?From Wanem Ol Yangfala Oli Stronghed?
PLANTE man oli gat tingting se ol yangfala we oli stronghed oli kamaot long sam famle we oli pua, mo ol pikinini we oli kamaot long sam “gud” famle, oli no folem rod blong kruked fasin. ?Wanem tingting blong yu? Long Esia, sam man oli bin tingting se ol nius oli sapotem tok ya. Be wan ripot long Asia magazine i talem se: “Naoia tingting ya i no moa tru. Long evri ples long Esia, ol samting we oli kamaot mo ol ripot blong polis oli soemaot klia se plante moa yangfala we oli kamaot long gudfala famle, oli stap stilim, oli spolem evri samting, oli tekem drag, mo oli joen wetem rabis fasin, olsem fasin blong woman blong rod.”
Eksampel, long Japan taem kot i jajem ol yangfala from fasin blong brekem loa mo kilim man i ded, bighaf blong olgeta oli kamaot long sam famle we oli rij lelebet. Semfala samting i hapen tede long Bangkok. Adisai Ahnapanun wan jif we i lukaot long wan skul blong stretem ol stronghed pikinini long Muhita i se: “Long taem blong bifo, plante taem, mane nomo i pulum ol yangfala blong brekem loa. Tede, bitim 50 pesen blong ol yangfala we oli stap long ples ya, oli kamaot long famle we oli gat plante samting lelebet, famle we oli no gat problem long saed blong mane.”
Sam oli talem se problem ya i kamaot from we plante mama tede oli wok, i gat tumas divos mo sam oli bisi blong ronem ol sas samting long laef blong olgeta. Long Singapo, Eddie Jacob, namba tu daerekta blong wan spesel senta we i givhan long ol yangfala blong jenisim fasin blong olgeta i se: “Faswan risen blong problem ya, hemia se ful famle i seraot. Ating papa mo mama oli divos. No samtaem, wan papa no wan mama i stap trenem ol pikinini hem wan, no sipos tufala oli wok ful dei, bambae oli no moa gat taem blong lukaot long pikinini blong olgeta. Taem ya nao, wan yangfala i lanem mo i mekem sem fasin we hem i luk long famle blong hem.”
Baebol i bin talemaot we long taem blong yumi bambae yumi luk ol yangfala oli gat fasin rebel. (2 Timoti 3:1, 2) Be, Baebol i givim sam gudfala advaes blong halpem ol famle oli joengud tugeta, nating se oli gat problem long saed blong mane. Baebol i wan buk we yumi mas luklukgud long hem from “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.” (2 Timoti 3:16) Ol Witnes blong Jeova long Esia mo evri ples raon long wol, oli harem gud from we, insaed long famle, oli stadi Baebol tugeta. Bambae oli glad blong halpem yufala blong mekem i sem mak.
[Tok blong pija long pej 27]
Yufala i jusum: Fasin stronghed, no blesing blong God