli kasem sam tingting we oli no wantem. No maet oli mekem samting we oli no tingtinggud long hem fastaem. Be olgeta we oli gat sik ya OCD, ol tingting mo aksin ya oli kamaot oltaem mo oli kambak bakegen. Samting ya i spolem laef blong ol man ya mo mekem olgeta oli harem nogud, samtaem oli save kam sik long tingting from. Wan man we i kasem sik ya i talem se: “Faet we mi gat long tingting blong mi oltaem, i mekem se mi wantem kilim mi wan i ded.” Tingbaot sam fasin blong ol man we oli gat narakaen sik ya.
Oli No Save Bilivim Wan Samting, Nating Se Oli Luk Finis
Bruce i stap draevem trak blong hem, nao i kilim wan hol long rod. Ale, wantaem nomo, hem i harem se hem i bin mekem wan nogud samting. Hem i tingting se: ‘Ating mi jes bin sperem wan man we i wokbaot long rod.’ Nogud filing ya i kam bigwan gogo hem i mas tanraon mo gobak long ples we “akseden ya” i bin hapen blong jekem—!hem i no jekem wan taem nomo be bakegen mo bakegen! Yumi save se Bruce i no faenem wan man we hem i bin sperem wetem trak. !Nating se i olsem, hem i no sua yet! Taswe, taem hem i kasem haos blong hem, hem i mas lukluk nyus long televisin blong luk sipos wan akseden olsem i bin kamaot. Afta, hem i telefon i go long polis blong talem se hem nao i bin mekem akseden ya.”
Plante man we oli gat sik ya OCD oli olsem Bruce, oli stap tingting olsem: ‘?Mi bin givim kil long wan man? ?Mi bin kilim faea bifo we mi aot long haos? ?Mi bin lokem doa?’ Bighaf blong ol man oli tingbaot ol samting ya samtaem. Be hemia we i gat OCD bambae i jekem mo jekem bakegen, mo biaen, bambae i no sua yet. Dokta Judith Rapoport i raetem se: “Ol sikman blong mi we oli stap jekem ol samting oltaem, oli talem se ‘yu save sua nomo taem yu tajem wan samting.’ Olsem nao, oli mas tanem mo tanem bakegen ki long doa. Oli mas kilim laet plante taem. Ol aksin olsem oli givim save wantaem nomo, be save ya i no mekem olgeta oli sua yet.”
Samting We i Klin i No Klin Inaf
Wan boe we i gat 14 yia, nem blong hem Charles, i gat sik ya, ale hem i fraet oltaem se bambae hem i kasem ol jem. Mama blong hem i mas yusum alkol blong klinim evri samting we hem i tajem. Mo tu, Charles i fraet se ol man we oli kam luk hem bambae oli karem ol doti blong rod i kam.
Fran i fraet taem hem i stap wasem ol klos blong hem. Hem i talem se: “Sipos ol klos oli tajem saed blong mesin blong was taem mi stap tekemaot olgeta, mi mas wasem olgeta bakegen.”
Olsem Charles mo Fran, plante we oli gat OCD oli bitim mak long tingting blong olgeta long saed blong ol jem mo ol doti samting. Samting ya i save mekem se oli swim no wasem han blong olgeta bakegen mo bakegen, gogo samfala oli mekem skin blong olgeta i soa mo i solap. Be bambae oli ting se oli doti yet.
Harem Nogud Long Tingting
Oltaem Elaine i kasem ol tingting we hem i no wantem. Ol tingting ya oli daonem God, olsem we Elaine i no gat respek long God. Hem i talem se: “Ol tingting ya mi neva save ting se oli tru, mi rere blong ded bitim we mi bilivim olgeta.” Be, ol tingting ya oli gohed. “From we mi faetem ol tingting ya evri dei, samtaem long naet mi taed tumas, mi kao nomo.”
Steven i stap mekem ol “strong promes” long God. Hem i harem se i gat fol long fes blong God from ol slak fasin blong hem. Hem i talem se: “Mi harem nogud from we no wantem mekem ol strong promes ya, be fasin ya i pusum mi blong mekem. Afta, tingting blong mi i stikim mi gogo mi mas folem promes blong mi. From wan promes we mi bin mekem, wan taem, mi mas spolem samting we mi bin holem longtaem finis, we mi laekem tumas.”
Ol fasin we oli bos long Elaine mo Steven oli stap moa long tingting blong tufala. Nating se ol narafala man oli no save luk klia ol pruf blong sik ya, be ol man we ol tingting ya oli bos long olgeta, oli stap kalabus long filing ya se oli gat fol mo oli fraet.
Hemia nao sam nomo long plante problem we oli kamaot from OCD.c ?Wanem stampa blong sik ya? ?Olsem wanem blong winim?
Bos Long Samting We Oli No Save Bos Long Hem
Wan dokta i talem se ol problem blong OCD oli kamaot from “wan rop i bon long bren.” Hemia i min se ol samting we oli harem, lukluk, filim, i no gotru long bren mo “oli mas mekem sem samting bakegen mo bakegen.” ?Wanem i mekem samting ya i kamaot? Oli no save. Oli ting se problem i joen wetem wan kemikold long bren we i mas mekem ol save i go long ol string, be oli ting se maet i joen wetem sam narafala samting long saed blong bren tu. Samfala oli talem se ol samting we oli kamaot long laef blong yumi taem yumi pikinini oli save wekemap OCD, maet taem oli joen wetem prapa fasin we yumi bon wetem.
Nomata wanem samting i stampa blong sik ya, wan samting i klia se: Sipos yu talem nomo long ol man we oli gat OCD blong no moa wasem mo jekem ol samting, bambae i no wok. Strong tingting i no naf.
Sam meresin oli bin givhan long samfala. Wan narafala samting, hemia blong mekem olgeta oli fesem samting we oli fraet long hem, mo blokem olgeta blong oli no mekem aksin we oli stap mekem oltaem. Eksampel, wan we i stap swim oltaem, oli mekem hem i holem wan doti samting, mo biaen i no mas wasem han blong hem. I tru, samting ya i no save winim sik ya kwiktaem. Be samfala oli ting se sipos oli mekem samting ya blong longtaem, bambae i givhan long olgeta.
Ol man blong hae save oli tingting tu se maet samfala oli kasem sik ya OCD from ol samting we i hapen long laef blong olgeta taem oli pikinini. Oli makem se plante man we ol papa mama oli bin mekem raf fasin long olgeta taem oli pikinini, oli gruap wetem tingting se oli nating nomo mo oli doti. Biaen, sam long olgeta oli kasem fasin ya we oli wantem wasem olgeta oltaem.
Winim Ol Tingting Mo Fasin We Oli No Save Bos Long Olgeta
Sipos yu yu gat OCD, yu no mas harem se yu yu narakaen no yu stap kam krangke. Dokta Lee Baer i talem se: “Ol man we oli gat OCD oli fraet tumas long sam samting, be long ol narafala samting long laef, oli gat stret tingting.” !Taswe, i gat sam samting we oli save givhan long yu! Tingbaot se, OCD i kamaot from we yumi sinman. !Hem i no wan saen blong soem se fasin blong yu i nogud mo se yu yu slak long saed blong speret! Mo i no minim se God i kros long yu. “Hae God, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem blong laekem man i gud tumas, i bitim mak. Hem i savegud we hem i mekem yumi long graon. Oltaem hem i stap tingbaot we yumi kamaot long ases nomo.”—Ol Sam 103:8, 14.
?Be olsem wanem sipos ol tingting we oli bos long yumi oli no soem respek mo oli daonem God? Ol nogud tingting blong man we i gat OCD oli mekem hem i harem se hem i gat fol. Mo taem hem i harem olsem, samting ya i mekem moa nogud tingting oli kamaot. Elaine i talem se: “Sik ya i mekem mi mi kros tumas. Hem i mekem se mi wari—oltaem mi tingting se Jeova i kros long mi.” !Maet samfala oli ting tu se oli mekem sin we God i no save fogivim taem oli kasem ol nogud tingting ya!
Be i klia se tok blong Jisas long saed blong sin we God i no save fogivim, we i agensem tabu speret blong God, i no stap tokbaot ol tingting we oli kasem yumi wantaem nomo mo yumi no save bos long olgeta. (Matyu 12:31, 32) Jisas i stap tok long ol Farisi. Hem i save se oli mekem ol fasin agensem hem from we oli wantem mekem. Oli mekem samting ya from we hat blong olgeta i fulap long fasin blong no laekem narafala.
Ol wari se yu bin mekem God i kros, oli save soem se yu no mekem sin ya we God i no save fogivim. (Aesea 66:2) Mo tu, yu save haremgud se God i kasem save long sik blong yu. Hem i sore long ol man mo ‘i stap fogivim yumi from ol sin blong yumi.’ (Ol Sam 86:5; 2 Pita 3:9) Mo tu, taem hat blong yumi i jajem yumi, “God i hae moa long tingting blong yumi, mo hem i save evri samting.” (1 Jon 3:20) Hem i save ol tingting mo fasin we oli kamaot from wan sik we yumi no bos fulwan long hem. Hemia we i gat OCD mo i luksave ol samting ya, i save lego ol filing blong gat fol long fes blong God, we oli mekem hem i harem nogud oltaem.
!Yumi save glad tumas se Jeova i promes blong mekem wan nyufala wol we bambae i no moa gat ol sik long saed blong bodi, tingting, mo filing! (Revelesen 21:1-4) Taem yumi stap wet long blesing ya, olgeta we oli gat sik ya oli save mekem evri samting we oli naf blong mekem blong winim.
[Ol Futnot]
a Oli jenisim sam nem long store ya.
b Wekap! i no stap givim advaes long saed blong meresin. Ol Kristin we oli gat sik ya oli mas lukaot se enikaen meresin we oli dring no dokta we oli go luk hem, i no agensem ol rul blong Baebol.
c Sam narafala problem we oli kamaot from sik ya se ol man oli kaontem mo hivimap ol samting bitim mak, sipos no, oli bitim mak long fasin blong skelem bigfala mo longfala blong ol samting.
d Ol gudfala samting insaed long blad we oli joen blong mekem blad i wan nambawan samting.
[Bokis blong pija long pej 26]
Blong Givhan
Sipos yu yu wan fren no famle blong hemia we i gat sik ya OCD, we ol narakaen tingting mo fasin oli bos long hem, yu save mekem plante samting blong givhan long hem.
• Fastaem, skelem tingting blong yu wan. Sipos yu bilif se hemia we i sik i slak, i les, no i stronghed nomo, hem bambae i haremsave samting ya, mo bambae hem i no wantem kamgud moa.
• Toktok wetem hemia we i sik. Faenemaot ol problem we hem i gat from sik ya. Plante taem, faswan samting we i givhan long man we i gat OCD, i blong gat wan narafala we i lesingud, mo i toktok tru wetem hem.—Proveb 17:17.
• Yu no mas skelem hem wetem narafala. OCD i mekem ol tingting mo fasin oli bos long man bitim mak, i no olsem ol filing blong man we i no gat sik ya. Taswe, yu no save givhan sipos yu talem long hem olsem wanem yu yu winim ol tingting mo filing we oli bos long yu.—Skelem wetem Proveb 18:13.
• Givhan long hemia we i gat sik ya blong putum mo kasem ol mak we oli no hae tumas. Jusum wan problem, mo tokbaot ol mak we hem i save kasem, blong winim sik ya. Stat wetem mak we i daon olgeta. Eksampel, maet wan mak we hem i save kasem i blong swim blong smoltaem nomo, wan stret taem we yu makemaot.
• Leftemap tingting blong hem taem hem i kamgud smol. Ol gudfala toktok we yu talem blong presem hem, bambae i mekem se hem i wantem kamgud moa. Evri smosmol samting we i soem se hem i kamgud lelebet, i impoten, nating se i smol tumas.—Proveb 12:25.
Ol narafala memba blong famle we oli stap wanples wetem hemia we i gat OCD, oli save kam taed mo slak long filing blong olgeta. From samting ya, ol fren oli mas traem kasem save mo givhan long olgeta long eni rod we oli save mekem.—Proveb 18:24b.
[Tok Blong Pija Long Pej 25]
Tu saen blong sik ya OCD—man i stap wasem mo jekem ol samting oltaem