Stadi 22

Ol Fastok We Oli Wekemap Tingting

1-3. ?Long fastok blong wan tok, olsem wanem yu save pulum intres blong ol man long tok blong yu?

¹ Tok i wekemap intres. Fastok i mas wekemap intres blong man long wan tok. Fastok i mas pulum tingting blong ol man we oli lesin long yu mo oli rere blong lesingud long samting we bambae i kamaot biaen. Blong mekem samting ya, yu mas soem ol gudfala samting long tok blong yu long ol man we oli lesin.

² Wan long ol gudfala rod blong wekemap intres blong man long tok, i blong pulum ol man we oli lesin blong oli joen long toktok blong yu. Pulum olgeta blong oli luksave se tok blong yu i impoten tumas long laef blong olgeta. Blong mekem olsem yu mas stat long ol samting we oli stret long ol man we oli stap lesin long yu. Hemia i min se ol man we oli lesin long yu oli naf blong kasem save long samting we yu talem. Maet hem i wan pijatok no wan trabol, no sam kwestin we oli folfolem olgeta. Be oltaem hem i mas samting we bambae i isi blong oli tingbaot blong kasem save long hem mo mekem i wok long laef blong olgeta.

³ Samtaem long fastok blong yumi, yumi mas tingbaot se maet ol man we oli stap lesin long yumi oli gat prapa tingting we i agensem samting we yumi wantem tokbaot, mo yumi mas traem winim fasin ya. Samting ya i tru moa sipos yu tokbaot samting we ol man oli gat defren tingting long hem. Olsemia nao fastok blong yu i impoten tumas, sipos yu wantem holem tingting blong ol man we oli stap lesin long yu i stap kwaet go kasem we yu talemaot olgeta poen blong pruvum tok blong yu. Long wok blong prij long ol haos wanwan, samtaem yu save blokem tok we man i wantem talem blong blokem yu sipos yu talemaot tingting blong hem fastaem mo biaen yu save gohed blong talem tok we yu wantem talem.

4-6. ?Wanem ol narafala samting we bambae oli givhan long yumi blong mekem ol fastok we oli pulum intres?

⁴ Oltaem samting we yu talem hem i impoten tumas. Be blong wekemap intres long fastok blong yu, fasin blong talem hem i impoten moa bitim ol narafala haf blong tok blong yu. From samting ya yu mas tingrere long tok we bambae yu talem mo tu yu mas tingrere long fasin blong talem.

⁵ Oltaem, ol fultoktok we oli sot mo oli isi oli stret long fastok. From we fasin blong jusum stret tok i impoten tumas blong mekem fastok we i sot, maet i gud blong mekemrere gud faswan tu no tri fultoktok. Raetemdaon olgeta long wan pis pepa blong yu save ridim, no yu save tingbaot, blong mekem se ol fas toktok blong yu oli givim samting we yu wantem. Mo tu, samting ya bambae i mekem se yu no fraet long stat blong tok blong yu mo yu save toktok we yu no lukluk long pepa.

⁶ I gat sam samting bakegen long saed blong fasin blong givim fastok, nating se man blong givim advaes long yu bambae i no wari tumas long ol poen ya olsem haf blong tok blong yu. Sipos yu fraet lelebet, traem toktok long wan voes we i dip mo i slou. Toktok wetem bilif be yu no mas tokflas. Ol tok olsem maet oli mekem ol man oli no wantem harem tok blong yu.

7. ?Wetaem yu mas mekemrere fastok blong yu?

⁷ I tru we man i mas talem fastok blong wan tok fastaem, be oltaem i gud moa blong mekemrere fastok afta we yu finisim bodi blong wan tok. Samting ya bambae i mekem se yu save wanem i gud blong talem we i save laenapgud wetem tok we yu mekemrere finis.

8-10. ?Olsem wanem blong mekem ol fastok oli stret long stampa tok?

⁸ I stret long stampa tok. Sipos fastok blong yu i stret long stampa tok samting ya bambae i mekem tok blong yu i karem frut. Yu mas lukaotgud blong yusum fastok we i laenap wetem plan blong tok blong yu. Hem i mas stret long mesej blong Kingdom mo hem i no mas spolem tingting blong ol man we oli strenja insaed long ol kampani blong ol man we oli stap lesin.

⁹ Fastok blong yu i mas pulum tingting blong man i go long tok we bambae yu givim, be i no hemia nomo, hem i mas soemaot klia stampa tingting long tok we yu wantem talem. I min se yu mas mekem ol samting we yu wantem talem long tok blong yu oli laenap wetem wan stampa tok nomo mo biaen, traehad blong makem klia stampa tok ya long fastok blong yu. Sipos yu no talem stret stampa tok, maet samtaem, yu save yusum ol stampa toktok long fastok blong yu. Long rod ya ol man we oli stap lesin long yu bambae oli no ting se yu mas kavremap ol narafala poen we maet oli stap aninit long stampa tok ya.

¹⁰ Ol tok oli mas folem wan stampa tingting, i no se oli stat wetem wan samting mo oli finis wetem narafala samting. Antap moa, long saed blong fastok we i stret long stampa tok, yu mas skelem blong mekem se fastok i wekemap intres blong man. I olsemia se, yu no mas yusum fastok blong talem wan gudfala store nomo mekem se yu fogetem blong makem stampa tok blong yu. Poen we yu wantem talem long tok blong yu i mas bigfala poen long ol samting we yu jusum long tok blong yu. Mo hem i mas stret mo i laenap wetem ful bodi blong tok blong yu.

11-14. ?Olsem wanem yumi save luksave sipos fastok blong yumi i longfala i naf?

¹¹ Longfala blong hem i stret. ?Fastok i mas tekem hamas menet? I no gat wan taem we i stret long olgeta ples. Taem blong fastok i dipen long hamas menet yu mas givim tok blong yu, risen blong givim tok ya, mo ol man we oli lesin mo ol narafala samting we yu save tingbaot.

¹² Yes, taem yu lesin long tok we i gohed, i stret sipos i hadwok blong makemaot klia ol defren haf blong tok olsem fastok mo bodi blong tok. Hemia wan trabol we man blong givim advaes bambae i faenem taem hem i kam long poen ya long Pepa Blong Advaes. Evri studen oli yusum fastok long tok blong olgeta, be man blong givim advaes bambae i intres long samting ya: ?Fastok i no klia, i bitim mak long ol smosmol poen, i longfala tumas, mekem se bifo yu talemaot ol bigfala poen long tok blong yu, ol man we oli lesin long yu oli no moa stap kwaet?

¹³ Fastok i mas gohed long wan stret oda mo i kwik blong pulum tingting blong man i go long tok be hem i mas pulum intres blong man tu. Hem i mas fulwan, mo i no mas mestem sam samting. I min se yu mas tingtinggud long hem, from we sipos fastok i aot olgeta long bigfala tingting blong tok mo yu mas tekem longtaem mo eksplenem ol smosmol samting long hem, i gud yu tingting bakegen long fastok blong yu no maet yu save statem long narafala fasin.

¹⁴ Sipos fastok mo bodi blong tok i joengud long fasin we ol man oli no haremsave en blong fastok mo stat blong bodi blong tok, nao maet fastok blong yu i longfala i naf. Samting ya bambae i soem se yu yu pulumgud tingting blong ol man we oli stap lesin i go long tok blong yu mekem se oli no haremsave samting ya. Be nao, sipos oli stat blong tingting se wetaem bambae yu go stret long poen, yu save nao se fastok blong yu i longfala tumas. Hemia wan slak fasin blong toktok long ol haos wanwan, from we oltaem yu mas jenisim longfala blong fastok long ol haos wanwan.

15, 16. ?Fastok blong wan tok we i haf blong narafala tok we oli mekem finis i mas longfala olsem wanem?

¹⁵ Taem i gat wan tok nomo long miting mo yu yu mekem no yu mekem wan tok long Tiokratik Skul, fastok blong yu maet i longfala moa bitim ol narafala taem. Be sipos tok blong yu i haf long wan tok we i kamaot fastaem finis, no hem i wan haf long Miting blong Kingdom Wok, nao fastok blong yu i mas sot mo i mas stret long poen from we hem i haf blong wan ful tok we oli bin mekem finis. I no nidim ol fastok we oli longfala we oli save kakae taem blong yu. Long bodi blong tok nao yu mas talemaot ol save we yu wantem givimaot long ol man.

¹⁶ Blong tingtingbak, fastok blong yu i blong pulum man, wekemap intres mo lidim ol man i go long tok we bambae yu mekem. Yu mas mekem olsem long fasin we i kwiktaem mo i stret mo biaen yu save go long bodi blong tok blong yu.