Sam Nius Blong Wol

JEMANI

Long yia 2012, wan bigfala kot blong Jemani i mekem desisen se sipos wan man we i putum mane long jos olsem we i joen long wan bisnes, i wantem finis long bisnes ya, hem i no moa save stap olsem wan memba blong jos ya. Ol memba blong Katolik jos we oli finis long bisnes ya blong putum mane long jos, oli no moa pem takis i go long jos ya. From samting ya, maet jos i blokem olgeta blong oli no moa tekem bred mo waen long jos, mo oli no save talemaot sin blong olgeta long pris, oli no save kasem wan wok insaed long jos, mo maet jos i no berem olgeta taem oli ded.

WOL

Wan stadi we oli mekem long olgeta skul long wol, i soemaot se bigfala skul long wol hemia skul blong ol Kristin we i gat bitim 2 bilian memba. Namba tu bigfala skul long wol hemia Islam, we i gat bitim 1 bilian haf man oli joen long hem. Namba tri, hemia ol man we oli talem se oli “no joen long wan jos,” nating se oli bilif long God, we namba blong olgeta i bitim 1 bilian finis. Mo namba fo bigfala skul long wol, hemia Hindu, we i gat klosap 1 bilian memba.

JAPAN

Ol saentis blong Japan oli faenemaot se, taem “man i kasem ol gudfala toktok from wan wok we hem i mekem, samting ya i wekemap haf blong bren” we i givim “filing blong glad” long man. Save ya i soemaot se wan gudfala rod blong pulum man i kam gud moa long wok blong hem, hemia blong talem ol gudfala toktok long hem.

BOLIVIA

Klosap long en blong yia 2012, gavman blong Bolivia i mekem wan sensas long ful kantri. Blong kasem stret namba blong ol man Bolivia, gavman i talem long evri man se oli no mas aot long haos blong olgeta, long dei we oli kaontem ol man. Mo tu, oli blokem ol man blong oli no ron long trak blong olgeta, mo ol man oli no save kam insaed no goaot long kantri ya. Mo tu, oli blokem ol man blong oli no dring strong dring long dei ya.

ITALI

Wan stadi we oli mekem long Itali, i soemaot se ol papa mo mama oli spenem 15 minit evri dei blong pleplei wetem pikinini blong olgeta. Niuspepa ya La Repubblica i talem se: “Long 5 famle, i gat wan nomo we i ting se pleplei wetem pikinini, i wan rod blong lanem hem.” Andrea, wan man we i gat gudhan blong wokem ol pleplei, i talem se taem papa mo mama tufala i pleplei wetem pikinini blong tufala, tufala i stap givhan long hem blong i yusum tingting blong hem, mo i “kasem save se hem i mas folem sam rul long laef blong hem.”