Ol Man Blong Ridim Wekap! Oli Talem ...
Yusumgud Mane Mi mi glad tumas long haf ya, “?Olsem Wanem Blong Yusumgud Mane Blong Yu?” (Epril-Jun, 1997) Bifo, mi stap spenem tumas mane olbaot nomo. Afta we mi ridim Wekap! ya, mi stat skelemgud fasin blong mi blong spenem mane. Naoia, taem mi luk wan samting we mi wantem, mi tingbaot fastaem sipos mi rili nidim samting ya.
J. B., Brasil
Man blong mi i no wok blong faef manis nao, mo mitufala i gat tri pikinini. Ale, mi stat folem sam advaes we mi faenem long Wekap! ya. Mi karem wan pepa, mi makem sam laen long hem, mo mi raetem wan plan blong spenem mane. Samting ya i mekem se long tri manis we i pas, mifala i yusumgud mane blong mifala, mo i gat smol i stap blong yusum, sipos wan samting we mifala i no tingbaot i kamaot. !I tru, wan plan blong spenem mane i rili save wok!
L. S., Ripablik blong Jek
Fesem Ol Traem Mi mas talem tingting blong mi long haf ya, “Kasem Paoa Blong Fesem Ol Traem Long Fyuja.” (Epril-Jun, 1997) Fasin blong Edward Michalec blong stanap strong longtaem tru long ol bigfala hadtaem, i rili pulum filing blong mi. Stret fasin mo longfala tingting blong hem i soemaot klia se hem i laekem Jeova, ol man raonabaot long hem, mo trutok.
K. B., Yunaeted Stet
Traem Blong Maggy Tangkyu blong raetem store ya, “Wan Traem Blong Maggy Mo Wan Blesing Long Mi.” (Epril-Jun, 1997) Mi bin faenem se i had blong blokem wora blong ae blong mi, taem mi ridim ol fasin we mama ya i mekem long ol laswan dei bifo we hem i ded, blong mekem se pikinini gel blong hem i strong taem hem i bon. Mi laekem tok blong hasban blong hem tu, se soa we hem i harem long hat blong hem i lus lelebet, taem hem i tokbaot ded blong waef blong hem. Hemia wan samting we plante taem yumi fraet blong tokbaot, taem yumi storeyan wetem famle we wan memba blong hem i lus. Mi hop se mi save mitim Maggy taem hem i laef bakegen long ded.
L. S. C., Spen
Store ya i tijim yumi olsem wanem blong soemaot trufala fasin kea long ol narafala long kongregesen. Ol Kristin brata mo sista oli karem kakae i kam long hasban blong Maggy blong plante manis, mo oli givim klos long bebi blong hem tu. !Hemia wan lesen long yumi, se yumi mas go moa i bitim we yumi jes sanem wan kad no toktok smol long telefon!
P. L., Yunaeted Stet
Mi wantem talem tangkyu wetem fulhat blong mi from store ya. Waef blong mi i ded long wan aksiden long trak, tri wik afta we Maggy i ded. Naoia, mi wan nomo i mas lukaot long eit pikinini blong mitufala. Mi kasem save long soa we Lorne Wilkins i bin harem mo i stap harem yet. Tangkyu blong raetem ol store olsem blong givhan long mifala. Oli rili givhan mo leftemap tingting blong olgeta we oli kasem semkaen trabol.
B. B., Franis
Besfren i Muvaot Mi wantem talem bigfala tangkyu from haf ya, “Ol Yangfala Oli Askem . . . ?From Wanem Besfren Blong Mi i Muf i Go Long Narafala Ples? (Epril-Jun, 1997) Wekap! ya i kamtru long stret taem nomo. I no longtaem, wan fren blong mi bambae i muf i go long narafala ples. Hem wetem man blong hem bambae tufala i go joen long wan kongregesen we i nidim moa man blong prij. Mi mi glad tumas we hem i mekem disisen ya, be mi save se bambae mi mestem hem bigwan. Tangkyu long nambawan advaes we yu givim.
R. A., Itali
Taem seket elda blong mifala (hemia man we i goraon blong visitim ol kongregesen), i muf i go long wan narafala ples, save ya long Wekap! i givhan bigwan long mi, i bitim we mi save eksplenem. Man ya i bin halpem mi plante long saed blong speret mo filing. Olsem pija long Wekap! i soem, mi faenem i hadwok tumas blong talem tata long hem. Ol advaes blong yufala i kam long stret taem, blong givhan long mi blong winim filing ya se mi no moa gat wan fren.
J. D., Naejeria