Mifala i Wantem Givhan

Smol buk ya i blong givim moa save long yu long saed blong ol wok we ol Wetnes blong Jeova oli stap mekem. Hem i soemaot ol rod we oli stap yusum blong givhan long ol man, blong kasem save moa long Baebol. Maet sam Wetnes blong Jeova oli visitim yu finis, no maet yu yu storeyan wetem olgeta finis long rod no long sam narafala ples bakegen. Maet wan Wetnes i stap mekem stadi wetem yu naoia.

Yu yu save finis se oli stap talemaot Kingdom blong God long olgeta ples blong wol. ?From wanem? From we God, we i wokem yumi evriwan, hem i wantem se fulap man long olgeta nesen, oli joengud blong wosipim hem. Hem i tokbaot taem blong yumi tede, i se: “Plante man, bambae oli go mo oli singaot se: ‘Yufala i kam, mo yumi wokbaot i go antap long bigfala hil blong Jeova, long haos blong God blong Jekob; mo hem, bambae i tijim yumi long ol rod blong hem, mo bambae yumi wokbaot long ol rod blong hem.’”—Aesea 2:2, 3.

Wok blong ol Wetnes blong Jeova blong talemaot ol rod blong God, hem i stret long profet tok ya. Ol narafala haf blong buk ya oli save soemaot from wanem wok ya i impoten naoia, mo olsem wanem hem i save givhan long yu.