Wan Samting We i Soem Lav Blong God Longtaem Finis i Kam
I GAT seven samting long wol long taem bifo we ol man oli bin ting se oli nambawan mo oli sapraes tumas long olgeta, taswe oli bin putum nem long olgeta se ‘seven samting blong sapraes long wol.’ Olgeta samting ya oli lus finis, wan nomo i stap, hemia ol piramid long Ijip. Be Baebol i defren olgeta. Ol man we oli no gat hae nem oli bin raetem Baebol, mo oli raetem long ol samting we oli save kam nogud. Be Baebol i stap yet, mo i stap kam kasem taem blong yumi we tok blong hem i stret gud yet. Yumi save trastem spesel buk ya fulwan.—Aesea 40:8; 2 Timoti 3:16, 17.
Jeova God i talem long sam man blong oli raetemdaon tingting blong hem. Hem i no lego ol man oli holem ol toktok blong hem long tingting blong olgeta nomo, from we hem i save se oli save jenisim tok blong hem no oli save fogetem. Wan nara samting se, ol tok we ol man blong hem oli raetem long Baebol i isi, taswe olgeta we oli no skul gud tu, oli save ridim Baebol mo kasem save long hem. (Ol Wok 4:13) Yumi save se i mas olsem sipos Bigfala Man ya we i wokem olgeta samting i stamba blong Baebol mo sipos hem nao i givim tok long ol man blong oli raetem long Baebol. Wan nara samting se, plante moa man oli save kasem Baebol. Hemia tu i soemaot lav we God i gat long olgeta man we hem i wokem, nating we oli stap long weples, no oli toktok long wanem lanwis. (1 Jon 4:19) !Yumi mas save se, wok blong givimaot Baebol long plante man, hemia i no daonem buk ya olsem se i no moa impoten. !No gat! Samting ya i leftemap buk ya.
Olgeta save we oli stap insaed long Baebol, oli soemaot moa lav ya we God i gat long yumi. Yumi luk finis long ol nara haf blong Wekap! ya se, Tok blong God i eksplenem olsem wanem yumi kamaot, from wanem laef blong yumi i sot tumas mo i fulap long trabol, mo olsem wanem God bambae i yusum Kingdom blong hem blong finisim olgeta trabol. Yumi luk finis sam nambawan advaes blong Baebol, olsem wanem blong stap glad mo harem gud long laef naoia. (Ol Sam 19:7-11; Aesea 48:17, 18) Antap long ol samting ya, yumi lanem finis olsem wanem Bigfala Man ya we i wokem olgeta samting, bambae i karemaot doti we giaman tok blong Setan i sakem long nem blong hem.—Matiu 6:9.
?I gat wan narafala buk olsem Baebol we i givhan gud mo i stret long laef blong man tede? ?I gat wan buk we advaes blong hem i wok gud olsem Baebol, mo i givim hop long ol man we oli harem nogud, long wan wol we i fulap long trabol? Nogat. Baebol i no olsem ol seven bigfala samting blong sapraes long wol long taem bifo. Bighaf blong olgeta ya, ol man oli wokem blong ona long ol giaman god blong olgeta, no long ol haeman. Be Baebol i wan buk we longtaem finis i kam, i soemaot we Jeova i tingbaot mo i lavem olgeta man long wol.
Sipos yu no stadi Baebol yet, i gud yu faenemaot wanem samting i stap long hem. Tede, ol Witnes blong Jeova oli stap stadi Baebol wetem moa long sikis milian man long olgeta ples long wol. Oli luk wok ya olsem wan janis blong givhan long olgeta we hat blong olgeta i stret, blong oli save faenemaot sipos Baebol i rili kamaot long God, mo sipos oli save trastem.—1 Tesalonaeka 2:13.