Kasem Hat Blong Baebol Studen Blong Yu
1 ?Yu yu wantem se Baebol studen blong yu i mekem ol samting we i stap lanem i wok? Hem i mas mekem olsem sipos hem i wantem se save we hem i stap kasem bambae i givhan long hem. Blong pulum Baebol studen blong yu blong wok, yu mas kasem hat blong hem. Long Pentekos blong 33 K.T., tok blong aposol Pita we i wekemap tingting blong ol man ‘i stikim hat’ blong samting olsem 3,000 man, we oli “bilif long tok ya” mo oli baptaes long dei ya. (Ol Wok 2:37, 41) ?Olsem wanem yu save kasem hat blong Baebol studen blong yu?
2 Reregud Fulwan: Yu no mas traem blong kavremap plante haf mekem se i no moa gat taem blong storeyan wetem studen blong mekem hem i tingtinggud long save ya. Makem samtaem bifo ol poen we bambae yu tokbaot, yu mekem save long ol vas mo yu save eksplenemgud olgeta bifo yu mekem stadi wetem hem. Tingbaot sam kwestin we studen i save gat long tingting blong hem from kaen laef we hem i stap long hem bifo. Sipos yu savegud studen blong yu, save ya bambae i halpem yu blong rere long ol save we oli stret long hem.
3 Folem Fasin Blong Jisas Blong Tij: Jisas i yusum ol pija tok blong mekem ol poen we oli strong oli kam isi mo blong givhan long ol studen blong hem blong oli kasem save mo gat filing long wan samting we hem i stap tokbaot. (Luk 10:29-37) Sem mak, yu save putum ol gudfala tijing long hat blong Baebol studen blong yu taem yu mekem ol pija tok blong yu oli isi, yusum ol samting long laef we ol man oli savegud long olgeta, mo mekem oli laenap stret long samting we i stap kamaot long laef blong studen.
4 Ol kwestin oli givhan bigwan blong kasem hat blong ol Baebol studen, olsem Jisas i bin soemaot plante taem. (Luk 10:36) Be yu no mas talem se i gud sipos studen i jes ridim ansa long buk nomo. Yusum ol kwestin we oli lidim tingting blong hem i kasem wan stret ansa we maet hem i no bin tingbaot bifo. Rod ya i halpem studen tu blong kamgud moa long fasin blong yusum tingting blong hem. Askem ol kwestin we man i mas talemaot prapa tingting blong hem blong faenemaot wanem nao bilif blong hem long bisnes ya. Nao maet yu save luksave sam ples we hem i nidim help long hem, mo yu save plan blong givhan moa long hem long stret poen ya.
5 Sipos wan Baebol studen i no stap gohed, i nidim blong yu faenemaot risen blong samting ya. Maet samting ya i minim se yu mas mekem visit long wan narafala taem, antap long stret dei blong stadi. ?From wanem hem i fraet blong mekem samting? ?I gat sam poen long Baebol we hem i no kasem savegud long olgeta? ?Hem i slou blong mekem sam jenis long fasin blong laef blong hem? Sipos wan Baebol studen i ‘gat tu tingting,’ givhan long hem blong luksave trabol we i save kamaot sipos hem i mekem olsem.—1 King 18:21.
6 Aposol Pol i luksave se wok blong tijim ol tru tok blong Baebol long ol man we oli intres i save sevem laef blong olgeta, mo taswe hem i givim advaes long ol Kristin blong ‘lukaotgud long fasin blong olgeta blong tij.’ (1 Tim. 4:16) Olgeta we yu stap mekem Baebol stadi wetem olgeta oli mas kasem moa bitim sam pruf nomo long saed blong Baebol mo ol samting we oli stap kamaot long wol. Oli mas kasem stret save long saed blong Jeova mo Jisas mo mas kasem help blong wokem wan gudfala fasin fren wetem tufala. Long rod ya nomo ol man we oli intres bambae oli wantem blong soem bilif blong olgeta from ol wok blong olgeta. (Jem. 2:17, 21, 22) Taem yu kasem hat blong studen, samting ya bambae i pusum hem blong folem rod we i givim ona long Jeova mo sevem laef blong hem.—Prov. 2:20-22.