Nem Blong God Long Wan Olfala Haos

MAN BLONG WEKAP! LONG SLOVAKIA I RAETEM STORI YA

SLOVAKIA i wan smol kantri long medel blong Yurop. Hem i wan naes kantri, mo i gat plante bigbigfala haos blong ol haeman blong bifo we oli stap olbaot long kantri ya, blong makem se hem i wan olfala kantri we i gat plante rijman long hem bifo. Wan long ol olfala haos ya we nem blong hem Orava, i stap antap long wan klif we i hae olsem 112 mita, jes afsaed long wan vilej.

Faswan stori we oli raetem long histri long saed blong Orava Haos, hemia long yia 1267. Afta long taem ya, haos ya i go long han blong plante defren man. Long yia 1556, wan rij famle i pemaot haos ya, nem blong famle ya Thurzó. Oli mekem sam haf blong haos ya i gud bakegen mo oli ademap wan olta blong wosip long hem.

Evri yia, plante taosen turis oli kam blong lukluk Orava Haos. Ol turis ya oli luk wan spesel samting long yad blong haos ya, hemia wan ston we oli katem i kam olsem prapa saen blong famle Thurzó nomo. Aninit long pija ya, oli raetem nem blong God we Baebol i talem, Jeova, long lanwis Latin.