Traem Ansa Long Ol Kwestin Ya

(Yu save faenem ansa blong ol kwestin ya long ol vas blong Baebol we oli stap. Yu save jekem ol ansa blong yu wetem ol stret ansa we oli stap long pej 27. Blong faenem moa save, lukluk buk ya “Insight on the Scriptures” we ol Witnes blong Jeova oli wokem.)

1. ?Wanem ol samting we Jeova i talem se oli no save lus samtaem? (Jenesis 8:22)

2. ?Wanem ol smosmol lif we Jisas i talem se ol Farisi oli lukaotgud blong mekem taet long olgeta, be oli tanem baksaed long “stret fasin blong jajem man, mo fasin blong lavem God”? (Luk 11:42)

3. ?Jisas i talem se bambae hem i kambak long wanem fasin? (Revelesen 16:15)

4. ?Samson i yusum “wan bun blong maot blong dongki we i jes ded” blong kilim hamas man Filistia? (Jajes 15:15)

5. ?Baebol i singaot Jisas olsem wanem blong soem se hem nomo we Jeova hem wan i wokem? (Jon 3:18)

6. ?Pol i talem wanem long ol Kristin long Tesalonaeka long saed blong ol man we oli les blong wok? (2 Tesalonaeka 3:​10, 12)

7. ?Jisas i talem se yumi evriwan i mas mekem wanem blong “pas long doa ya we i smol nomo”? (Luk 13:24)

8. ?Wanem nem blong taon ya we i mekem ol man oli tingbaot Isrel long saed i go long not? (1 Samuel 3:20)

9. ?Blong givim woning long ol man we oli waes long ol fasin blong sta, se oli no mas gobak long King Herod we i wantem kilim Jisas i ded, God i mekem wanem? (Matiu 2:12)

10. ?From wanem wan man blong lukaot long kongregesen i mas “wan man we ol man we oli no Kristin oli save talem se, ‘Man ya i wan gudfala man’”? (1 Timoti 3:7)

11. ?Weples nao Filip i bin faenem mo tijim haeman ya blong Itiopia? (Ol Wok 8:26)

12. ?Wanem panis we Sol i kasem from we hem i no obei long tok blong Jeova blong spolem olgeta man Amalek wetem olgeta sipsip mo buluk blong olgeta? (1 Samuel 15:​23, 26)

13. ?From wanem Ebraham i pasem bighaf blong laef blong hem olsem strenja nomo long ol ples we hem i stap long olgeta? (Hibrus 11:10; 12:22)

14. ?Barabas, we Paelat i letem hem i gofri be i holemtaet Jisas, hem i bin mekem wanem nogud fasin? (Luk 23:25; Jon 18:40)

15. ?Wanem nem blong man blong Lida, we i bin “slip nomo long bed blong hem eit yia” from we haf bodi blong hem i ded, nao Pita i mekem hem i kamgud bakegen? (Ol Wok 9:​32-34)

Ansa Blong Ol Kwestin

1. ‘Planem garen mo tekemaot kakae long hem, kolkol mo hot, taem blong lif i folfoldaon mo taem blong lif i gru bakegen, dei mo naet’

2. Min mo ru

3. “Olsem we man blong stil i kam”

4. 1,000

5. “Stret Pikinini blong God”

6. “Man we i les blong wok, yufala i no givim kakae long hem.” “Oli mas wok had long han blong olgeta blong kasem kakae blong olgeta”

7. “Yufala i mas traehad”

8. Dan

9. God i toktok long olgeta long wan drim

10. Blong “nem blong hem i no save kam nogud, nao hem i no save foldaon long trap blong Setan”

11. Rod ya we i aot long Jerusalem, i pas long draeples, i godaon long Gasa

12. Jeova ‘i no moa wantem blong hem i stap olsem king blong Isrel’

13. From we hem i stap wet long “wan taon we fandesen blong hem i save stap oltaem nomo,” Jerusalem we i stap long heven

14. Hem i mekem ol man oli girap, oli faet agens long gavman, hem i kilim man i ded, mo hem i wan man blong stil

15. Aeneas