Stadi 10
Fasin Blong Tijimgud Ol Man
1-3. ?Fasin blong tij i minim wanem, mo wanem ol jans we yumi gat blong tijim ol narafala man?
1 Olsem ol trufala Kristin yumi stap lukluk i go long Jeova God mo Jisas Kraes olsem ol Bigfala Tija blong yumi. Yumi joen long prea blong man ya blong raetem Ol Sam we i se: “Yu yu God blong mi, plis yu tijim mi blong mi mekem ol samting we yu yu wantem.” (Sam 143:10) Yumi gat sem tingting tu olsem ol disaepol blong Jisas long faswan handred yia we oli singaot Jisas se “Tija.” !Yes, Jisas i wan gudfala tija! Afta we hem i givim tok blong hem antap long Hil, “ol man oli sapraes long tok blong hem. From we tok blong hem i gat paoa, i no olsem tok blong ol tija blong Loa blong olgeta.” (Mat. 7:28, 29) Tufala ya oli Nambawan Tija, mo yumi mas mekem olsem tufala.
2 Man i mas lan blong hem i save gat gudhan blong tij. Fasin blong tijim man i min se yumi save eksplenem ol kwestin olsem se: ?Wanem? ?Olsem wanem? ?From wanem? ?Weples? mo ?Wetaem? samting i kamaot. Evri Kristin i mas traehad blong kamgud moa long fasin blong tijim man, from yumi tingbaot advaes blong Jisas long ol man blong hem i se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta.” (Mat. 28:19, 20) Yumi luk se wok ya i nidim man we i gat gudhan from tok blong aposol Pol long Timote, i se: “Mo yu mas mekem tingting blong yu i longfala blong tijimgud olgeta.”—2 Tim. 4:2.
3 I gat plante jans blong tijim ol narafala man. Ol papa mama oli mas tijim ol pikinini blong olgeta. Ol man blong talemaot gud nyus oli mas tijim ol nyuwan we oli intres long trutok taem oli stadi Baebol wetem olgeta. Samtaem i gat jans blong tijim ol nyufala pablisa. Mo plante brata oli gat jans blong givim ol tok blong tijim man, long miting blong Kingdom Wok Blong Yumi no pablik tok. Olgeta studen long Tiokratik Skul oli mas traehad blong soem se oli stap kamgud moa olsem ol tija. Taem yu tren blong tijim ol narafala man long wok blong prij, bambae yu faenemaot se yu haremgud mo kasem blesing from. I no gat narafala samting we i save mekem yu yu haremgud long hem bitim taem yu tijim wan man long Tok blong God mo taem yu luk se hem i stap gru long saed blong speret.
4, 5. ?Yumi mas trastem hu mo wanem samting yumi mas tingbaot taem yumi tijim ol narafala man?
4 Trastem Jeova. Wan impoten samting blong gat frut long wok blong yu olsem tija blong gud nyus se yu mas trastem Jeova, lesin long hem, trastem rod ya we bambae hem i soemaot long yu mo askem hem blong hem i givhan long yu. (Prov. 3:5, 6) Jisas tu i talem se, “Ol tok ya we mi stap tijim ol man hem, oli no blong mi nomo, oli kamaot long hemia we i sanem mi.” (Jon 7:16) Oltaem Jisas i yusum Tok blong God, long ol tok blong hem, hem i stap yusum Hibru haf blong Baebol. Taswe taem yumi tijim ol narafala man, yumi mas stanap long trutok blong God olsem Jisas i mekem. Faenem ol ansa blong yu long Baebol, from we hemia nomo i stampa buk blong tijim ol man blong oli kam disaepol blong Jisas.—2 Tim. 3:16.
5 Sipos yu rili trastem Jeova, bambae yu harem se yu yu naf blong mekem wok ya. God i lanem yumi long plan blong hem we i stap long trutok blong hem. Sipos yu talemaot ol trutok ya long ol narafala man, Jeova bambae i givhan long yu. I no blong talem se, “Mi mi no wan tija.” Yu yu save kam wan tija sipos yu trastem Jeova mo prea long hem.—2 Kor. 3:5.
6-8. ?Olsem wanem fasin blong mekemrere i save givhan blong tijim ol narafala man?
6 Mekemrere. Yu mas savegud tok blong yu. Yu mas kasem klia tok blong yu bifo yu save tijim ol narafala man. (Rom 2:21) Taem yu kasem moa save, bambae yu yu kam wan gudfala tija. Nating se yu save sam stampa trutok nomo, yu save kam wan tija yet. Tokbaot ol samting we yu save long ol narafala man. Ol yangfala pikinini oli save tijim trutok we oli lanem long papa mama blong olgeta, long ol fren blong olgeta long skul. Tiokratik Skul bambae i givhan long yu blong yu save gat gudhan blong tijim ol narafala man.
7 Sipos yu mekem Baebol stadi wetem wan man no yu givim wan tok, fastaem yu mas kasem klia long tingting blong yu ol poen we oli sapotem tok blong yu. Traem luksave from wanem wan samting i kamaot olsem. Traem luk sipos yu save putum ol tingting ya long prapa tok blong yu. Yu mas savegud ol pruf blong Baebol. Yu mas save olsem wanem blong mekem ol vas oli joen wetem tok blong yu.
8 Narafala samting blong mekemrere i blong tingbaot skul blong studen blong yu mo ol kwestin we maet oli save kamaot long tingting blong hem from. Samting ya bambae i givhan long yu blong mekemrere ol tok we oli stret long hem. Tingbaot ol samting we hem i kasem save long hem finis, samting ya bambae i givhan long yu blong givim nyufala save long hem mo yu save givhan long hem blong hem i gohed moa. Wan narafala studen maet hem i nidim wan samting we i defren from we fasin blong laef blong hem bifo i defren. Taswe fasin blong savegud studen blong yu i save givhan long yu blong mekemrere.
9. ?Olsem wanem yu save leftemap tingting blong ol studen blong ansa long prapa tok blong olgeta?
9 Ol kwestin. Ol kwestin oli impoten blong givhan blong karem frut long wok blong tijim ol man, olsem Jisas i stap mekem oltaem. (Luk 10:36) Taswe taem yu mekem wan Baebol stadi yu save folem fasin ya blong hem, yusum ol kwestin we oli stap long buk. Be sipos yu wan gudfala tija, bambae yu no save glad sipos studen blong yu i ridim ol ansa ya nomo we oli stap long buk. Taem olsem, yu mas askem ol narafala kwestin blong pulum tingting blong studen blong yu blong talemaot ansa long prapa tok blong hem. Samtaem yu save talem olsem ya nomo se: “?Ansa ya i stret, be olsem wanem yu save talem long prapa tok blong yu?”
10. Eksplenem olsem wanem blong yusum ol kwestin blong lidim man long ansa.
10 Taem yu stap tijim man, bambae yu faenem se ol kwestin blong lidim man blong faenem ansa oli gud. Hemia ol kwestin we i givhan long yu blong pulum tingting blong man, long ol samting we hem i save finis, blong kasem wan poen we hem i no save yet. (Mat. 17:25, 26; 22:41-46) I olsem we yu tingting se: ‘Mi save se studen ya i save samting ya mo hemia, taswe sipos mi askem sam kwestin olsem, hem i save kasem stret ansa. Be sipos mi mi no askem ol kwestin ya mo mi askem stampa kwestin wantaem, bambae hem i givim rong ansa.’ Hem i olsemia se, studen i save ol samting we oli save givhan long hem blong kasem stret ansa. Be hem i nidim man blong givhan long hem. Isi rod blong mekem, i blong talemaot ansa long hem. Be sipos yu yusum ol kwestin blong lidim hem, ansa i gud moa be i no from studen i talem ansa blong hem nomo, be from ol kwestin ya oli givhan long hem tu blong hem i save yusum tingting blong hem. Ol kwestin blong yu oli save lidim tingting blong hem blong kasem stret ansa. Samting ya bambae i givhan long hem biaen.
11. ?Olsem wanem ol kwestin blong faenem prapa tingting blong ol man i save kamaot?
11 Samtaem bambae yu save askem ol kwestin blong luk wanem tingting blong hem long sam samting. Ol kwestin ya oli blong faenemaot prapa bilif blong studen. Eksampel, maet yu save askem wanem loa blong God long saed blong fasin blong slip olbaot. Maet hem i save talem wan vas long Baebol blong soemaot se i rong blong slip olbaot. ?Be olsem wanem, studen i rili agri se fasin ya i rong? ?Hemia i prapa tingting blong hem? Maet yu wantem askem wan kwestin blong faenemaot tingting blong hem long saed blong fasin blong slip olbaot. Maet yu save askem se, “?From wanem yumi mas mekem olsem Baebol i talem?” Nao maet yu save luksave sam poen we hem i nidim blong yu save givhan long hem. Ol kwestin blong faenemaot tingting blong man oli save givhan long yu blong kasem hat blong studen blong yu.
12, 13. ?From wanem ol kwestin i save givhan taem yumi prij long ol haos wanwan mo taem yumi givim wan tok antap long platfom?
12 Ol kwestin oli save givhan tu long wok blong prij long ol haos wanwan. Eksampel, yu wantem faenemaot tingting blong man blong haos blong yu save givhan long hem blong save ol trutok blong Baebol. Mo tu yu askem ol kwestin blong hem i save ansa from we yu save finis se sipos hem i gat jans blong talemaot tingting blong hem, bambae hem i rere blong lesin long ol samting we bambae yu talem long hem.
13 Taem yu yu givim wan tok long platfom, samtaem yu save askem ol kwestin olsem we yu yu wantem ol man oli ansa long hem. Yu askem ol man we oli lesin blong oli ansa. Be tu samtaem yu save askem ol kwestin—we oli blong wekemap tingting blong ol man, mo i no blong oli ansa long yu. (Luk 12:49-51) Yu yu givim ansa. Samtaem maet yu wantem askem plante kwestin, yu no givim ansa blong olgeta gogo kasem laswan kwestin. Ol kwestin olsem oli dipen long ol man we oli stap lesin long yu mo wanem samting yu stap tijim olgeta long hem.
14, 15. ?From wanem i gud blong yusum ol pijatok mo blong talem bakegen ol tok?
14 Ol pijatok. Hemia impoten samting we Jisas i yusum blong tijim ol man. Sem mak, ol Kristin we oli stap tijim man tede oli save yusum ol samting we oli stap kamaot long laef blong ol man mo ol ekspiryens long laef blong olgeta olsem pijatok blong pulum tingting blong ol man we oli stap lesin long olgeta. (Mat. 13:34, 35) Traem mekem ol pijatok blong yu oli sot, oli no fasfas, olsem nao, i no hadwok blong kasem save long olgeta, mo oli no pulum tingting blong man i go long narafala samting. Leta we Jemes i raetem i gat plante pijatok long hem—olsem wef blong solwora, stia blong bot, smol aean long maot blong hos, wan glas blong lukluk fes, mo ol narafala samting olsem. Ol samting ya ol man oli stap yusum long taem ya. Wan tija we i wekapgud bambae i traem blong yusum ol pijatok we i stret long ol man we oli lesin long hem, hem i tingbaot ples we oli stap long hem, yia blong olgeta sipos oli yangfala no oli olfala, skul blong olgeta, kastom blong olgeta, mo ol narafala samting olsem. Yu save yusum ol pijatok taem yu mekem ol pablik tok, no taem yu stap tijim wan man.
15 Fasin blong talem bakegen. Rod ya i impoten blong karem frut long fasin blong tijim ol narafala man, nating se yu stanap long platfom no yu stap tijim wan man long haos blong hem. Tingbaot ol impoten tok, olsem ol vas long Baebol, mo mekem se studen blong yu i save tingbaot olgeta. Sipos yu mekem wan tok long Tiokratik Skul olsem we yu toktok wetem man blong haos, yu save askem ol kwestin blong tingtingbak, long rod ya yu makem ol impoten poen long tingting blong man taem yu talem bakegen. Mo tu yu save se studen i kasem tingting we yu wantem givim long hem. I olsem we yu stap askem kwestin we Jisas i askem se: “?Yufala i haremsave ol tok ya?”—Mat. 13:51.
16. ?Sipos wan man blong givim tok i wan gudfala tija, wanem samting yu save tingbaot afta we hem i givim tok blong hem?
16 Ol tok we i tijim man. Ating yu tingbaot sam tok we yu yu lanem plante samting from. Makemgud from wanem man we i givim tok ya hem i wan gudfala tija. Makem, wanem samting i mekem se i isi blong tingbaot tok blong ol man olsem. Oli no hareap taem oli toktok. Maet oli yusum ol kwestin, maet ol kwestin blong ol man we oli lesin oli save ansa long olgeta no ol kwestin we oli blong wekemap tingting blong ol man. Bambae oli askem yu blong faenem ol vas long Baebol mo oli pulum yu blong ridim, mo tingbaot, skelem olgeta mo makem ol impoten poen long olgeta. Sam man oli droem pija long blakbod no oli yusum ol narafala pija long buk. Long olgeta tok bambae yu makem se i isi blong tingbaot tok taem man we i givim tok i yusum sam poen nomo we i eksplenem gud, be i no isi blong tingbaot tok we hem i yusum plante poen we i no eksplenem gud. Taem tija hem i tijimgud ol man, olgeta we oli lesin long tok ya oli save talem stampa tok blong tok blong hem, ol bigfala poen long tok blong hem mo wan no tu impoten vas long Baebol we hem i yusum.
17, 18. ?Olsem wanem mo from wanem yumi mas pulum tingting blong ol man long ol Bigfala Tija?
17 Pulum tingting blong ol man long tu Bigfala Tija. Olsem wan Kristin tija, oltaem yu mas tingbaot se i impoten blong pulum tingting blong ol man i go long Jeova God olsem Stampa blong laef mo long Jisas Kraes olsem rod ya we God i yusum blong givim laef mo blesing long ol man. (Jon 17:3) Traehad blong pulum ol man blong oli gat fasin tangkyu long tu Bigfala Tija ya.
18 Taem yu stap tijimgud ol man bambae yu luksave tu, lav we i stap taem yu tijim ol man. Sipos wan studen i rili laekem Jeova God, bambae hem i mekem wok blong hem. Taswe, long taem blong stadi, jusum stret taem blong pulum tingting blong hem long impoten samting we God i mekem finis mo samting we hem i stap mekem blong givhan long ol man we oli gat sin. Makem ol fasin ya blong God, waes fasin, stret fasin, lav mo paoa, ol fasin ya we oltaem oli nambawan mo oli save givhan long ol man we oli gat fasin obei. Sipos hat blong wan studen i gud, samtaem biaen bambae hem i wantem stap tru long Jeova mo bambae hem i wantem talemaot nem blong hem.