Olsem Wanem Famle Blong Mifala i Joengud Bakegen

Lars mo Judith Westergaard i talem stori ya

HAOS blong olgeta i sem mak long haos blong ol narafala hapi famle long Denmak. Hem i wan gudfala haos wetem wan naes yad we i stap long wan kwaet vilej. Insaed long haos, i gat wan bigfala pija long wol. Pija ya i soemaot ol pikinini long famle ya we oli stap laf mo we bodi blong olgeta i strong.

Papa blong famle ya, nem blong hem Lars, hem i wan elda long wan kongregesen blong ol Witnes blong Jeova. Woman blong hem Judith, hem i wan paenia (hem i talemaot gud nius fultaem). Naoia tufala i hapi, be bifo i no olsem. Lars mo Judith i bin pastru long wan taem blong trabol mo nogud filing, we i mekem se tufala i divos. Samting ya i seraotem famle blong tufala. Be, naoia tufala i joengud bakegen. ?Olsem wanem samting ya i kamaot? Bambae tufala i storian long yumi.

Lars mo Judith i no sem blong talemaot wanem samting i brekem mared blong tufala mo olsem wanem tufala i joengud bakegen. Tufala i ting se stori ya i save givhan long sam narafala.

Gudfala Stat

Lars: Mitufala i mared long Epril 1973, mo mitufala i glad tumas. I luk olsem we laef blong mitufala bambae i fulap long mining. Long taem ya, mitufala i no save Baebol mo ol Witnes blong Jeova. Be mitufala i bilif strong se yumi save mekem wol i kamgud moa sipos olgeta man oli traehad long rod ya. Taswe mitufala i joen long politik. Mitufala i glad tumas taem mitufala i gat tri helti boe we oli fulap long paoa, hemia Martin, Thomas, mo Jonas.

Judith: Mi mi gat wan hae posisen long wan gavman ofis. Long sem taem, mi mekem plante wok blong politik mo wetem laba yunion. Sloslou, mi kasem mak we mi kam wan lida.

Lars: Mi mi bin wok long wan bigfala laba yunion, mo mi kasem wan impoten wok. Mitufala i stap kam hae moa long wok blong mitufala mo laef i rili swit.

Sloslou Mitufala i Seraot

Lars: Be mitufala i tingting tumas long prapa wok blong mitufala, mekem se mitufala i no moa spenem plante taem tugeta. Mitufala i stap wok blong semfala pati blong politik be long tu defren wok. Mitufala i pem sam narafala blong lukaot long trifala boe blong mitufala, sam haosgel mo ol skul blong pikinini. Famle i kam olsem we i olbaot nomo, from we mitufala i stap tingting tumas long prapa bisnes blong mitufala. Taem mitufala i stap long haos, mitufala i stap raorao bigwan. Ale, mi stat blong dring alkol blong traem mekem tingting blong mi i stap kwaet.

Judith: Mitufala i laeklaekem mitufala mo ol pikinini. Be mitufala i no traehad blong mekem lav ya i stap strong, taswe sloslou hem i lus. Mitufala i no moa frengud tugeta, mo from samting ya, ol pikinini tu oli harem nogud.

Lars: Blong traem pulum famle blong joengud bakegen, mi lego wok blong mi. Long 1985, mifala i aot long bigfala taon, mifala i kam stap long vilej ya we mifala i stap yet long hem. Ol samting i kamgud lelebet blong smoltaem, be mitufala i gohed nomo blong tingbaot ol prapa intres blong mitufala. Long Febuwari 1989, mitufala i divos afta we mitufala i bin mared blong 16 yia. Famle blong mifala i brokdaon fulwan nao.

Judith: I nogud tumas blong luk we famle blong mifala i seraot, mo ol pikinini oli harem nogud. Mitufala i kros tumas, mekem se mitufala i no save agri blong serem trifala boe blong mitufala. Ale, kot i givim raet long mi blong lukaot long trifala evriwan.

Lars: Wetem tingting we i fasfas nomo, mi mo Judith i traem blong faenem rod blong mekem famle i stap tugeta. Mitufala i prea long God blong givhan long mifala. Be mitufala i save smol nomo long saed blong God.

Judith: Mitufala i harem olsem we God i no lesin long prea blong mitufala. Naoia mifala i glad tumas blong save se God i stap lesin long ol prea blong yumi.

Lars: Mitufala i no luksave se mitufala i mas traehad blong jenisim fasin blong mitufala. Ale, divos i kamaot.

Wan Samting We Lars i No Tingbaot

Lars: Taem mi stap mi wan, wan samting i kamaot we mi mi no tingbaot. Wan dei, ol Witnes blong Jeova oli givim tu magasin long mi. Bifo, oltaem mi ronem ol Witnes. Be taem mi lukluk ol stori long ol magasin ya, mi luksave se ol Witnes oli bilif long God mo Jisas Kraes. Mi mi sapraes bigwan long samting ya. Mi mi no bin save se olgeta ya oli Kristin.

Long taem ya, mi stat blong save wan narafala woman mo mi go stap wetem hem. Hem i talem long mi se hem i wan Witnes blong Jeova bifo. Mi mi askem plante kwestin long hem, mo hem i tekem Baebol, i soem nem blong God, Jeova, long mi. !Naoia mi save se “Witnes blong Jeova” i minim “Witnes blong God”!

Woman ya i mekem plan blong mi go lesin long wan pablik tok long Haos Asembli blong ol Witnes blong Jeova. Samting we mi luk long ples ya i rili pulum tingting blong mi. Ale, blong save moa, mi go long Haos Kingdom long ples blong mi. Oli mekem plan blong kam stadi Baebol wetem mi. Mi luksave hareap nomo se fasin blong laef blong mi i rong, ale mi seraot long woman ya we mi stap wetem hem, mi go stap mi wan long stret ples we mi gruap long hem. Mi slou lelebet blong lukaot ol Witnes blong Jeova long ples ya, be biaen, mi gohed blong stadi Baebol wetem olgeta.

Be, bilif blong mi i hafhaf yet. Mi stap tingting se: ?Ol Witnes blong Jeova oli rili ol man blong God? ?Olsem wanem long ol samting we mi bin lanem taem mi mi pikinini? Mi mi gruap long skul Seven Dei Adventis, taswe mi go luk wan pasta blong olgeta. Hem i agri blong stadi wetem mi long evri Wenesde. Ol Witnes blong Jeova oli stadi wetem mi evri Mande. Mi mi wantem wan klia ansa blong tufala grup ya long fo kwestin: seken kaming blong Kraes, laef bakegen long ded, tijing blong Triniti, mo plan we kongregesen i mas folem. Sam manis biaen nomo, tingting blong mi i no moa hafhaf. Long ol fo kwestin ya mo long ol narafala samting tu, bilif blong ol Witnes blong Jeova nomo i stanap long Baebol. From samting ya, mi glad blong joen long olgeta wok blong kongregesen, mo i no longtaem biaen, mi mi givim laef blong mi i go long Jeova. Long Mei 1990, mi mi tekem baptaes.

?Olsem Wanem Long Judith?

Judith: Taem mitufala i seraot, mi mi stat blong go long jos bakegen. Taem mi harem toktok se Lars i joen long ol Witnes blong Jeova, mi mi no glad nating. Lasbon blong mitufala, Jonas we i gat ten yia long taem ya, hem i stap go luk papa blong hem sam samtaem. Be mi talem long Lars se hem i no mas tekem Jonas i go long ol miting blong ol Witnes. Lars i go luk kot, be kot i sapotem mi.

Mi mi mitim wan narafala man tu. Mo mi stap joen moa long politik mo wok blong givhan long ol man we oli trabol. Taswe, long taem ya, sipos wan i bin talem long mi se maet famle blong mifala i save joengud bakegen, mi mi no save bilivim tok ya.

Blong traem faenem sam poen agensem ol Witnes blong Jeova, mi mi go luk pasta blong jos blong mi. Wantaem nomo, hem i talem se hem i no save wan samting long saed blong ol Witnes mo hem i no gat sam buk blong tokbaot olgeta. Hem i talem nomo se mi mas stap longwe long olgeta. Samting ya i mekem se mi gohed nomo blong tingting nogud long ol Witnes blong Jeova. Nao wan samting i kamaot we mi no tingbaot, mo i fosem mi blong toktok wetem olgeta.

Stret brata blong mi long Swiden i joen wetem ol Witnes blong Jeova. Hem i singaot mi blong kam long mared blong hem long Haos Kingdom. Samting ya i jenisim tingting blong mi fulwan long saed blong ol Witnes. Mi mi sapraes blong luk we oli gat save long plante samting, hemia i defren olgeta long samting we mi bin tingting bifo. Oli soem kaengud fasin mo oli hapi, mo oli save laf mo mekem fani.

Mi stap luk tu we fasin blong man blong mi bifo, Lars, i jenis fulwan. Hem i tingtinggud long ol samting we hem i mekem, i spenem taem wetem ol pikinini, hem i kaengud, i bos long tang blong hem, mo hem i no moa dring bitim mak. !Fasin blong hem i rili pulum mi! Naoia, hem i gat fasin we oltaem mi bin wantem se hem i mas gat. Mi harem nogud se mi no moa mared wetem hem, mo se maet wan dei hem i save mared long wan narafala woman.

Ale, mi mekem wan “plan” we i haedem trufala tingting blong mi. Jonas i go stap wetem papa blong hem, nao mi mekem plan blong karem tufala sista blong mi i go luk tufala. Mi talem long tufala se hemia jans blong boe blong mi i luk tufala smol mama blong hem. Mifala i mit long wan ples blong pleplei blong ol pikinini. Tufala sista blong mi oli lukaot long boe blong mi, mo mi wetem Lars mitufala i sidaon long wan stul.

Mi mi stat tokbaot fiuja blong mifala. Nao mi sapraes we Lars i tekemaot wan buk long poket blong hem, nem blong buk ya, ?Olsem Wanem Blong Mekem Famle Blong Yu i Hapi?a Hem i givim buk ya long mi mo i talem se i gud we mi ridim ol japta long saed blong wok blong hasban mo waef insaed long famle. Hem i makemgud se mi mas jekem ol vas long Baebol.

Taem mi mo Lars i stanap, mi wantem holem han blong hem, be long kaen fasin, hem i soem se hem i no wantem. Hem i no wantem fren bakegen wetem mi bifo we hem i save tingting blong mi long saed blong niufala skul blong hem. Mi mi harem nogud long samting ya we hem i mekem, be mi luksave se tingting blong hem i stret, mo se bambae fasin ya i givhan long mi moa sipos bambae mitufala i mared bakegen samtaem.

Ol samting ya i mekem se mi wantem save moa long saed blong ol Witnes blong Jeova. Long nekis dei, mi go luk wan woman we mi save se hem i wan Witnes. Mitufala i mekem plan se hem wetem man blong hem bambae tufala i givim ol save we mi wantem long saed blong skul blong tufala. Tufala i yusum Baebol blong soem ansa blong ol kwestin long mi. Long olgeta kwestin we mifala i tokbaot, mi luksave se hemia trutok.

Long taem ya, mi aot long Evanjelikal Luteran Jos mo mi finis long wok blong politik. Mi lego tabak tu. Hemia i strong moa i bitim ol narafala samting we mi mas jenisim. Ale, mi stat blong stadi Baebol long Ogis 1990, mo long Epril 1991, mi mi tekem baptaes olsem wan Witnes blong Jeova.

Namba Tu Mared

Judith: Nao mitufala tugeta i Witnes, mitufala i baptaes finis. Mitufala i bin seraot, be mitufala wanwan i bin stadi Baebol. From ol nambawan tijing blong hem, mitufala i gat defren fasin nao long hemia we mitufala i bin folem bifo. Mitufala i laeklaekem mitufala yet, ating lav ya i strong moa i winim bifo. Ale mitufala i fri blong mared bakegen, mo hemia nao samting we mitufala i mekem. Mitufala i mekem promes blong mared bakegen, be namba tu taem ya mitufala i mekem long wan Haos Kingdom blong Ol Witnes blong Jeova.

Lars: Samting we mitufala i no ting se i save hapen, i kamaot. Famle blong mifala i joengud bakegen. !Mifala evriwan i glad bitim mak!

Judith: Trifala boe blong mitufala oli kam long mared blong mitufala, wetem sam famle blong mitufala mo plante niufala mo olfala fren. Hem i wan gudfala taem tumas. Sam we oli kam long lafet blong mared, oli bin save mitufala long faswan mared blong mitufala. Naoia oli glad blong luk we mitufala i joen bakegen mo oli sapraes blong luk we ol Witnes blong Jeova oli rili gat glad.

Ol Pikinini

Lars: Afta we mitufala i baptaes, tufala boe blong mitufala oli jus blong givim laef blong olgeta i go long Jeova. Hemia i mekem mitufala i glad tumas.

Judith: Jonas i bin laekem trutok blong Baebol i stat long taem ya we hem i go luk papa blong hem olsem wan smol boe. Hem i gat ten yia nomo taem hem i talem long mi se hem i wantem go stap oltaem wetem papa blong hem from we “Papa i stap folem Baebol.” Jonas i tekem baptaes taem hem i gat 14 yia. Naoia hem i finis long skul finis, mo hem i talemaot trutok blong Baebol fultaem.

Lars: Faswan boe blong mitufala, Martin, naoia hem i gat 27 yia. Hem i tingting dip taem hem i luk ol bigfala jenis we mitufala i mekem. Hem i aot long haos, i go stap long wan narafala ples. Blong tu yia nao, hem i stadi Baebol wetem ol Witnes blong Jeova. Afta faef manis nomo, hem i naf blong tekem baptaes. Hem i stap gohed blong mekem ol gudfala plan blong Kristin laef blong hem.

Namba tu boe blong mitufala, Thomas, i no wan Witnes blong Jeova. Mitufala i laekem hem tumas, mo frengud wetem hem. Hem i glad long jenis we i kamaot long famle blong mifala. Mo mifala evriwan i agri se ol rul blong Baebol we mitufala i bin lanem, hemia nao samting we i mekem famle blong mifala i joengud bakegen. Plante taem naoia, mitufala i gat jans blong joen tugeta wetem trifala boe blong mitufala wanples, yes, ful famle long wan haos nomo. !Wan blesing ya!

Laef Naoia

Lars: Mitufala i no stap talem se mitufala i stretgud olgeta naoia. Be mitufala i lanem wan bigfala samting, hemia se lav mo respek oli tu stamba fasin we oli mekem wan hapi mared. Fandesen blong mared blong mitufala naoia i defren olgeta long hemia blong bifo. Naoia, mitufala i lukluk i go long Man we i hae moa long mitufala, from we mitufala i luksave se mitufala i laef blong mekem Jeova i glad. Naoia mi mo Judith i harem se mitufala i joengud fulwan, mo mitufala i lukluk i go long fiuja wetem strong tingting.

Judith: Ating laef blong mitufala i pruvum se Jeova i beswan Man blong givim advaes long saed blong mared mo famle laef.

[Futnot]

[Tok blong pija long pej 24]

Lars mo Judith long faswan mared blong tufala long 1973

[Tok blong pija long pej 25]

Famle blong trifala boe ya i seraot, mo i joengud bakegen

[Tok blong pija long pej 27]

Lars mo Judith naoia we tufala i joen bakegen from ol rul blong Baebol