Stadi 1
Talem Ol Gudfala Tok Blong Trutok
1-3. ?Olsem wanem fasin blong toktok i stat, mo olsem wanem hem i kam kasem tede?
1 Jeova i Bigfala Man ya we i wokem fasin blong toktok. Yumi mas leftemap nem blong hem from gudfala rod ya we hem i wokem blong ol man oli save toktok. Mo from ol samting we God i stap wokem oli gud, yumi save se fasin blong toktok we God i givim long man fastaem hem i wan long ol “presen we oli nambawan” we Baebol i tokbaot long Jemes 1:17. Long saed blong fasin blong toktok, Ludwig Koehler wan man we i save gud long ol tok, i bin raetem i se: “I hadwok blong yumi kasem save long wanem i rili hapen taem man i toktok, paoa blong tingting i wokem filing, . . . nao i kam wan tok we yumi talemaot. Fasin blong toktok i wan samting we i haed. Hem i wan presen we i kam long God, wan merikel.”
2 Taem God i wokem Adam hem i givim ol tok long hem. Mo tu hem i naf blong mekem ol nyufala tok. God i mekem se hem i naf blong talem tok we i gat mining. I no blong hem i talemaot ol tingting blong hem nomo long gudfala tok, be tu hem i naf blong kasem save long toktok blong narafala. Yumi save samting ya from God i toktok long Adam, i talemaot ol samting we Adam i mas mekem. Nao biaen, Adam i save talemaot long Iv.—Jen. 1:27-30; 2:16-20.
3 Be, taem wol ya i kam fulap wetem ol rabis fasin, long taem ya we ol man oli wokem haos ya we i hae we i hae long Babel, God i mekem toktok blong ol man i fasfas. (Jen. 11:4-9) From samting ya, i gat plante lanwis tede, plante long olgeta oli seraot long ol defdefren smol lanwis. Sam long olgeta ya ol smol grup blong ol man nomo oli yusum mo sam narafala plante milyan man oli stap yusum blong toktok. Man hem wan i no moa stret gud olgeta olsem fastaem, mo toktok blong man tu i no moa stret gud olgeta. Plante taem ol man oli yusum fasin blong toktok blong talemaot ol gyaman tok mo blong pulum ol man oli go longwe long God.
4. ?Yumi mas yusum fasin blong toktok olsem wanem?
4 Be yumi ya ol minista blong Jeova, yumi wantem yusum fasin blong toktok long gudfala rod. Yumi gat jans blong tokbaot trufala God long ol man, mo gudfala mesej blong hem long saed blong laef we i no save finis long nyufala wol. Buk ya Buk Blong Tiokratik Skul i blong givhan long yumi blong gat frut long wok ya.
5, 6. ?From wanem i impoten se samting we yumi talem hem i trutok?
5 Talemaot ol tok blong trutok. Blong yusumgud fasin blong toktok, oltaem yumi mas talemaot trutok we i laenap fulwan wetem Tok blong God. Gyaman tok i no save givim ol gudfala samting long saed blong speret long ol man we oli lesin long yumi. Taswe aposol Pol i givim waes advaes ya se: “Yu yu mas holem stret toktok ya we mi tijim yu finis long hem.” ?From wanem? From we “stret toktok ya” i kamaot long God. (2 Tim. 1:13) Pol i givim woning se sam man “bambae oli no save lesin long ol trutok ya,” be hem i soemaot se i stret blong yumi “mas talemaot tok” blong God. Taswe yumi mas stap fasgud long trutok blong God, yusum Tok blong Hem olsem stampa blong olgeta wok blong yumi long saed blong prij mo tij.—2 Tim. 4:1-5.
6 Yumi savegud se gudfala tok we i kamaot long stret taem blong hem i save mekem wan man i wokbaot long rod ya blong laef we i no save finis no i save givhan long hem blong i stap long rod ya blong laef. (Prov. 18:21; Jem. 5:19, 20) Taswe i impoten tumas long yumi ol minista wanwan blong yusum ol gudfala tok, mo Tiokratik Skul i wantem makem poen ya.
7-9. ?Wanem kaen tok oli save karem frut?
7 Ol Wod we yu jusum. Wan man we i givim tok i yusum ol wod blong talemaot ol tingting no ol save blong hem long ol man we oli stap lesin long hem. Samting ya i save wok gud sipos man ya i jusum ol stret wod nomo blong talemaot ol tingting blong hem mo ol man we oli lesin oli save kasem save long mining blong ol wod ya. Fastaem, i no isi blong jusum ol stret wod. Sem mak long waes King Solomon, we hem i man blong singaot ol man Isrel oli kam wan ples, “hem i putum tingting blong hem i stap strong mo i lukaotgud long wok ya blong putum plante proveb long stret oda. Man ya we i singaot ol man oli kam wanples i stap skelem blong faenem ol gudfala tok mo fasin blong raetem ol stret tok blong trutok.” (Ekles. 12:9, 10) Tingting i mas wok, blong lukaotem mo skelemgud ol wod we oli gud blong yusum. Long vas eleven long sem japta blong Eklesiastis, hem i makemaot se ol tok we man i jusumgud oli gat paoa. “Ol tok blong ol waesman oli olsem ol wud we i gat nil long en blong hem, blong stikim buluk.” Ol tok ya oli stikim mo oli pulum ol man blong oli folem rod blong laef.
8 Yusum ol tok we oli isi, hemia faswan rul blong lanem. Blong talem tok we i karem frut yu no mas yusum ol tok we oli fasfas no oli had tumas blong ol man oli kasem save long olgeta. I tru, fasin ya blong yusum ol tok we oli isi i bigfala samting blong mekem ol man oli kasem save. From samting ya, oli givhan long ol man blong no fogetem ol tok ya. Tingbaot ol faswan tok ya we Baebol i yusum se: “Bifo we bifo olgeta, God i mekem wol mo skae.” ?Yu ting se tok ya i had tumas blong yu kasem save? No gat. Ol wod blong hem oli isi mo yu no save fogetem. Afta we waes man blong singaot ol man oli kam wanples i tingtinggud long ol tok blong hem, hem i talem long lastok blong hem se: “Yu mas fraet gud long trufala God mo yu mas folem ol loa blong hem. From we hemia nao olgeta wok we man i mas mekem.”—Ekles. 12:13.
9 Trutok blong God i klia nomo, taswe yumi no wantem yusum ol tok we oli mekem trutok ya i fasfas. Yumi no wantem ‘yusum ol tok we oli no waes blong mekem advaes i no klia.’ (Job 38:2) ?Hu bambae i harem mo kasem save long hem “sipos krae blong pupu i no klia gud”?—1 Kor. 14:8, NW.
10, 11. ?Olsem wanem Jisas i wan eksampel long yumi long fasin blong toktok?
10 Gudfala eksampel blong Jisas Kraes i save givhan long yumi. Ol tok blong hem oli isi mo blong talem ol pijatok we oli gat paoa long ol man, hem i yusum ol samting we oli savegud long olgeta. Tingbaot tok blong hem we i givim long hil ya kolosap long Kapaneam. Tok ya i stap long Gospel blong Matyu japta faef go kasem japta seven. ?Hem i yusum ol flas tok? No gat. ?Hem i yusum ol tok we oli no klia? No gat. Jisas i wantem mekem trutok i kasem tingting blong ol man, nao bambae i save gat paoa long hat blong olgeta. Hem i rili gat tingting we i sem mak long Papa blong hem, Jeova. Hem i nambawan eksampel long olgeta minista blong Jeova, long saed blong fasin blong toktok.
11 Yumi neva mas ting nating long paoa blong ol tok blong trutok we oli klia, oli isi, mo yu jusumgud. Oli save mekem man i haremgud, oli save wekemap tingting mo filing long man, mo oli pusum hem blong mekem ol save ya i wok. Long saed blong ol toktok blong Jisas, Luk 4:22 i talem se ol man we oli lesin long hem “oli glad tumas long ol tok blong hem, mo oli sapraes tu from we tok blong hem i gud tumas.” Ol aposol blong hem tu, oli luksave se plante man oli wantem lesin long olgeta, nating se ol haeman blong ol man Isrel long taem ya oli ting se ol aposol oli ‘no gat nem mo oli no skul gud tu.’ (Wok 4:13) ?From wanem oli save toktokgud olsem? Olgeta oli bin lanem fasin ya long Masta blong olgeta, Kraes. Samting ya i leftemap tingting bigwan blong ol man blong God tede, ol yangfala mo ol olfala.
12. ?Olsem wanem ol papa mama oli save givhan long ol pikinini blong olgeta blong oli save talemaot prapa tingting blong olgeta?
12 Ol papa mama oli save givhan bigwan long ol pikinini blong olgeta blong oli save talemaot prapa tingting blong olgeta. Taem oli stap long haos oli save mekem ol pikinini oli tingbaot ol gudfala toktok, oli save soem eksampel mo tijim olgeta long saed ya. Ol toktok we oli laenap wetem ol rul blong Baebol, oli save makem long tingting blong ol pikinini blong olgeta. (Dut. 6:6-9) Plante famle oli tekem smoltaem long evri moning blong tokbaot vas blong dei we i kamaot long smol buk ya Ridimgud Ol Tok Blong Baebol Evri Dei mo samtaem oli joen tugeta blong ridim Wajtaoa mo Wekap! Hemia i wan gudfala trening long famle, i ademap ol nyufala tok long toktok blong olgeta mo i soemaot olsem wanem oli save haremgud blong yusum ol tok ya blong toktokgud wetem ol narafala man. Long rod ya tu, famle i kasem tingting blong Jeova, mo fasin blong toktok blong olgeta i soemaot samting ya.
13-16. ?Blong kasem ol gudfala samting long Tiokratik Skul, yumi wanwan i mas mekem wanem?
13 Joen long Tiokratik Skul blong kamgud moa. Sipos yumi wantem kamgud moa long minista wok, bambae stadi we i stap insaed long buk ya i givhan long yumi blong yusum “ol gudfala tok . . . ol stret tok blong trutok.” Nomata yu gat hamas yia no yu kasem wanem mak long skul, sipos yu trastem rod ya blong Jeova mo speret blong hem yu save kamgud moa long Kristin minista wok. Be yu mas traehad blong mekem olsem. “Yu mas stap mekem ol wok ya. Yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed moa.”—1 Tim. 4:15.
14 Yumi wanwan i mas tekem disisin blong stap long olgeta miting blong ol man blong Jeova, mo folem disisin ya. I impoten blong mekem olsem long program blong Tiokratik Skul long evri wik blong bambae i givhan long yu blong folem advaes ya blong aposol Pol se: “Yu mas traehad long evri rod blong kam we yu wan man blong wok we God i stap harem gud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo.”—2 Tim. 2:15.
15 Evriwan, man mo woman, yangfala mo olfala, we oli stap go long ol miting blong kongregesen oli save putum nem blong olgeta mo kasem ol gudfala samting long skul ya. Nomata yu baptaes finis no yu no baptaes yet yu save putum nem blong yu. Olgeta we oli no skul gud oli mas tingbaot se God i save finis se plante long ol man we oli waes long ol save blong wol, oli haeman, oli skul gud long lukluk blong ol man long wol, oli no save lesin long mesej blong Kingdom. (1 Kor. 1:26-29) Be God i save tu se plante man we ol man blong wol oli stap lukluk daon long olgeta bambae oli harem tok blong hem mo bambae oli glad blong talemaot long ol narafala man we oli hanggri long trutok. Taem yu putum nem blong yu long skul ya mo yu traehad blong folem ol stadi blong hem bambae yu yu kasem ol save ya we bambae i mekem yu yu naf blong talemaot ol gudfala tok blong trutok long ol man we hat blong olgeta i stret. Samting ya bambae i mekem yu yu haremgud mo tu ol man we oli lesin long yu oli save haremgud.
16 Antap moa long ol samting ya, taem yu traehad olsem wan studen long skul ya, bambae ol tok mo fasin blong yu oli save kam olsem King Deved blong Isrel i stap askem long prea se: “Hae God, yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.” (Sam 19:14) Evri Kristin oli mas traehad blong oli save toktokgud, oltaem oli mas yusum ol tok we bambae God i haremgud long hem. Tiokratik Skul i wantem givhan long yu blong kasem mak ya.