Sam Nius Blong Wol

◼ Olgeta haf blong Baebol ya New World Translation of the Holy Scriptures i stap naoia long 43 lanwis, mo i gat 3 bakegen long ol raeting we blaenman i save filim long fingga blong hem. Mo antap long namba ya, oli wokem New World Translation of the Christian Greek Scriptures, long 18 moa lanwis bakegen wetem 1 moa blong ol blaenman. Long manis Julae 2007, namba blong ol Baebol ya we oli bin printim, i kasem 143,458,577.

◼ Wan hanraet blong Baebol we i olfala moa long ol narafala hanraet we oli bin faenem, hemia Namba 6:24-26 we oli kolem Blesing blong Ol Pris. Hanraet ya i stap long tufala samting olsem skrol we oli wokem long silva mo oli karem blong givim gudlak. Oli wokem tufala samting ya samwe long en blong ol yia 600 B.K.T. no stat blong ol yia 500 B.K.T.—BIBLICAL ARCHAEOLOGY REVIEW, YUNAETED STET.

◼ Long Disemba, 31, 2006, oli kaontem namba blong ol bigfala lanwis mo ol smosmol lanwis we oli printim wan buk blong Baebol no sam buk blong Baebol long hem, mo namba ya i kasem 2,426 evriwan. Hemia i 23 moa antap long namba blong yia 2005.—UNITED BIBLE SOCIETIES, BRITIN.

◼ Samwe long 28 pesen blong ol man Amerika, oli bilif se Baebol hem i “tok blong God . . . mo yumi mas ridim olsem we i stap, i no gat sam tok we oli olsem pijatok,” 49 pesen blong ol man oli talem se Baebol “i kamaot long God, be oli ting se sam tok blong hem oli pijatok nomo,” mo 19 pesen blong ol man oli talem se Baebol i “wan buk blong ol kastom stori nomo.”—GALLUP NEWS SERVICE, YUNAETED STET.

?Baebol Ya Long Jaenis i Olfala Moa Bitim Ol Narawan?

Wan man we i studen long Yunivesiti blong Peking, Yiyi Chen, i talem se: “Long yia 781 K.T., oli katem wan ston [lefsaed] we i karem olfala hanraet blong Hibru haf blong Baebol long lanwis Jaenis. I no gat wan ripot blong talem se i gat wan Jaenis Baebol we i olfala moa long hemia.” Ston ya we olgeta blong jos ya Nestorian Kristin oli stanemap, oli faenem long taon ya Xian, long yia 1625. Man ya Chen, i gohed i talem se: “Nem blong ston ya long lanwis Jaenis i minim se, ‘Memori blong Jos ya blong Daqin we i kam long Jaena blong Givim Laet long ol Man’ (. . . Tok ya Daqin long lanwis Jaenis i minim ol ples we gavman blong Rom i rul long olgeta). Long ston ya i gat sam tok long lanwis Jaenis we i talem se, ‘ol trufala buk,’ mo ‘tanem Baebol i go long narafala lanwis.’

[Foto Credit Line blong pija long pej 30]

© Réunion des Musées Nationaux/Art Resource

Wan Sas Samting We Oli Faenem Long Swam

Long 2006, wan grup blong man we oli digim graon long Aealan, oli faenem Buk blong Ol Sam long wan swam. Oli ting se ol man oli bin raetem buk ya we i stap long lanwis Latin long ol yia 700 K.T. Oli talem se hem i wan sas samting, from we i no gat plante hanraet blong ol yia 700 we oli stap yet. I gat 100 pej blong hem we oli wokem long skin blong anamol, wetem faswan kava blong hem we i joenem ol pej ya long wan fasin we i flas mo i nambawan. Ripot long wan niuspepa long London (The Times) i talem se: “I gat sam haf blong wan hanbag we oli wokem long skin blong anamol, mo haf blong wan mat we maet oli bin yusum blong haedem buk ya. Olsem nao, ol man Viking we oli kam blong stil 1,200 yia bifo, oli no save karem.” Nating we ol pej blong buk ya oli fasfas wanples mo oli roten lelebet, ol man blong hae save oli suagud se bambae oli save seraotem ol pej ya, mo kipim gud i stap.

Kameong i Fulap Long Samting We i Soemaot Histri

Wan ripot i talem se, ol man we oli digim graon blong faenem ol samting blong bifo, oli faenem plante taosen samting we ol man oli wokem, stat bifo long taem blong ol man Isrel kam kasem taem blong yumi. Oli faenem ol samting ya long hip graon we ol kameong oli karemaot long ples we tempol blong Jerusalem i stanap long hem bifo. Wan long olgeta samting ya, hem i hed blong wan ara, olsem kaen ya we ol ami blong Nebukadnesa oli yusum, long taem we oli spolem faswan tempol blong ol man Jiu. Beswan samting we oli faenem, hem i wan stam we oli wokem long red graon long ol yia 600 B.K.T. no 500 B.K.T., mo i gat Hibru nem ya, Gedalyahu Ben Immer Ha-Cohen, i stap long hem. Wan man blong stadi long ol samting ya, Gabriel Barkai, i talem se stam ya, “maet hem i blong brata blong Pashur Ben Immer, we Baebol i talem [long Jeremaea 20:1] se hem i wan pris mo i wok long tempol.”