Ol Mared Oli Kasem Trabol
“!Mi harem se i naf nao!” ?Olsem wanem? ?Yu bin harem samfala oli talem tok ya long saed blong mared blong olgeta? ?Yu we yu mared finis, yu tu yu bin gat tingting olsem samtaem?
PLANTE taosen man mo woman oli fren tugeta, sloslo oli lanem blong lavlavem olgeta, nao biaen oli mared. Plante taosen narafala oli lavlavem olgeta wantaem nomo, mo oli hareap blong mared. Olgeta evriwan ya oli ting se bambae oli hapi. Be wan advaesa long saed blong mared i talem se: “Plante long ol mared man mo woman we oli kam luk mi, oli kasem mak ya finis we oli no moa ting se mared blong olgeta i save hapi. Tingting blong olgeta i foldaon from we patna blong olgeta, mared blong olgeta, lav, mo laef blong olgeta tu i no go gud olsem oli bin tingbaot fastaem.” Plante long ol man mo woman ya, oli no moa gat wan samting we oli serem, oli serem pepa blong mared nomo wetem haos we oli stap long hem.
Sam mared oli brok from we tufala i gat tumas wari mo wok. Nating we wan man mo woman tufala i lavlavem tufala, be sipos wok blong tufala blong winim mane i hevi tumas, sipos tufala i mas wok long naet no wok plante aoa evri dei, samting ya i save mekem se tufala i no moa gat paoa mo taem blong spenem tugeta. Trabol long saed blong mane, trabol wetem ol pikinini, tufala i muv i go long narafala haos, tufala i jenisim wok, mo trabol wetem helt, ol samting ya oli save mekem se sloslo lav mo respek tu i lus long mared blong tufala. Blong talem long ol klia tok, taem ol yia oli pas mo ol jenis oli kamaot, i save gat plante trabol mo wari we oli save seraotem hasban mo waef.
Plante mama oli mekem samting we i olsem tu fultaem wok wantaem. Oli wok long haos, mo oli wok blong winim mane. Hemia i save mekem se oli givim olgeta taem mo paoa blong olgeta long wok blong olgeta mo wok blong lukaot long ol pikinini blong olgeta, nao oli no moa gat taem blong mekem wan narafala samting. Ol hasban mo waef we oli taed tumas, oli no moa spenem taem tugeta. Mo plante long olgeta oli harem se oli no save jenisim ol samting ya we i stap kakae taem blong olgeta, i olsem we ol samting ya oli stap fosem olgeta nomo blong seraot. ?From wanem plante mared oli kasem bigfala trabol olsem? ?Yu yu save mekem wanem blong wokem wan hapi mared mo mekem i stapgud oltaem?