SAM NIUS BLONG WOL

Artik

Wan saentis long Yunivesiti blong Cambridge long Inglan, nem blong hem Peter Wadhams, i stadi long solwota, nao hem i talem se: “Long hot taem, i no moa gat plante aes long Artik. Toti yia bifo, aes i kavremap ples ya, i fo taem moa long aes we i stap naoia.” From we i no moa gat plante aes, long yia 2012, samwe long 50 sip oli folem rod we i pas long Artik. Aes ya i lus from we wol i stap kam hot moa.

Wol

Long ol dei afta we woman i bonem pikinini, i gat bitim 700 defren kaen gudfala bebet long melek blong mama ya. Ol man blong hae save oli no ting se i gat plante olsem. Oli stap stadi yet blong faenemaot wok blong ol gudfala bebet ya, we i mekem se bel blong pikinini i wok gud mo bodi i save faetem ol sik.

Inglan

Ol saentis long Inglan oli mekem wan stadi long ol man blong draevem trak. Oli faenemaot se sipos man blong draevem trak i sik smol we nus blong hem i ron, bambae tingting blong hem i no wok kwik blong pulum hem blong tekem aksen. Hem i slo moa i winim man we i dring tumas.

Demokratik Ripablik Blong Kongo

Long Afrika, ol man oli sutum plante taosen elefen evri yia blong kasem tut blong olgeta. Samfala oli talem se “naoia fasin ya i kam antap bitim olgeta yia bifo.” Sam elefen, ol man ya oli sutum olgeta long top blong hed blong olgeta. I luk olsem se ol man ya oli stap long helikopta taem oli mekem samting ya.

Ostrelia

Long 27 yia we i pas, klosap stret haf blong korel long bigfala rif ya we i blokem Kwinslan, i lus. Ol saentis oli talem se ol hariken mo wan stafis tu we i luk olsem ol grasnil [Acanthaster planci], oli stap kilim korel ya. Mo tu, solwota i stap kam hot moa, nao i mekem se korel i lusum kala blong hem.