Stadi 2
Tiokratik Skul i Givim Ol Gudfala Samting
1-5. ?Wanem kaen trening Tiokratik Skul i givim long yumi blong yumi mekem wok blong God?
1 ?Olsem wanem Jeova i trenem yumi olsem ol man blong wok blong hem, blong yumi kasem frut long minista wok? Hem i yusum ogenaesesen blong hem. Long plante kantri oli stat trenem ol man taem oli tijim olgeta blong oli save rid. Olgeta we oli save rid mo raet, oli save putum nem blong olgeta long Tiokratik Skul.
2 Skul ya i fri, hem i blong trenem ol man long minista wok. Hem i givhan long kongregesen long tu rod: (1) Ol studen wanwan oli kasem program blong stadi we i givhan long olgeta blong oli kam naf blong mekemrere, wokem, mo givim tok long ol narafala man long fasin we i stret mo i klia, mo (2) ful kongregesen i kasem plante gudfala save we oli kamaot long program blong skul ya evri wik. Bambae ol man oli kam strong moa long saed blong speret mo bambae i gat frut long minista wok blong olgeta.
3 Evri yia, long evri kantri branj ofis blong Watch Tower Sosaete i wokem ful program blong skul long wan yia. Program ya i dipen long ol buk we oli gat long lanwis blong kantri ya. Program ya stampa blong hem i Baebol nomo.
4 Evri wik ol studen oli givim ol gudfala tok. Tok namba wan i impoten mo hem i longfala moa long ol narafala tok. Brata we i naf i mekem tok ya, blong kongregesen i save kasem ol gudfala samting from. Ol narafala tok oli sotfala moa mo oli save givim long eniman no woman, folem samting we program blong skul i talem. Wan long ol tok ya we hem i sot moa sipos program blong kongregesen i mekem olsemia, hemia Baebol riding. Ol narafala tok oli gat stampa tok we bambae ol studen oli wokem tok long hem mo maet oli mekem pleplei blong soemaot olsem wanem hem i wok, sipos i stret long ol save long tok. Plante taem ol tok we ol sista oli mekem i olsem we oli prij long ol haos wanwan, oli mekem visit no biaen long stadi, no oli tekem jans blong prij, no oli toktok wetem memba blong famle no narafala pablisa.
5 Long ol smol kongregesen we ol woman nomo i stap, olgeta oli save mekem evri tok ya. ?Olsem wanem? Oli mekem olsem we oli talem ol ripot, tu sista oli storeyan, mekem ol kwestin mo ansa no maet oli ridim tok ya olsem we i stap long buk nomo.
6. ?Wanem mak man blong lukaot long skul i mas gat?
6 Man blong lukaot long skul. Long evri kongregesen i gat wan man we i lukaot long Tiokratik Skul. Hem i mas wan tija we i gat gudhan long wok ya. Hem i mas savegud ol trutok blong Baebol mo hem i mas save lanwis blong ol studen. Hem i mas waes mo kaen long fasin blong toktok. Hem i mas “wan bigfala man” long saed blong speret. Hem nao i tekem nem blong yu olsem wan studen, i givimaot tok we yu mas mekem mo hem i givim advaes long kaen fasin blong halpem yu.
7. ?Wanem samting hem i save tingbaot taem hem i givimaot ol tok?
7 Man blong lukaot skul ya i gat lis blong ol man we oli joen long skul ya, blong hem i save givimaot tok long olgeta. Hem i givimaot ol pepa blong tok long ol studen tri wik bifo dei blong mekem tok. Olsemia nao yu save gat taem blong tingbaot mo mekemrere tok blong yu. Man blong lukaot long skul ya i luksave se insaed long kongregesen ol man oli no kasem sem edukesen, taswe hem i stap tingbaot samting ya taem hem i givimaot ol tok long ol studen. Hem i traehad blong skelemgud, hem i no givim tok long wan studen we i yangfala sipos tok ya i no stret long ol yangfala blong mekem. Hem i traehad blong givim sem jans long evri studen blong oli joen long program blong skul ya.
8. ?From wanem oli ringim bel taem ol studen oli bitim taem blong olgeta?
8 Skul ya i mas folem taem we i stap long program. Taswe sipos wan studen we i givim tok i bitim taem, man blong lukaot skul no wan narafala man we i givhan long hem bambae i ringim bel blong givim saen long hem. Studen ya i save finisim laen blong toktok we hem i stap talem mo hem i mas kamaot long platfom.
9-12. ?Olsem wanen man blong lukaot long skul i soemaot se hem i intres long olgeta we oli stap kamgud moa mo tu long olgeta we oli stap insaed long kongregesen?
9 Man blong lukaot skul i givim advaes long evri studen wanwan blong ful kongregesen i harem, from ol narafala man tu oli save kasem ol gudfala samting from. Oltaem hem i stap talem gudfala toktok blong leftemap tingting blong olgeta. Man blong givim advaes i wantem tumas blong leftemap tingting blong yu. Bambae hem i givim advaes stret long sam poen we oli stap long Pepa Blong Advaes, hemia sam poen we oli askem yu finis blong wok long olgeta. (Lukluk ol haf long Stadi 20.) Man blong lukaot long skul ya bambae i traehad blong savegud ol nid blong yu long saed blong fasin blong toktok, mo bambae hem i rili intres blong luk olsem wanem yu kamgud moa.
10 Mo tu hem i traehad blong mekem evri haf long skul ya i givhan long evriwan long kongregesen. Bambae hem i enkarajem yu blong joen fulwan long skul ya, blong givim ol ansa mo blong raetem ol ansa taem yumi kasem pepa blong tingtingbak. Sipos yu no putum nem blong yu long skul yet, bambae hem i enkarajem yu blong mekem olsem, bambae hem i givhan long yu long ol trabol we yu gat mo bambae hem i soemaot long yu olsem wanem yu tu yu save gat gudhan blong presem Jeova.
11 Man blong lukaot long Tiokratik Skul i save givhan long yu tu, olsem wan studen blong hem, sipos yu faenem i had blong mekemrere ol tok blong yu. Hem i save kam long haos blong yu sipos yu wantem. Sipos hem i no gat taem, bambae hem i askem sam brata we oli bigman long saed blong speret mo oli gat gudhan blong givim ol tok blong oli givhan long yu. Yufala ol papa mama tu, yufala i save givhan bigwan long hem, taem yufala i givhan long ol pikinini blong yufala. Yufala i no mas mekemrere tok blong olgeta, be yufala i save givim sam tingting mo soem sam rod blong oli save mekemrere prapa tok blong olgeta. Sipos yu stap trenem wan nyufala pablisa long wok blong prij, maet bambae oli askem yu blong givhan long hem blong mekemrere tok blong hem long skul ya.
12 Man blong lukaot long skul hem i stap lukaot long ples blong ol buk blong Tiokratik Skul we i stap long Haos Kingdom. Bambae hem i traehad blong soemaot long ol nyuwan olsem wanem blong oli yusum ol buk blong kasem save long Baebol. Hem i mas luk se i gat ol nyufala buk blong Sosaeti, mo tu ol narafala buk blong refrens, long ples blong ol buk, blong ol studen mo ol narafala man oli save yusum.
13-17. ?Olsem wanem ol man oli luksave fasin we ol studen oli stap kamgud moa from skul ya?
13 I halpem ol studen. Taem yu gat wan tok long skul ya, akseptem olsem we i kam long yu tru long ogenaesesen blong Jeova. Sem mak tingting blong yu i mas stap daon taem yu kasem advaes mo yu wok long hem. Ol advaes we yu kasem yu save wok long olgeta taem yu stap storeyan wetem ol man no taem yu prij. Taem yu traehad blong mekem ol samting we yu lanem long skul ya oli wok, bambae yu haremgud from.
14 Olgeta we oli stap kam mo oli joen oltaem long program blong skul ya, oli luksave se ol ansa we oli stap givim long ol miting oli kamgud moa, mo oli gat moa frut long wok blong prij. Skul ya i trenem ol brata blong oli mekemrere mo givim ol tok we oli save wekemap tingting blong ol man we oli stap lesin, taem oli mekem sam haf blong Miting Blong Kingdom Wok Blong Yumi no taem oli givim ol pablik tok. From trening we oli kasem long Tiokratik Skul, plante oli save givim gudfala tok long kot mo long fes blong ol haeman, mo sam narafala oli save givim tok long skul no long ol grup blong man.
15 Studen bambae i faenemaot tu, se sipos evri dei taem hem i storeyan hem i yusum ol advaes we hem i stap kasem long skul ya bambae kwiktaem hem i save winim ol slak fasin long toktok blong hem. Ol man long ples blong wok, no ol pikinini long skul no long narafala ples olsem, oli luksave trening ya we yumi ol Wetnes blong Jeova yumi stap kasem. Wan magasin we ol man oli savegud long hem i tokbaot samting ya i se: “Long sam manis nomo, ol nyufala Wetnes oli stadi Baebol moa i bitim stadi we plante Kristin oli mekem long ful laef blong olgeta. From samting ya, olgeta Wetnes oli kam gudfala man blong givim toktok.”
16 I gud yumi evriwan long kongregesen yumi putum ol mak we yumi mas kasem blong yumi luksave sipos yumi stap kamgud moa long wok blong prij. Ol mak olsem oli save soemaot sipos yu stap kamgud moa long Tiokratik Skul tu. Eksampel: ?Yu yu harem olsem se yu no naf blong visitim ol man we oli intres mo givim ansa long kwestin blong olgeta? Plante long ol tok mo ol pleplei we oli stap kamaot long skul ya oli blong givhan long yumi taem yumi fesem ol samting olsem.
17 Yumi no mas tingbaot skul ya olsem wan haoa skul nomo long wan wik sipos yumi wantem kasem bigfala blesing from. Be, sipos yu wan studen we yu stap tinghae long skul ya, bambae yu wantem gat program blong stadi long haos mo mekemrere ol haf blong skul ya, wetem Baebol riding mo sam narafala samting we yu mas save. Bambae yumi kasem moa save mo gat gudhan olsem ol minista blong Jeova sipos yumi stap mekemrere ol haf blong skul ya nating se yumi no givim tok evri wik.
18-20. ?Sipos yumi no gat gudhan blong mekem tok, from wanem yumi no mas letem samting ya i blokem yumi long skul ya?
18 Evriwan oli save givim beswan tok we oli save mekem, taem oli stap tingbaot risen blong skul ya. Hem i no blong soemaot se yumi gat gudhan blong givim tok. Mo tu hem i no blong faenemaot ol slak fasin mo ol trabol blong sam narafala man. Be, ol gudfala samting we yumi kasem long skul ya i dipen long tingting we i pusum yumi blong joen long hem. Jeova i yusum skul ya blong tijim ol man. Hem i stap tijim mo trenem yumi blong mekem samting we hem i wantem. Studen i no mas tingbaot gudnem we hem i save gat from tok blong hem, yumi no stap traem blong mekem ol man oli glad long yumi no yumi stap traem blong kasem ol mak blong man nomo taem yumi tij mo yumi givim toktok. Yumi wantem mekem God i haremgud long yumi mo yumi wantem blesing we bambae hem i givim long yumi long minista wok blong yumi.
19 I tru ya, sam brata mo sista maet oli gat tingting olsem Moses taem hem i talem long Jeova i se: “Mi mi no man blong mekem gudfala toktok, mo yu yu kam toktok wetem mi be fasin blong mi long saed ya i no jenis yet.” (Eks. 4:10) Be sipos yu bilif se i no gat wan samting we i hadwok long God blong mekem, bambae yu save winim tingting ya. (Mat. 19:26) Mo tu, taem yu luksave se fasin blong kamgud moa long toktok i blong talemaot tok blong laef, bambae yu traehad blong mekem olsem. Nating se yu stap kamgud smol nomo maet yu save soem rod blong laef long wan man mo bambae yu glad from.
20 Stampa tingting blong Tiokratik Skul i blong trenem ol man long minista wok. I gud yu kam haf blong ol hif man we oltaem oli stap kam long skul ya mo oli wantem kasem ol gudfala samting from. Mo biaen bambae yu luk ol blesing we Jeova i givim long yu from yu stap traehad blong kamgud moa.—Fil. 3:16.