Japta 34

Jisas i Jusumaot Ol Aposol Blong Hem

WAN yia haf bifo, Jon Baptaes i bin talem se Jisas i olsem Smol Sipsip blong God. Mo long semtaem, Jisas i statem minista wok blong hem. Ol nem blong ol faswan disaepol blong hem long taem ya oli olsem: Andru, Saemon Pita, Jon, mo ating Jemes [brata blong Jon], mo Filip mo Nataniel [narafala nem blong hem Batolomiu]. Biaen, plante narafala man tu oli folem Kraes.

Nao Jisas i stap rere blong jusumaot ol aposol blong hem. Olgeta oli mas wok kolosap long Jisas oltaem, mo bambae hem i givim spesel trening long olgeta. Be fastaem, Jisas i go antap long wan bigfala hil blong i prea. Nao hem i stap wan fulnaet we i stap prea long God. Ating hem i askem long God blong givim waes long hem blong jusumgud ol aposol blong hem, mo hem i askem blesing blong God tu. Taem i brok delaet, hem i singaot ol disaepol blong hem oli kam long hem. Nao hem i jusumaot 12 man long olgeta, mo i givim nem long ol 12 man ya se aposol. Be hem i gohed blong tijim olgeta, taswe oli stil disaepol tu.

Sikis man we Jisas i jusumaot olgeta, hemia ol sikis man we yumi storebaot finis, ol faswan disaepol blong Jisas. Afta, Jisas i singaot Matyu we hem i stap long ofis blong hem, i stap tekem mane blong takis long ol man, nao hem i jusum hem blong kam wan aposol. Nao hem i jusum faef moa man we nem blong olgeta i olsem: Judas [narafala nem blong hem Tadeas], Judas Iskariot, Saemon blong Kena, Tomas, mo Jemes we i pikinini blong Alfeas. Jemes ya i gat wan narafala nem tu, hemia smol Jemes. Ating oli givim nem ya long hem from we hem i sot moa bitim narafala aposol Jemes, no maet hem i yangfala moa long narawan.

Longtaem lelebet ol 12 man ya oli bin folem Jisas, mo Jisas i savegud olgeta. Sam long olgeta oli kamaot long prapa famle blong Jisas. Jemes mo brata blong hem Jon tufala i kasen-­brata blong Jisas. Mo maet Alfeas i stret brata blong Josef, papa blong Jisas we i adoptem hem. Taswe pikinini blong Alfeas, hemia aposol Jemes, hem i kasen-brata blong Jisas tu.

I isi nomo blong Jisas i rimemba ol nem blong ol aposol blong hem. ?Be olsem wanem long yu? ?Yu yu save talem ol nem blong ol aposol ya? Traem tingbaot: I gat tu we nem blong tufala Saemon. I gat tu we nem blong tufala Jemes. I gat tu we nem blong tufala Judas. Saemon i gat wan brata we nem blong hem Andru, mo Jemes i gat wan brata we nem blong hem Jon. Hemia i gudfala rod blong rimemba nem blong ol eit aposol ya. Mo blong rimemba nem blong fo narafala, traem tingbaot: Wan i man blong tekem mane blong takis (Matyu), wan we biaen hem i sot long bilif (Tomas), wan we Jisas i singaot hem taem hem i stap aninit long wan tri (Nataniel), mo fren blong hem Filip.

Eleven long olgeta aposol ya oli kamaot long Galili, hemia ples blong Jisas tu. Nataniel i kamaot long Kena. Filip mo Pita mo Andru trifala i kamaot long Betsaeda, mo biaen Pita mo Andru tufala i muf i go long Kapaneam. I luk olsem we Matyu i stap long Kapaneam tu. Jemes mo Jon, tufala i mekem bisnes blong pulum fis, mo ating tufala i stap kolosap long Kapaneam. I gat wan aposol nomo we i kamaot long Judia. Hemia Judas Iskariot, we biaen i letem Jisas i go long han blong ol enemi blong hem. Mak 3:13-19; Luk 6:12-16.

▪ ?Hu ya ol aposol we oli kamaot long prapa famle blong Jisas?

▪ ?Wanem nem blong ol aposol blong Jisas? ?Olsem wanem yu save rimemba ol nem blong olgeta?

▪ ?Ol aposol ya wanwan oli kamaot long weples?