?Wanem i Save Gorong?

WAN man no woman we i ting se bambae i no gat problem long mared blong hem, hem i no gat stret tingting. Nating se tufala we i mared i joengud mo tufala i gat wan tingting long plante samting, be bambae i mas gat sam samting we tufala i no agri long hem. Taswe, bambae i mas gat sam problem i kamaot. I gat plante samting we sloslo oli save spolem wan mared, olsem we rosta i save wok sloslo blong kakae aean we oli pentem finis. Blong kasem save wanem we yumi save mekem blong givhan long mared blong yumi, fastaem yumi mas luklukgud long sam samting we oli save gorong.

Wan Trabol Taem

Baebol i talem se long taem blong yumi plante man bambae “oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, . . . oli no man blong talem tangkiu, mo oli no save tingbaot God. Bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas.” (2 Timoti 3:2-4) From we hasban mo waef tufala i sinman, plante taem tufala i no kasem save gud long tingting blong tufala, tufala i no toktok klia, mo tufala wanwan i talem ol tok we i spolem filing blong narawan. Be ol fasin long vas ya antap oli save mekem trabol ya i kam mowas.

Wan man blong stadi long ol mared, i talem se: “Taem ya we yumi laef long hem i mekem plante mared man mo woman oli konfius. Tede . . . yumi gat fulap save we i blong halpem yumi blong mekem mared blong yumi i gud moa . . . Be i gat plante narafala samting tu we oli gat paoa long yumi, olsem, tingting blong ol man raonabaot long yumi mo trabol long saed blong mane. Ol samting ya oli mekem i had blong gat wan gudfala mared.”

Ol Samting i No Go Gud Olsem Tufala i Bin Tingbaot

Wan dokta we i givhan long ol man mo woman we oli gat trabol long mared blong olgeta, i talem se: “Wan bigfala risen from wanem plante mared man mo woman oli harem nogud, hemia from we ol samting i no go gud olsem oli bin tingbaot.” Tingting blong plante man mo woman i foldaon taem oli faenemaot se mared i no olsem oli bin tingbaot, hasban no waef blong olgeta tu i no sem mak long tingting we oli gat long hem fastaem. Oli harem nogud long sam slak fasin blong hasban no waef blong olgeta we oli no bin luk fastaem, no maet long sam mastik we oli bigwan moa bitim wanem we oli bin tingbaot fastaem.

Baebol i talem stret se mared i save givim “soa mo krae.” (1 Korin 7:28, The New English Bible) ?From wanem? Taem tu sinman oli fren tugeta, sloslo ol slak fasin blong tufala oli mas kam long klia ples.

Mo tu, plante man mo woman we oli wantem wan hapi mared, oli no rere blong wok from. Bigfala filing blong lav we oli gat fastaem i mekem se oli no gat stret tingting long saed blong mared. Oli bin ting se mared bambae i finisim evri trabol blong olgeta mo bambae oli hapi olwe, be oli no bin tingbaot bigfala hadwok we man mo woman tugeta i mas mekem blong gat wan hapi mared. Nao taem oli faenemaot se mared i olsem wanem, oli harem nogud mo oli konfius. Olgeta we tingting blong olgeta i farawe moa long trutok long saed blong mared, olgeta nao we oli harem nogud moa taem oli faenemaot se mared i olsem wanem.

Trabol Blong Storiangud Tugeta

?Blong mekem se man mo woman i haremgud moa long mared blong tufala, wanem ol mastik long saed blong storian tugeta we tufala i mas blokem? Samfala oli tekem fasin ya blong harem ol tok blong hasban no waef blong olgeta long sora blong olgeta, be i no long tingting mo hat blong olgeta. Mo tu, sam mared man mo woman oli storian tugeta, be ol toktok blong olgeta i no gat mining mo i no soemaot trufala filing blong olgeta. Sipos samting olsem i hapen, tufala i stap toktok nating nomo, tufala i no moa toktok wetem lav mo fasin kea. Tufala i no moa openem hat blong tufala mo talem ol tok we i gat mining, nao samting ya i mekem we tufala i raorao plante. Tufala i raorao from enikaen samting nomo, mo from ol samting ya tu we i no blong raorao from. Wan i talem samting, narawan i kasem rong mining blong toktok blong hem, nao tufala i raorao. Wan i sakem nogud tok, narawan i harem nogud, ale hem i no moa wantem toktok, i stap kwaet nomo.

Sore tumas, plante mared man mo woman oli no luksave ol gudfala fasin blong hasban no waef blong olgeta. Sipos oli luksave, be oli no talemaot mo soemaot se oli glad mo oli gat tangkiu from. Mo tu, tede plante mared woman oli mas wok blong winim naf mane blong famle. Antap long samting ya, taem oli kambak long haos, oli mas mekem bighaf blong wok long ples ya tu. Samting ya i mekem olgeta oli kros. Mo tu, plante woman oli harem se man blong olgeta i no mekem wan samting blong halpem olgeta blong haremgud long filing blong olgeta.

?Yu yu save mekem wanem blong wokem wan gudfala mared? Tingbaot nambawan advaes blong Baebol we i kam biaen.