Oltaem God i Stap Givhan Long Mifala
FRANCISCO COANA I TALEM STORE YA
“!Sipos yu no obei long ol haeman blong gavman, bambae oli kilim yu yu ded!” Hemia woning we bigfala brata blong mi i talem.
Mi ansa long hem se: “I moagud sipos mi ded i bitim we mi laef long wan nogud ples olsem.”
TOKTOK ya i bin kamaot bitwin mi mo bigfala brata blong mi, long Septemba 1975. Hem i bin karem kakae i kam long mi, taem mi stap kalabus long Maputo (we bifo oli kolem Lourenco Marques), long saot blong Mosambik. Mifala i bitim 180 man we mifala i kalabus wanples insaed long wan rum nomo. Bighaf blong grup ya , oli ol Witnes blong Jeova. Brata blong mi i kros tumas long mi, nao hem i girap, i gohom mo i no livim kakae ya we hem i bin karem i kam blong givim long mi.
Blong halpem yufala blong kasem save from wanem mitufala i toktok olsem, bambae mi eksplenem olsem wanem mi kam stap long kalabus ya.
Mi Gruap Wetem Bilif Long God
Mi mi bon long 1955, mo famle blong mi oli Presbiterian. Mi bon long vilej ya Calanga, we i stap long Distrik blong Manica. Vilej ya i no longwe tumas long bigfala taon ya Maputo. Nating se Papa i no stap go long jos, be Mama i go oltaem. Mo hem i tekem mifala faef pikinini blong hem i go long jos evri Sande. Hem i bin tijim Lodsprea long mifala, stat taem mifala i yang. Mo mi stap talem prea ya bakegen mo bakegen plante taem. (Matiu 6:9-12) Taem mi wan yangfala, mi stap askem ol kwestin long mama blong mi, olsem: “?From wanem yumi evriwan i mas ded?” mo, “?Bambae oli stap ded nomo oltaem?”
Mama i bin talem se ded, hemia wan haf blong plan blong God. Hem i talem se olgeta we oli mekem rabis fasin, bambae oli go long hel, mo olgeta we oli mekem stretfasin, bambae oli go long heven. Ansa blong hem i mekem mi mi harem nogud, be mi no talem wan samting long hem. Ded i wan samting we i mekem tingting blong mi i trabol, antap moa afta we gudfala papa blong mi i lus, taem mi gat ten yia nomo. Biaen, mi wantem tumas blong save se ol dedman oli stap wea, mo sipos oli gat hop long fiuja.
Mi Lanem Mo Folem Trutok
Smoltaem afta we papa blong mi i ded, wan long ol tija long skul i yusum buk ya From Paradise Lost to Paradise Regained blong tijim klas blong mifala. Watchtower Bible and Tract Society i prentem buk ya long lanwis Zulu, wan lanwis blong Saot Afrika. Tija ya i letem mi mi ridim buk ya.Mi no savegud lanwis Zulu, be ol samting we mi lanem long ol vas blong Baebol insaed long buk ya , oli mekem mi mi glad.
Taem mi gat 16 yia, brata blong mi we i stap winim mane blong pem kakae blong famle, i mas go joenem ami. Long taem ya , mi stat wok long wan kampani blong wokem senta long Maputo, mo long naet mi stap tekem kos long wan teknikol skul. Taem mi spel long medel dei long ples blong wok, mi stap luk wan Witnes blong Jeova, Teófilo Chiulele, we oltaem i ridim Baebol. Taem Teófilo i luksave se mi intres, hem i stat blong storeyan wetem mi.
Biaen, wan narafala Witnes, Luis Bila, i stadi Baebol wetem mi. Mi glad tumas blong lanem se ol dedman oli no save wan samting nating, mo bambae oli gat hop blong kasem laef bakegen long fiuja. (Prija 9:5, 10; Jon 5:28, 29) Kwiktaem nomo, mi raetem leta i go long mama blong mi, mo mi soem ol ansa we Baebol i givim long ol kwestin we mi bin askem long hem bifo. Hem i glad tumas blong save se mi faenem ol trufala ansa.
From we mi haremgud long ol samting we mi bin lanem, mi wantem tumas blong serem ol samting ya wetem ol narafala. Long skul oli letem mi mi mekem ol tok long saed blong Baebol, be mi no save mekem olsem insaed long jos. I no longtaem biaen, mi no moa welkam long jos. Ol memba blong prapa famle blong mi, oli stat blong mekem trabol long mi, nating se mama i glad long ol niufala bilif blong mi. Bigfala brata blong mi i kilim gud mi. Taem ol famle blong mi oli luk se fasin agens i no stopem mi nating, ale, oli stat jikim mi, antap moa taem mi stap prea bifo kakae. From samting ya , mi mekem prea blong mi long toelet, bifo we mi go sidaon long tebel blong kakae. Mi haremsave se ‘God i stap givhan long mi.’—Ol Sam 54:4.
Biaen, famle blong mi i blokem Luis blong kam long haos blong stadi Baebol wetem mi. Taswe mitufala i mekem stadi long haos blong hem. Taem mi stat blong go long ol miting mo joen long wok blong prij, mi kambak long haos, be ol famle oli lokem doa finis. From samting ya , plante taem mi mas slip long haos blong ol defren Witnes.
Long Mei 13, 1973, mi tekem baptaes blong soemaot we mi givim laef blong mi i go long Jeova. Long taem ya , Mosambik i stap aninit long rul blong Potugal. Gavman blong Potugal i bin putum tabu long wok blong ol Witnes blong Jeova long Potugal mo ol narafala kantri we hem i rul antap long olgeta. Long Oktoba 1, 1974, mi kam wan paenia, hemia nem we ol Witnes blong Jeova oli putum long olgeta we oli wok fultaem blong talemaot gud nius. From we mi wantem tumas blong kam wan misinari, mi stat blong lanem Inglis. Mi mekem olsem blong bambae mi naf blong kasem trening blong misinari long Wajtaoa Baebol Skul blong Gilead, long Yunaeted Stet.
Yusum Waes Fasin Blong Prij
Tru long ol yia we wok blong prij i tabu, polis blong Potugal, no PIDE, i putum plante Witnes long kalabus from we oli prij. Ale, blong meksua se oli no kasem mifala, mifala i mas yusum waes fasin. Eksampel, mifala i prij long wan haos nomo, nao mifala i go long wan narafala haos long wan defren eria. Long medel dei mo sapa i gat tu long mifala we bambae i go long wan ples blong spel long medel taon. Ale, wan bambae i go sidaon klosap long wan man mo i stat blong ridim niuspepa. I no longtaem biaen, narawan Witnes i kam sidaon, i lukluk niuspepa, mo i talem wan tok olsem: “!Man, yu luk plante man oli ded! Be ?yu save se, samting ya bambae i no moa hapen aninit long gavman blong God?”
Nao tufala brata i storeyan tugeta, mo wan we i ridim niuspepa bambae i askem narawan blong pruvum toktok blong hem long Baebol. Biaen, mifala i mekem plan blong storeyan bakegen long nekis dei. Long rod ya , plante taem mifala i pulum narafala man we i sidaon klosap long mifala blong joen long storeyan long saed blong ol profet tok blong Baebol. Mifala i statem plante Baebol stadi. Oltaem mifala i talem tangkiu long God from we hem i givhan long mifala.
Wan Taem Blong Ol Bigfala Traem
Long Epril 25, 1974, strong rul blong Potugal i finis, mo plante samting i jenis long saed blong politik, long ol kantri we bifo oli stap aninit long rul blong Potugal. Long Mosambik oli letem ol man we oli stap long kalabus from politik, mo ol Witnes we oli kalabus from we oli no joen long politik, oli gofri. Be 14 manis nomo biaen, hemia long Jun 25, 1975, Mosambik i kasem independens blong hem. Sam dei biaen, fasin agens long ol Witnes i stat bakegen. Gavman ya i hivimap sam grup blong man blong oli holem olgeta Witnes we oli save faenem. Oli talem se mifala ol “spae blong gavman blong Potugal.”
Long Septemba, sam grup blong man oli fosem mi blong go long wan miting blong olgeta, we i stap klosap long haos blong mifala. Taem mi kasem ples blong miting, mi luk se olgeta we oli joen long Baebol stadi grup blong mi, oli stap. Ol man we oli holem mifala oli traem fosem mifala blong talem strong ol toktok we i blong leftemap politik pati blong olgeta we i stap rulum gavman long taem ya. Wetem respek mifala i eksplenem se mifala i no save mekem olsem, ale, oli putum mifala long kalabus ya we i fulap gud long man, olsem mi storebaot long stat blong stori ya .
From we smol rum ya long kalabus i fasfas tumas, mifala i no save muf nating. Blong letem ples blong sam oli slip long floa, ol narafala oli mas sidaon no stanap nomo. I gat wan toelet nomo, mo plante taem toelet i fas, mekem se ol wota mo doti oli stap kamaot long toelet ya mo kavremap floa blong rum blong mifala, mo i mekem ples i smel nogud. Kakae we oli givim long mifala, hemia makaroni we oli putum fulap oel long hem wetem ol bun blong fis mo ol bigfala blu flae. Mifala i kakae wetem doti han blong mifala. Mifala we namba blong mifala i bitim 180 man, mifala i stap fesem hadtaem ya go kasem 19 dei. Biaen, oli tekem mifala i go long wan ples we i gat ol Witnes nomo i stap, ol man mo ol woman wetem pikinini tu. Long ol manis we oli kam, plante pikinini oli ded from we kalabus ya i nogud olgeta.
Taem i pas, ale, gavman i tekem disisen blong sanem olgeta Witnes oli go long Carico, wan ples long not we i longwe. Oli wantem se mifala i stap mifala nomo. Long taem ya i gat samwe long 7,000 Witnes long Mosambik, mo plante long olgeta oli bin tekem baptaes long 1974 no 1975. Mi mi luksave se bambae mifala i nidim ol Baebol mo buk. Taswe bifo we mifala i aot, mi askem sipos mi save gobak long haos blong karem sam kakae mo klos blong karem long trep ya.Man we i stap gad long mi i no luk nating, taem we mi karemaot sam biskit long bokis blong mi fulumap wetem ol buk long saed blong Baebol. Long ol taem olsem, mifala i no fraet. Mifala i trastem God blong givhan long mifala.—Hibrus 13:6.
Laef Long Ol Kamp
Long Janewari 1976 mifala i kasem Carico. Mifala i faenem plante Witnes blong Malawi oli laef long ol kamp we olgeta nomo oli bin wokem. Long 1972 go kasem 1975, i gat bitim 30,000 man, woman mo pikinini, we oli bin ronwe long bigfala fasin agens we i kamaot long Malawi. Ol Witnes oli kasem raet blong go insaed long not long Mosambik, olsem ol refuji. Taem mifala i kasem kamp blong olgeta, oli welkamem mifala long ol haos blong olgeta mo oli serem smol kakae we oli gat wetem mifala.
From we bighaf blong mifala i no gat save long saed blong bildim haos, ol brata blong Malawi oli tijim mifala olsem wanem blong bildim haos wetem brikis we mifala nomo i mas wokem, mo wetem ol tri blong bus. Oli tijim mifala olsem wanem blong planem kakae long garen, mo ol narafala samting we mifala i nidim blong save blong stap laef. From samting ya , mi lanem wok blong kapenta, wokem garen, mo somap klos. Ol niufala samting we mifala i lanem, oli givhan long mifala biaen taem mifala i gobak long ples blong mifala.
Samting we i impoten moa long tingting blong mifala, hemia blong stap strong long saed blong spirit, mo mi mas talem se neva mifala i sot long ol kakae long saed blong spirit. ?Olsem wanem samting ya i kamaot? Olsem mi talem finis, taem mifala i aot blong kam stap long ol kamp ya plante long mifala i yusum waes fasin blong haedem sam buk long saed blong Baebol wetem olting blong mifala. Mo tu, ol Witnes blong Jeova long Saot Afrika oli bin prentem ol smosmol kopi blong Wajtaoa. Samting ya i mekem i isi moa blong karem ol kopi ya oli kam insaed long ol kamp.
Mifala i askem plante taem sipos mifala i save gat raet blong mekem mared insaed long ol kamp. Ale, long Desemba 1, 1978, oli letem mifala i mekem faswan mared. Long dei ya , mi mi mared wetem Alita Chilaule. Papa blong hem, i wan long ol faswan man we oli bin tekem baptaes long Maputo long 1958. Biaen, mitufala i gat tu pikinini, Dorcas mo Samuel, mo mitufala i tijim tufala blong lavem Jeova, mo oltaem mitufala i stap tekem tufala i go long ol Kristin miting. Biaen, mitufala i gat wan narafala pikinini bakegen, nem blong hem Jaimito.
Olsem Wanem Mifala i Prij
Ol Witnes oli gat raet blong kamaot long ol kamp blong salem ol samting, olsem kakae we oli bin planem long garen blong olgeta. Plante long mifala i yusum jans ya blong prij. From we mi wantem gat moa jans blong prij long ol man, mi putum praes blong sol we mi salem i antap tumas, olsem bambae i no gat man i pem. Plante man we mi storeyan wetem olgeta, oli intres long mesej blong Kingdom, mo mi bin statem plante Baebol stadi.
Wan long ol Baebol studen blong mi i toktok wetem wan daerekta blong wan kampani long Milange, mo man ya i soem intres long Baebol. Taem studen ya i talem samting ya long mi, mi raetem wan leta i go long daerekta ya.Hem i askem mi blong visitim hem. Ale, mi haedem sam buk blong Baebol insaed long klos blong mi, mo mi mekem olsem se mi go luk hem blong salem sam tebel mo jea we mi bin wokem.
Taem mi kasem haos blong hem, mi sek se sam soldia oli stap gad long haos ya , ale mi wari lelebet. Be daerekta ya , i kamaot long haos mo i talem long ol soldia se hem i no wantem wan samting i spolem storeyan we bambae hem i gat wetem mi. Mitufala i stat blong stadi Baebol long faef klok long sapa ya , mo from we hem i intres bigwan, !mifala i gohed kasem faef klok long nekis moning! Biaen, hem i talem se sipos mifala i wantem kasem ol buk blong mifala we olgeta long Potugal i sanem i kam, mifala i save pastru long hem from we gavman i no stap jekem ol leta blong hem long postofis. Ale, taem hem i kasem ol buk, hem i givim long mi, mo mi tekem i go insaed long kamp ya .
I tru se, plante taem ol polis oli bin holem sam long mifala from we mifala i stap prij. Be, taem mifala i luk we plante man oli glad long mesej blong Kingdom, mifala i sua se God i stap givhan long mifala, olsem we hem i bin givhan long ol Kristin long faswan handred yia.—Ol Wok, japta 3-5.
Kamfri Mo Gobak Long Maputo
Long Septemba 1985, mifala i tekem disisen blong mifala evriwan i muf aot long ol kamp ya.Mifala i bin prea plante mo skelemgud ol samting long saed ya fastaem. Sam oli mekem disisen blong stap nomo long ol kamp long Carico, mo oli stap long ples ya blong seven yia, we oli no luk ol narafala Witnes blong Jeova nating. Sam narafala oli bin ronwe i go long Malawi mo long Sambia. Mi wetem waef, mitufala i tekem disisen blong go wetem ol pikinini blong mitufala long Milange, wan taon we i klosap. Long taon ya mi faenem wan wok mo wan haos, mo mifala i gohed long wok blong prij. Long nekis yia nomo, mifala i gobak long Maputo.
Fastaem, mifala i stap wetem ol famle. I no isi blong faenem wan wok, be biaen mi kasem wan. Alita i salem ol pinat blong givhan blong winim smol mane. From we mi kam moagud blong toktok Inglis, mi aplae blong wok long Britis Embasi. Mi pasem ol tes, !mo mi kasem wan wok we pei blong hem i twante taem antap long pei blong mi bifo! Mi rili harem se Jeova i bin givhan long mi, mo tru long prea mi talem bigfala tangkiu long hem.
Skelemgud Ol Wok
Long Febuwari 11, 1991, gavman blong Mosambik i givim raet long ol Witnes blong Jeova blong mekem wok blong olgeta long kantri ya.!Hemia wan dei we mifala rimemba gud! Long nekis yia, ol brata oli askem mi blong kam wan memba blong komiti we i lukaot long wok blong prij blong ol Witnes blong Jeova long Mosambik. Long taem ya ol pikinini blong mifala oli gat 12 yia, 9 yia, mo 6 yia nomo. Mi spenem fulnaet blong prea, mo mi askem Jeova blong givim waes long mi blong mekem wan disisen we i skelemgud ol wok blong famle mo wok long ogenaesesen.
Mifala i gat jans blong kasem wan smol kat, mo mifala i yusum samting ya long wan bisnes blong winim mane. Mifala i tekem sam paenia oli wok blong mifala blong mekem mo salem ol sanwis, mo bisnes ya i gohed gud. From samting ya , mi gat taem blong mekem ol niufala wok blong ogenaesesen we mi gat jans blong mekem mekem. From we mifala i no save gohed blong rentem haos we mifala i bin stap long hem, mifala i mas faenem wan narafala haos. Ale, mi raetem wan leta i go long gavman blong talemaot ol problem blong famle blong mifala. I no longtaem i pas, oli talem se mifala i save kasem wan haos. Samting ya i kamaot long nius, from we mi nao mi faswan man blong Mosambik we i pem wan haos long gavman.
Mi mo Alita i kasem blesing, from we ol pikinini blong mitufala oli folem ol tijing long saed blong spirit we mitufala i bin givim long olgeta. (Dutronome 6:6-9) Mifala i folem program blong tokbaot wan vas blong Baebol long 5:40 evri moning, mo biaen mifala mekem Baebol riding tugeta. From we ol pikinini oli mas girap eli blong go long skul, oli lan blong folem program ya long eli moning. Long 6 klok long Fraede naet, mifala mekem famle stadi. Long stadi ya , ol pikinini oli tokbaot wan poen long Baebol we olgeta oli bin ridim long wik. Mo tu, long taem ya , mifala i rerem sam toktok blong yusum long wok blong prij.
Olgeta pikinini blong mitufala oli baptaes. Dorcas mo Samuel tufala i bin mekem wok blong fultaem paenia stat long 1994. Mo Jaimito i joen long wok blong haftaem paenia i stat long taem we hem i baptaes finis. Ol pikinini blong mitufala oli stap skul yet, be oli putum mak se taem oli finisim skul, bambae oli mekem moa long wok blong prij. Alita i skelem gud taem blong hem long wok blong paenia mo long ol wok blong haos. Mi mekem wok blong paenia blong plante yia finis, mo long ol yia ya tu we mifala i stap long ol kamp. Be stat long 1993, mi wok long branj ofis blong ol Witnes blong Jeova i kam kasem tede.
God i Gohed Blong Blesem Mifala Yet
Long 1997, mi kasem bigfala blesing blong go long wan kos blong tu manis we i blong ol memba blong Branj Komiti. Kos ya i stap long Yunaeted Stet, long Wajtaoa Edukesen Senta long Patterson, New York. Wan moa taem bakegen, mi luk se hadwok blong mi blong lanem Inglis i karem frut. Taem mi gobak long kantri blong mi, mi gat jans blong visitim ol man blong wok blong Jeova long ol narafala kantri. !Samting ya i mekem hat blong mi i fulap wetem tangkiu from yumi joen olsem wan brata nomo long ful wol!
Bigfala lav ya we i stap bitwin ol trufala Kristin i wan samting we i pulum plante taosen man blong joen wetem ol Witnes blong Jeova long Mosambik. (Jon 13:35) Taem mifala i bin go kalabus long ol kamp, i gat samwe long 7,000 man we oli stap prij. Be, naoia i gat bitim 29,000 man blong talemaot gud nius blong Kingdom blong God long Mosambik. Long 1958 i gat 4 kongregesen nomo, naoia i gat bitim 665 kongregesen.
Long 1993, ol plan i gohed blong wokem wan branj ofis long Maputo we i naf blong holem bitim 75 man. Branj ofis ya i blong lukaot long bigfala wok blong mekem trufala wosip i gru long Mosambik. I tekem samwe long fo yia blong bildim branj ofis ya. Ale, long Desemba 19, 1998, mifala i glad tumas blong luk 1,098 man we oli kamaot long ol defren kantri, oli joen long taem ya we niufala ofis ya i open. Long dei ya , mi gat blesing blong givim wan tok, mo mi askem kwestin long sam long olgeta we oli bin spenem plante yia long ol kamp long Carico. Mi askem long olgeta man we oli stap lesin long taem ya blong leftemap han sipos olgeta tu oli bin stap long ol kamp ya. Taem ol man oli luk plante handred man we oli leftemap han blong olgeta, samting ya i tajem hat blong olgeta.
Long nekis dei, i gat 8,525 man oli stap long Haos Asembli blong Matola. Oli lesin long sam poen we oli bin kamaot long dedikesen program, mo sam ripot we oli kamaot long sam narafala kantri we i leftemap tingting blong olgeta. Mo tu, ol visita we oli kamaot long hedkwota blong ol Witnes blong Jeova long Brooklyn, New York, oli givim sam tok we oli stanap long Baebol.
Tru ya , i stat long taem we mi lanem ol trutok blong Baebol taem mi yangfala i kam kasem naoia, ol famle oli bin agensem mi, sam man oli wantem kilim mi mi ded, mo samtaem from fasin agens i strong bitim mak, mi gat tingting ya se sipos mi ded i moagud. Nating se i olsem, mi mi glad tumas. From we ol hadtaem ya oli pulum mi mi stap klosap moa long Jeova. Tok blong man ya blong raetem Sam long Baebol i tru tumas se: “Oltaem God i stap halpem mi, oltaem Jeova i stap givhan long laef blong mi.” (Ol Sam 54:4, NW) Hemia nambawan blesing we mi mo famle blong mi i kasem blong mekem wok blong Jeova wetem ol narafala man blong hem long fulwol.
[Tok blong pija long pej 15]
Ol Witnes oli stanap fored long Haos Kingdom we oli bin bildim taem oli stap olgeta nomo.
[Tok blong pija long pej 16]
Mifala i glad blong mekem famle Baebol stadi tugeta
[Tok blong pija long pej 17]
Olgeta we oli bin stap long ol kamp long Carico, oli leftemap han blong olgeta