Ol Man Blong Ridim Wekap! Oli Talem
Laekem Wekap! Mi mi stap long skul ya Asembli of God, be mi stap ridim Wekap! tu. Mi neva ridim wan buk we i nambawan olsem, mo we i tokbaot plante samting olsem. Mi mi no gat televisin, be from we mi stap ridim buk ya blong yufala, mi mi naf blong tokbaot ol nius blong wol long ol fren blong mi.
A.B.A., Brasil
Giaman Stori ya “Baebol i Talem Wanem: Fasin Blong Giaman—?I Stret Samtaem?” (Julae-Septemba, 2000) i pulum tingting blong mi. ?Be mi mi ting se Baebol i agensem olgeta kaen fasin blong giaman no?
D. S., Amerika
Long Baebol, klosap oltaem giaman i minim se man i talem samting we i no stret long wan narafala man we i gat raet blong save trutok, mo hem i mekem samting ya blong trikim no spolem hem. Sam man we oli bin onagud long God, olsem Ebraham, Aesak, Rehab, mo Deved, oli bin trikim narafala, be Jeova i no jajem olgeta from. Oli no mekem fasin ya oltaem, oli mekem from we oli sek long wan narakaen samting we i kamaot. Hemia i no min se i oraet blong trikim man olsem wan pleplei, no gat. Olsem nao, sipos wan Kristin i stap long kot mo i promes blong talemaot trutok, ale, hem i mas tok tru, sipos no, hem i mas stap kwaet nomo.—ED.
Lego Sigaret Longtaem finis, mi stap smok sigaret, mariuana, mi stap dring bitim mak mo mi tekem drag ya koken. Mi bin traem plante taem blong sakemaot ol fasin ya, be nogat. I no longtaem i pas, mi stat stadi Baebol wetem ol Witnes blong Jeova, nao mi no moa harem se laef blong mi i blong nating nomo. Jeova i givhan long mi, mo stat long Jenuware, mi no moa smok sigaret mo kakae drag. Mi bin faenem i had tumas from we bodi blong mi i stap wantem ol sigaret mo drag bakegen. Stat long Jenuware kasem naoia, i no gat wan naet we mi slip gud. Wekap! (Oktoba-Disemba, 2000) we i tokbaot “?Olsem Wanem Blong Lego Fasin Blong Smok?” i givhan long mi blong luksave se taem mi no save slip gud, hemia from we bodi blong mi i wantem tumas ol rabis samting ya, i no from we mi mi stap lusum hed. !Tangkiu tumas long yufala!
D. M., Amerika
Mi mi ridim stori blong yufala, se taem yumi lego sigaret, yumi save harem nogud tumas from we bodi i wantem ol sigaret bakegen. Nao, mi tingting bak long hadtaem we mi mi bin kasem. Fastaem, mi no save tingbaot wan narafala samting, mi tingbaot sigaret nomo. Be, sloslou, sam dei, sam wik, sam manis i pas we mi no moa tingbaot sigaret. I tru se Jeova i givhan bigwan long mi afta we mi promes long Hem se bambae mi no moa smok. Hemia i 20 yia finis, mo i tru, mi neva smok bakegen.
D. A., Itali
Ol Yangfala Papa Mi mi raetem leta ya blong talemaot bigfala tangkiu long yufala from stori ya “Ol Yangfala Oli Askem . . . Givim Pikinini Long Wan Gel—?Wan Rod Blong Kam Bigman?” (Oktoba-Disemba, 2000) Mi mi gat 28 yia blong mi mo mi mi no mared yet. Mi wok olsem wan spesel paenia, no wan man we i talemaot gud nius oltaem. Long ples blong mi long Wes Afrika, wan man we i gat semfala yia olsem mi mo i no mared yet mo i no gat wan gelfren, ol man oli tingbaot hem olsem man bus, mo olsem we hem i no naf blong mekem pikinini. Plante man oli jikim mi mo lukluk nogud long mi from samting ya. Be stori blong yufala i mekem tingting blong mi i strong blong gohed blong stap klin.
A. E., Gana
Taem mi mi yangfala nomo, mi slip wetem wan boe, mo biaen, mi slip wetem plante boe. Evri taem, mi harem se mi doti tumas, mo plante boe oli jes yusum mi nomo blong oli save harem gud. Hemia i mekem tingting blong mi i foldaon. Be, Jeova i givhan long mi blong mekem laef blong mi i kam klin, mo naoia mi mi mared long wan gudfala man mo mi hapi tumas. I gud tumas we yufala i raetem ol stori ya blong givhan long ol boe blong luksave se oli save spolem wan gel blong ful laef blong hem.
F.A.S., Jemani
Mi mi wantem talem tangkiu long yufala. !Yufala i mekem i klia se taem wan gel i gat pikinini bifo we hem i mared, i no hem nomo we i mekem rong, be boe ya tu! From we woman nao i gat bel, fulap man oli ting se hem nomo i mas winim trabol ya mo man i no nid blong wari. I gud we yufala i gohed blong wekemap tingting blong ol boe long saed blong fasin we God i wantem se oli mekem long ol gel.
J.M.O., Itali