Stadi 21

Tok i Tijim Man, i Kliagud

1-3. ?From wanem ol poen long tok oli mas klia blong hem i save tijim man?

¹ Ol gudfala tok i kamaot from fasin blong mekemrere oltaem, mo samting ya i tekem taem mo i nidim fasin traehad. !Mo i givim gudfala frut! Taem yu mekem olsem yu kasem moa save mo yu save talemaot samting we i rili givhan long ol man we oli lesin long yu. Yu yu no kavremap ol poen long tok, be yu gat ol smosmol poen we oli klia blong talemaot, mo yu save se samting we bambae yu talem hem i stret. Samting ya i leftemap tingting blong ol man we oli lesin blong oli gat fasin tangkyu long Tok blong God, mo oli save ona long Jeova. Blong givim tok we i tijim man yumi mas tingbaot samting we yumi talem long tok blong yumi. Tekem smol taem blong tingbaot ol defren haf blong bisnes ya. Hemia faswan poen we i stap long pepa blong givim advaes.

² Ol poen long tok oli klia. Wan tok we i no soemaot klia ol poen, hem i no hevi mo i no gat paoa. Hem i no klia. Ol man we oli lesin oli no kasem klia long tingting blong olgeta. Sipos ol man oli mas tingbaot ol save ya tok i mas stret long poen. Hemia i soem se man i bin stadi dip mo hem i save samting we hem i tokbaot.

³ Yu save kasem samting ya taem yu stap mekemrere tok blong yu sipos yu askem yu wan se, ?From wanem? ?Wetaem? ?Weples? mo sam samting olsem. I no naf blong talem se wan samting i hapen. Talemaot ples, dei, mo maet risen from wanem samting ya i hapen. I no naf blong talem sam tok we i tru. Soemaot from wanem oli tru; from wanem i impoten blong save. Sipos yu givim tok we i tijim ol man blong mekem wan samting, eksplenem olsem wanem blong mekem samting ya. Blong save hamas klia poen yu nidim long tok blong yu, yu mas save sipos ol man we oli lesin oli bin save finis plante samting long saed blong tok ya. Taswe yu mas tingbaot ol man we oli stap lesin blong faenemaot ol poen we yu mas talem.

4-6. ?Blong tok i tijim man we i lesin long yu, wanem poen yu mas tingbaot?

⁴ Tok i tijim ol man. Tok we wan grup blong ol man we oli stap lesin oli lanem samting from, maet ol narafala oli no lanem wan nyufala samting long hem, no maet oli no kasem wan samting nating. I klia se tok i mas stret long ol man we oli stap lesin. Eksampel, long wan tok we i blong tijim yumi blong mekemgud wok blong prij, long Miting blong Kingdom Wok blong yumi tok ya bambae i defren olgeta long tok we yumi talem long wan man we i rere blong givim laef blong hem long Jeova, no taem yumi toktok wetem ol man blong wol.

⁵ Yumi mas tingbaot ol samting ya taem yumi mekem ol defren tok long Tiokratik Skul. Tok we yumi mekem, yumi mas tingbaot wanem kaen grup blong ol man oli stap lesin, plan blong tok, mo from wanem yumi mekem tok ya. Ol samting ya bambae oli dipen long wanem kaen tok mo wanem plan man we i givim tok i wantem folem. I tru, faswan tok i go long kongregesen. Be ol narafala tok oli defren, plan blong tok bambae i soemaot wanem kaen grup blong man yu stap tok long olgeta mo from wanem yu givim tok ya long olgeta. Olsemia nao studen mo man blong givim advaes tufala i save askem tufala wanwan se, ?Tok ya i stret long ol man we oli lesin? ?Bambae tok ya i givim save mo i tijim ol man we oli lesin?

⁶ Taem yu stap mekemrere tok blong yu, askem yu wan se, ?Tok ya bambae i givhan olsem wanem long ol man? ?Samting we mi wantem talem, man ya no ol man ya oli save finis? ?Wanem stampa tingting mi mas talem bifo we mi mekem ol poen ya oli kam klia? ?Olsem wanem bambae mi jenisim tok ya blong i stret long ol man we oli defren olgeta? Oltaem fasin blong skelem olsem i mekem tingting blong yumi i kam klia moa. Traem ol defren rod blong toktok long ol defren grup blong ol man taem yu stap mekemrere tok blong yu, jes blong haremsave nomo olsem wanem tok ya i jenis taem yu tingbaot ol man we oli lesin long yu, mo taem yu mekem tok i tijim ol man we bambae oli stap lesin long yu.

7, 8. ?Olsem wanem blong mekem tok i tijim man blong hem i mekem save we hem i lanem i wok?

⁷ Tok i stret long man. I gat plante samting blong lanem, be i no olgeta save we ol man oli save yusum. Long saed blong yumi, tok we i tijim man hemia ol tok we i stret long ol samting we yumi nidim long saed blong Kristin laef blong yumi, mo long minista wok blong yumi. Yumi wantem save olsem wanem blong yusum ol save we yumi kasem.

⁸ Taem studen i stap mekemrere tok blong hem mo taem elda we i lukaot long skul i givim advaes, i gud tufala i stap tingbaot poen ya mo askem se: ?Wanem ol rul oli stap long tok ya? ?Tok ya i save givhan blong mekem ol disisin? ?Tok ya i stret long wok blong prij? ?Tok ya i leftemap Tok blong God mo i soem plan blong hem? Sam tok nomo oli givim ol save ya, be blong mekem tok i stret long man, ol man we oli lesin oli mas luksave olsem wanem blong mekem tok blong yu i wok long laef blong olgeta.

9-11. ?From wanem i impoten blong talem ol tok we oli tru?

⁹ Tok i tru. Ol Wetnes blong Jeova oli man blong trutok. Yumi wantem talem trutok mo oltaem yumi mas talem ol samting we oli tru. Yumi mas mekem olsem long saed blong bilif mo tu long ol tok blong yumi. Ol tok long saed blong ol narafala man no taem yumi tokbaot olgeta, mo tu ol samting long saed blong sayens no ol nyus, oli mas tru.

¹⁰ Ol man we oli harem ol tok we oli no tru bambae oli save talemaot bakegen mo store ya i save kam bigwan moa. Sipos ol man we oli stap lesin oli save se sam tok blong man we i givim tok i no stret, maet oli no save bilif long trutok we hem i stap talem. Sipos wan man we i jes intres long trutok i harem ol tok olsem, mo long wan narafala taem hem i harem wan tingting we i defren, maet hem i save ting se ol Wetnes blong Jeova oli seraot long tingting blong olgeta mo hem i save stop blong joen wetem olgeta mo maet i no talem from wanem hem i mekem olsem.

¹¹ Man blong givim advaes i no mas jekem olgeta smosmol haf blong tok we studen i talem, sipos studen ya i nyuwan long trutok mo hem i no kasem ful save yet long ol dip samting long Tok blong God. Be, hem i save givhan blong mekem studen i tingtinggud mo soemaot olsem wanem hem i save kamgud moa long fasin ya blong talemaot tok we i tru sipos hem i stap mekemrere gud fastaem.

12, 13. ?From wanem i gud blong ademap sam samting blong mekem tok i klia moa?

¹² Ol narafala samting blong mekem tok i klia moa. Ol tingting we man i talem from we hem i tingting dip no hem i kasem from dip stadi, oli mekem wan tok i gud mo samtaem i mekem se man i no talem bakegen ol tok we ol man oli savegud finis. Hem i ademap nyufala save long tok, hem i wekemap intres blong ol man we oli lesin, mo hem i save mekem ol man oli glad long wan tok we oli savegud finis. Mo tu, hem i mekem man we i givim tok i no fraet. Hem i mekem tok blong hem long fasin we i laef from hem i save se tok blong hem i defren lelebet.

¹³ Wan denja we man i no mas mekem hemia fasin blong talem mining blong tok we i kamaot long prapa tingting blong hem wan. I gud blong yusum ol buk blong Sosaeti. Jekem ol indeks blong Sosaeti mo ol futnot long Baebol. Mekem sua se samting we yu talem hem i klia, mo hem i no givim rong mining.

14-16. ?Wanem samting yu mas mekem taem yu stap mekemrere tok blong talem long fasin we i isi blong haremsave?

¹⁴ Taem yu mekemrere tok blong yu i impoten tu blong tingbaot olsem wanem blong talem tok we yu mas talem. Hemia nao samting we Pepa Blong Advaes i tokbaot se i “Kliagud, Isi Blong Haremsave.” Sipos yu no tingtinggud long samting ya, yu no save kasem ol man we oli stap lesin long yu no oli no save tingbaot ol samting we oli harem. I gat tri rul blong tingbaot long saed blong samting ya.

¹⁵ Tok i isi. Samting ya i no min se yu mas tingbaot ol fultoktok fastaem. No gat, be yu mas tingtinggud long ol save we yu wantem talem mo yu mas tingbaot ol poen long hem. Samting ya bambae i mekem se tok i sot mo i isi blong haremsave, man i yusum ol tok we oli isi blong kasem save. Wan samting we i fasfas long tingting blong man we i givim tok bambae i fasfas taem hem i talemaot tu.

¹⁶ I nogud blong stap mekemrere tok long las menet nomo. Man we i givim tok i mas stap tingbaot olgeta poen long tok blong hem gogo oli kam isi mo i klia long tingting blong hem. Sipos hem i tingtingbak long ol poen taem hem i stap mekemrere blong givim tok bambae oli stap klia long tingting, blong hem i yusum mo bambae ol poen ya oli klia long ol man we oli stap lesin olsem we ol poen ya oli klia long hem.

17, 18. ?From wanem yumi mas eksplenem ol tok we ol man oli no savegud long olgeta?

¹⁷ Eksplenem ol tok we ol man oli no save. From stadi we yumi mekem long Baebol mo ol buk blong Watch Tower Sosaeti yumi kasem sam tok we ol man afsaed oli no kasem save long olgeta. Sipos yumi yusum ol tok ya blong eksplenem trutok blong Baebol long sam man we oli stap lesin long yumi, maet oli no save kasem save bighaf blong tok blong yumi mo tok blong yumi bambae i olsem nating nomo long olgeta.

¹⁸ Tingbaot ol man we oli lesin long yu. ?Save blong olgeta i kasem wanem mak? ?Oli save plante samting long wok blong yumi? ?Bambae oli save plante long ol tok ya we man blong givim tok i yusum, no no gat? Ol tok olsem “tiokratik,” “smol kampani,” “narafala sipsip” mo “Amageden” mo “Kingdom” oli save givim defren mining long man we i stap lesin no hem i no gat mining nating. Mo tu ol tok olsem “sol” “hel” mo “laef we i no save finis” oli mas klia sipos man we i lesin i no savegud wok blong yumi. Be sipos man i givim tok long kongregesen, i no nid blong eksplenem ol tok ya. Taswe yumi mas tingbaot ples we yumi givim tok long hem.

19, 20. ?Wanem samting yumi mas mekem blong yumi no putum tumas poen long tok blong yumi?

¹⁹ No talem tumas poen. Maet i save gat tumas poen long wan tok mekem se ol man we oli lesin oli no save tingbaot evriwan mo save i no kliagud no maet oli no kasem save nating long tok ya. Blong ol man oli kasem save risen long tok blong yu, yu no tekem tumas poen i bitim we yu naf blong eksplenem klia long taem we yu gat blong givim tok ya. Yu no mas talem plante samting tumas i bitim we ol man oli stap lesin oli naf blong tingbaot. Mo tu, samting we yu talem long wan strenja no wan man we i jes intres long trutok i mas isi moa, i no sem mak sipos yu talem sem samting long kongregesen. Long saed ya, man blong givim advaes i mas tingbaot wanem kaen grup blong man oli stap lesin long hem ya we i givim tok.

²⁰ ?Bambae studen i save olsem wanem blong tekem inaf poen long tok blong hem? Fasin blong skelem bambae i gud taem hem i stap mekemrere tok blong hem. Skelemgud wanem samting yu mas talem. ?Hamas poen ol man we oli lesin oli save finis no oli save smol long hem? ?Hamas poen we oli no save yet? Sipos ol man oli kasem plante stampa save finis, yu save yusum save ya blong talem plante samting long taem we oli givim long yu. Be sipos ol man oli no save samting we yu wantem tokbaot, nao yu mas lukaotgud long saed blong hamas poen yu wantem talem mo bambae i tekem longtaem olsem wanem blong talem ol poen ya blong ol man we oli lesin oli kasem save long hem.