Wan Jif Blong Polis i Talem Sori

Tom Will Lane i nem blong wan jif blong polis we Edward Michalec i tokbaot long Wekap! blong Epril-Jun, 1997, aninit long stamba tok ya “Kasem Paoa Blong Fesem Ol Traem We Oli Stap Kam.” Long stori ya, Michalec i storeyan se:

“Jif blong polis blong Waton, Teksas, Yunaeted Stet, i kros bigwan. Hemia namba fo taem we hem i karem mi i go kalabus. Hem i singaot bigwan i se: ‘?From wanem yu no folem ol oda we yu kasem?’

“Ansa i kamaot long maot blong mi kwiktaem: ‘Mi gat raet blong mekem samting ya.’ Tok ya i mekem jif blong polis ya i kros moa, hem i stat kilkilim mi wetem stik blong hem. Sam narafala polis tu oli joenem hem, mo oli kilim mi wetem handel blong masket blong olgeta.”

I no longtaem i pas, Mary Perez, wan woman we i bin wok blong jif blong polis ya, long ol yia 1960, i raetem se: “Man ya i save se mi mi wan Witnes blong Jeova. Hem i talem long mi olsem wanem hem i bin mekem trabol long Ed Michalec. Hem i askem mi blong talemaot long olgeta Witnes se hem i sori from fasin we hem i bin mekem. Hem i talem se, hem i no bin luksave se ol Witnes oli rili ol gudfala man we oli traehad blong folem loa. Hem i rili sori.”

Mary i gohed se: “Jif blong ol polis ya i ded finis sam yia bifo, be mi hop se leta ya bambae i talemaot sori we hem i bin wantem mi blong talemaot.”

Nao woman ya i tokbaot olsem wanem hem wan i kam Witnes: “Trabol we i kasem brata Michalec i hapen long ol yia 1940. From trabol ya, mi mi wantem tumas blong lesin long ol Witnes taem oli kam long haos blong mi. I no longtaem mi stat stadi Baebol wetem olgeta. Mi mo hasban blong mi, mitufala i tekem baptaes long 1949.”

Hemia wan eksampel nomo we i soemaot se, taem wan man i stanap strong long ol Kristin rul, fasin blong hem i save gat paoa long laef blong ol narafala. !Tingbaot hamas man long faswan handred yia we olgeta tu oli bin jenisim laef blong olgeta taem oli luk we Pita mo ol narafala aposol oli no fraet blong stanap strong long bilif blong olgeta!—Ol Wok 5:17-29.

[Tok blong pija long pej 22]

Ed Michalec mo Mary Perez, long ol yia 1940