Stori 91

Jisas i Tijim Ol Man Antap Long Hil

LONG pija ya, Jisas i stap sidaon, i stap tijim ol man antap long wan hil long Galili. Ol man we oli stap sidaon klosap long hem, hemia ol disaepol blong hem. Hem i jusumaot 12 long olgeta finis blong oli kam ol aposol blong hem. Ol aposol oli ol spesel disaepol blong Jisas. ?Yu yu save nem blong olgeta ya?

I gat Saemon Pita mo brata blong hem Andru. I gat Jemes mo brata blong hem Jon. I gat wan narafala Jemes tu, wetem wan narafala Saemon. I gat tu aposol we nem blong tufala Judas. Wan, hemia Judas Iskariot, mo narawan, i gat narafala nem blong hem se Tadeas. Mo tu, i gat Filip mo Nataniel (we narafala nem blong hem Batolomiu), wetem Matiu mo Tomas.

Jisas i aot long Sameria i stap kambak, nao hem i stat talemaot se: ‘Kingdom blong heven i klosap.’ ?Yu yu save wanem ya kingdom ya? Hem i wan trufala gavman blong God. Jisas i king blong gavman ya. Hem bambae i rul long heven mo bambae hem i mekem pis i kamaot long wol ya. Kingdom blong God bambae i mekem fulwol i kam wan naesfala paradaes.

Long pija ya, Jisas i stap tijim ol man long saed blong kingdom ya. Hem i talem long olgeta se: ‘Taem yufala i prea, bambae yufala i prea olsem. Papa blong mifala we yu stap long heven. Mifala i wantem we olgeta man oli ona long nem blong yu, mo we kingdom blong yu i kam, mo we olgeta man long wol oli mekem ol samting we yu yu wantem, olsem we olgeta long heven oli stap mekem.’ Plante man oli singaot prea ya se ‘Lodsprea.’ Samfala oli singaot prea ya se ‘Our Father’ no ‘Notre Père.’ ?Yu yu save prea ya fulwan?

Jisas i stap tijim ol man tu long gudfala fasin we oli mas mekem long ol narafala. Hem i se: ‘Yufala i mas mekem i gud long ol narafala man, olsem we yufala i wantem blong olgeta oli mekem long yufala.’ ?Yu yu glad taem narafala i mekem i gud long yu? Taswe Jisas i stap talem se yumi mas mekem i gud long ol narafala tu. Bambae i gud tumas long paradaes, taem olgeta man oli mekem i gud long ol narafala.

Matiu japta 5 kasem 7; 10⁠:​1-4.