Stadi 20
Advaes We i Leftemap Tingting
1, 2. ?From wanem yumi wantem man i givim advaes long yumi, mo olsem wanem yumi save kasem?
1 Ol man blong wosip long trufala God oltaem oli rere blong askem hem blong i lidim olgeta long ol samting we oli stap mekem. Wan long ol man blong raetem Ol Sam long Baebol i talemaot stret se: “Yu yu stap lidim mi long ol toktok blong yu.” (Sam 73:24) Mo Jeremaea i yusum ol tok ya long prea blong hem, i se: “Olgeta samting ya oli no bigfala tumas long yu, . . . hem i trufala God, Hem i bigfala, Hem i gat bigfala paoa, Jeova blong ol ami hemia nem blong hem, advaes blong hem i bigwan mo hem i gat paoa long ol wok blong hem.”—Jer. 32:17-19.
2 Tede, Jeova i stap givim advaes long ol Kristin man we oli stap wosip long hem. Ol advaes blong hem oli kamaot long Tok blong hem mo long ogenaesesen blong ol trufala man blong hem. Taswe olgeta we oli givim nem blong olgeta long Tiokratik Skul oli luksave kwiktaem se advaes ya we oli stap kasem mo fasin blong givim advaes ya i folem ol gudfala rul blong Baebol.
3-5. Eksplenem olsem wanem blong yusum tugeta Pepa Blong Givim Advaes mo ol haf we oli stap long Stadi 21 go kasem 37.
3 Advaes blong kamgud moa. I gat Pepa Blong Givim Advaes we i blong givhan long ol studen mo elda we i lukaot long skul. Oli makem tatesikis poen we bambae oli givhan long ol studen blong oli save gat gudhan blong talemaot trutok long fasin we i karem frut. Bambae yu faenem gudfala save long evri poen long ol stadi ya 21 go kasem 37 insaed long buk ya, oli putum namba blong ol stadi ya long Pepa Blong Givim Advaes. Ol stadi ya oli blong yusum wetem Pepa ya blong Givim Advaes. Plante taem wan stadi i tokbaot tu no tri fasin blong toktok, olsemia nao ol studen oli save wok long ol poen ya wantaem.
4 I gud ol nyuwan we oli givim nem blong olgeta long skul ya, oli mas mekemrere gud tok blong olgeta. Oli mas tingbaot ol poen we oli stap long Pepa Blong Givim Advaes. Ol studen we oli mekem faswan tok blong olgeta long Tiokratik Skul, elda we i lukaot long skul ya (no narafala man blong givim advaes, sipos i gat plante studen) bambae i leftemap tingting blong studen long ol poen ya nomo we hem i wokgud long olgeta. Biaen man blong givim advaes i save gohed blong tokbaot poen we studen i mas gudmoa long hem, mo hem i save mekem studen i wok long sem poen ya long nekis tok blong hem. Man blong givin advaes bambae i talem long studen wetaem hem i rere blong go long ol narafala poen long pepa blong givim advaes.
5 Sam studen oli gohed kwiktaem, sam narafala maet oli mas wok long wanwan poen i bitim we oli wok long evri poen we wan ful stadi i tokbaot. Maet sam studen oli save mekem plante tok taem oli stap wok long wan poen we i strong long olgeta, blong oli save winim fasin ya blong toktok bifo we oli wok long narafala poen.
6, 7. ?Elda we i lukaot skul bambae i givim advaes long wanem poen?
6 Advaes we i kamaot afta long evri tok we studen i mekem, hem i mas kaen, mo i blong givhan long studen blong stap kamgud moa long fasin blong toktok blong hem. Sipos i gat nid blong givim advaes long man we i givim tok namba wan no ol poen blong Baebol ridim, elda we i lukaot long skul i save mekem afta long skul, be i no long fes blong evriwan. Oli mekem olsem sipos man ya we i givim tok i bitim taem we hem i mas finis long hem. Man we i givim tok namba wan no ol poen long Baebol riding i mas traehad blong givim gudfala eksampel long evri samting, mo maet hem i no save nidim advaes from.
7 Advaes i stanap nomo long ol poen we studen i bin kasem advaes finis blong wok long hem bakegen. Tru, sipos studen i wokgud long sam narafala poen long tok ya blong hem, maet man we i givim advaes i save talem blong leftemap tingting blong hem. Be bambae hem i no save makem poen ya long Pepa Blong Givim Advaes. Ol mak we bambae oli yusum, oli olsemia: “W” (Wok long poen ya) sipos i stret blong wok moa long wan fasin blong toktok, “M” (i kam Moa gud) sipos wan studen i bin wok long wan poen wan taem finis mo i soem se hem i stap kamgud moa be maet i gud hem i wok long hem bakegen, “G” (Gud) sipos studen i soemgud fasin blong toktok we hem i wok long hem, long nekis tok blong hem long skul, hem i save go long wan narafala stadi we i tokbaot ol narafala fasin blong toktok. Taem wan studen i mekem wan Baebol riding, man blong givim advaes bambae i givim ol poen blong advaes we i stret long wan tok olsem.
8-10. ?Taem elda we i lukaot long skul i putum mak long Pepa Blong Givim Advaes, wanem samting hem i mas tingbaot blong hem i save leftemap tingting blong studen blong gohed gud?
8 Elda we i lukaot long skul i mas yusum fasin luksave blong givim gudfala advaes. Sipos wan we i givim tok hem i nyuwan long skul, i gud moa blong leftemap tingting blong olgeta. Ol narafala studen, we oli stap longtaem long skul ya, maet oli stap traehad blong mekemrere tok blong olgeta, oli stap tingbaot ol poen we oli mas wok long hem, be maet oli no skulgud. From samting ya, sipos i klia se studen i mekem fasin blong toktok we hem i wok long hem stret long mak we hem i naf blong mekem, maet elda we i lukaot long skul i save makem “G” long Pepa Blong Givim Advaes mo letem studen i go long narafala poen we hem i mas wok long hem.
9 Be nao, maet wan narafala studen i gat plante ekspiryens no hem i gat gudhan long fasin blong toktok, be maet from hem i bisi long narafala wok, hem i no tekem taem blong stadi long poen we hem i mas wok long hem mo from samting ya maet hem i no mekemgud olsem we hem i naf blong mekem. Olsemia nao, sipos elda we i lukaot long skul i makem “G” long Pepa Blong Givim Advaes mo talem long hem blong go long narafala poen, samting ya bambae i spolem studen blong hem i kamgud moa. Sipos studen i save soemaot klia long tok blong hem poen we hem i stap wok long hem, be sipos hem i no mekem, bambae man we i givim advaes i makem “W” (Wok long poen ya). Mo long kaen fasin hem i save givhan long studen blong kamgud moa. Samting ya bambae i leftemap tingting blong ol studen blong oli mekem tok, i no from we oli mas mekem nomo, be i wan mak blong soem se oli stap kamgud moa olsem ol man blong givim tok.
10 Tingbaot se trening blong toktok i stap kamgud moa sloslou. Yu no mas ting se yu save kam gudfala man blong givim tok kwiktaem nomo. Hem i wan samting we i stap kamgud moa, be man i save kamgud moa kwiktaem sipos hem i rili traehad. Sipos yu save tingting dip long ol advaes we oli kamaot long trening program ya blong toktok mo yu stap mekemrere gud ol tok blong yu, i no longtaem bambae ol man oli luksave se yu stap gohed moa.—1 Tim. 4:15.
11-16. ?Wanem samting man blong givim advaes i mas traehad blong folem blong mekem se advaes blong hem i leftemap tingting blong narafala man?
11 Man blong givim advaes. Evri wik elda we i lukaot skul i mas stadigud ol tok we ol studen bambae oli mekem blong hem i luksave sipos oli mekemgud haf we oli wok long hem mo i save stretem ol samting we oli no stret. Hem i no mas talem olgeta smosmol mastik blong man, sipos no bambae hem i no save glad long ol tok from we hem i bitim mak blong skelem fasin we man i givim tok long hem. Hem tu i mas kasem ol gudfala samting long ol gudfala trutok we man i talem.
12 Blong givim advaes oltaem hem i stat wetem tok blong leftemap tingting blong studen from fasin traehad we studen ya i mekem. Biaen hem i toktok long saed blong ol poen long Pepa Blong Givim Advaes we studen ya i wok long hem. Sipos studen i mas wok bakegen long poen ya, elda we i lukaot skul i mas talemaot olsem wanem studen ya i save kamgud moa long fasin ya blong toktok, hem i no mas talemaot ol slak fasin blong studen nomo. Nao advaes ya bambae i leftemap tingting blong man we i givim tok mo ol narafala man we oli stap lesin.
13 I no naf blong talem nomo long wan studen se hem i mekem gudfala tok no hem i mas wok bakegen long wan fasin blong toktok. Sipos man blong givim advaes i eksplenem from wanem tok i gud no from wanem studen i mas wok moa long poen ya bakegen mo hem i eksplenem olsem wanem blong kamgud moa, samting ya bambae i givhan moa long evriwan we oli stap. Mo tu, i gud hem i makem ol bigfala risen from wanem fasin blong toktok we studen i wok long hem, i impoten long wok blong prij no ol miting blong kongregesen. Samting ya bambae i pulum tingting blong olgeta long kongregesen oli luksave poen ya mo bambae i leftemap tingting blong studen blong gohed blong wok long poen ya.
14 Man blong givim advaes i no mas mekem tingtingbak long tok blong studen. Tok blong hem i mas sot nomo mo hem i mas givim advaes stret long poen, hem i mas lukaotgud se hem tekem tu menet nomo long evri tok we ol studen oli mekem. Long rod ya, bambae advaes mo tok blong hem i klia from we hem i no toktok tumas. Mo tu, i gud blong talem long studen, ol namba blong pej long buk ya blong hem i save faenem sam moa poen long fasin blong toktok we hem i stap wok long hem.
15 Man blong givim advaes i no stap lukaotem ol smosmol mastik olsem fasin blong talem ol tok no rul blong talem tok. Be hem i mas tingbaot fasin we studen i mekem tok blong hem. ?Tok blong hem i gud mo i tijim man, no no gat? ?Tok i folem wan plan mo i isi blong haremsave, no no gat? ?Fasin blong givim tok i stret mo i pulum tingting blong man, no no gat? ?Fes, mo fasin blong yusum bodi blong toktok i soem se hem i bilivim tok blong hem mo hem i wantem moa blong talemaot ol gudfala trutok long ol man no hem i wantem ol man oli sapraes long hem? Sipos hem i wokgud long ol impoten samting ya, bambae ol man we oli lesin oli no save tingbaot sam smosmol mastik blong talemgud ol tok mo folem rul blong toktok.
16 Oltaem long Tiokratik Skul yu mas givim advaes long fasin kaen, mo i blong givhan long narafala man. Yu mas gat intres blong wantem tumas givhan long ol studen. Tingbaot fasin blong man we bambae yu givim advaes long hem. ?Hem i man we i save harem nogud kwik? ?Hem i skulgud no no gat? ?I gat ol risen we i mekem se hem i gat sam slak fasin blong hem? Yu mas givim advaes blong mekem man i harem olsem we yu stap givhan long hem, be yu no agensem hem. Mekem se hem i luksave advaes ya mo from wanem advaes i olsem.
17-19. ?Blong kamgud moa long evri tok, studen i mas mekem wanem bifo we hem i rere long evri tok blong hem mo afta we hem i givim tok blong hem?
17 Blesing from advaes. Taem yu gat wan tok long Tiokratik Skul, tingbaot se risen blong givim tok i no blong talemaot save nomo long kongregesen, be hem i blong kamgud moa long fasin blong toktok blong yu tu. Blong kamgud long samting ya, i impoten blong tekem taem blong stadi long ol fasin blong tok we bambae yu wok long hem. Ridimgud Stadi we i tokbaot poen we yu wok long hem insaed long buk ya, blong save olsem wanem blong mekem i rere mo yusum poen ya taem yu mekem tok blong yu. Blong givhan long yu, insaed long buk ya, evri impoten haf blong ol fasin blong toktok oli raetem long ol bigfala leta. Hemia ol bigfala poen blong tingbaot.
18 Afta we yu givim tok blong yu, lesingud long advaes we man i talem. Akseptem wetem fasin tangkyu. Nao wok long ol poen we yu mas kamgud moa long olgeta. Sipos yu wantem gohed gud kwiktaem, yu no mas wet gogo kasem we yu gat narafala tok. Stadi long haf blong buk ya we i tokbaot ol poen we yu mas wok long hem bakegen. Traem yusum ol advaes ya long ol toktok blong yu evri dei. Mo taem stret taem i kam blong givim tok blong yu nekis taem bambae yu winim ol fasin ya.
19 Evri studen oli mas traem kamgud moa long evri tok we oli givim long skul ya. Tru ya, hemia i minim se oli mas traehad oltaem, be bambae oli kasem blesing blong Jeova. Long olgeta we bambae oli kasem ol bigfala blesing long trening we i kamaot long Tiokratik Skul, hemia olgeta we tok blong Proveb 19:20, i tokbaot olgeta i se: “Lesin long advaes, mo letem [narafala] i stretem yu, blong yu save kam waes long fyuja blong yu.”