Paoa Blong Wan Smael
TRAEM tingbaot wan samting we yu luk blong smoltaem nomo be yu no save fogetem go kasem we yu ded. Hem i sas we i sas be man we i pua i save givim. Mo nating se man i rij bitim mak, be hem tu i nidim samting ya. ?Yumi stap tokbaot wanem? Wan smael.
Wan smael, hemia taem man i taetem ol masel long fes blong hem, blong mekem tufala saed blong maot blong hem oli tanem i go antap smol, mo ae blong hem i saen. Sam wik nomo afta we wan bebi i bon, hem i smael. Samting ya i mekem papa mama blong hem i glad tumas. Ol faswan smael blong bebi, oli kamaot olsem nomo, hem i no minim blong mekem. Ol man we oli gat bigfala save long saed ya, oli talem se plante taem smael ya i kamaot taem ol bebi oli stap drim, mo i luk olsem se i joen wetem ol filing long bodi blong olgeta mo ol nev we oli stap wok. Taem yumi kam bigman, yumi save smael long fasin ya yet, maet afta we yumi kakae no taem yumi stap lesin long miusik.
Be afta we bebi i gat sikis wik blong hem, hem i smael taem i harem wan voes no i luk fes blong wan man we hem i save. Nating se yumi pikinini no yumi bigman, taem ‘narafala i smael long yumi’—we hem i minim mo i wantem—samting ya i save mekem yumi harem gud. Oli faenemaot tu se wan smael i save mekem i gud long helt blong yumi. Tu dokta we tufala i wok long saed blong toktok blong man, nem blong tufala Mirtha Manno mo Rubén Delauro, tufala i wok long wan klinik we i givim kos blong tijim ol man blong mekem helt blong olgeta i kamgud moa, nem blong klinik ya Smael mo Helt. Tufala dokta ya oli talem se taem man i smael, i gat wan samting olsem lektrik we i wekemap wan glan aninit long bren we oli kolem pituitary. Nao bren i sanemaot wan kemikol we oli kolem endorphins i go long blad, we i mekem yumi harem gud.
Wan narafala impoten risen blong smael, hemia from we wan smael i mekem i gud long ol narafala. Taem yumi smael we yumi rili minim, yumi soemaot filing blong yumi, yumi no nid blong toktok. Maet yumi smael blong talem halo long wan man, blong soemaot sore, no blong leftemap tingting. Sam samtaem, yumi smael taem yumi lukluk nomo long wan foto blong pikinini we i stap smael.
Taem wan man i smael gud long yumi, yumi no moa fraet mo wari, mo samting ya i givhan long yumi blong fesem ol trabol mo traem. Baebol i givim advaes ya: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” (Ol Proveb 3:27) Yes, i isi nomo blong smael. Be taem yumi smael, yumi mekem i gud long yumi wan mo long narafala tu. I gud yu traem serem sas presen ya—yes, smael gud.