Plan Blong God i Kasem Mak Blong Hem

Taem we God i wokem wol ya, hem i gat wan plan. Hem i wantem se wol ya i fulap long stretfasin mo ol man we oli glad nomo. Blong ol man oli save stap laef blong olwe, oli mas obei long ol loa blong God. Be faswan man mo woman, tufala i no obei. Tufala i mekem sin we i karem panis ya, ded. From samting ya, olgeta pikinini blong tufala, oli kasem sin mo ded.—Jenesis 1:27, 28; 2:16, 17; 3:1-19; Rom 5:12.

God, we nem blong hem, Jeova, hem i tingting strong blong tekemaot ol frut blong sin long wol. Afta we sam taem i bin pas, hem i lukluk i go long wol, hem i luk Ebram, wan man we hem i gat strong bilif. Biaen hem i jenisim nem blong hem long Ebraham. God i promes long Ebraham se, ol pikinini blong hem, bambae oli mas kam wan bigfala nesen. Wan laen i mas kamaot long nesen ya, mo bambae olgeta famle blong wol oli save kasem blesing from.—Jenesis 12:1-3; 18:18, 19; 22:18; Ol Sam 83:18; Hibrus 11:8-16.

Kolosap long 1,600 B.K.T.a, ol pikinini blong Jekob no Isrel, bubu blong Ebraham, oli kam 12 laen we olgeta i stap olsem slef long Ijip. Jeova i mekem rod blong ol man Isrel oli save fri long Ijip, mo hem i hivimap olgeta ong wan nesen. Long bigfala Hil blong Saenae, hem i givim Loa long Moses. Laef blong ol man Isrel i mas stanap long Loa ya. Jeova nomo i King mo Jaj blong olgeta, mo hem i Man blong givim Loa long olgeta tu. God i jusumaot nesen ya, Isrel, blong hem i kam ol wetnes blong hem, we oli rere blong mekem wok blong hem. Mesaea i mas kamtru from wan laen blong olgeta. Hem i mas stanemap wan Kingdom blong olwe. Bambae Kingdom ya i karem blesing long plante man long olgeta nesen blong wol.—Eksodas 19:5, 6;1 Kronikel 17:7-14; 1 King 4:20, 25; Aesea 33:22; 43:10-12; Rom 9:4, 5.

1,500 yia i pas, ale, God i sanem Pikinini blong hem long heven i kam long wol. Meri, wan gel Jyu i bonem hem. Oli putum nem ya long hem se Jisas. Hem i rulum Kingdom ya we God i promes long bubu blong hem, Deved. Taem we Jisas i gat 30 yia blong hem, Jon Baptaes i baptaesem hem. Nao, hem i stat talemaot Kingdom blong God. Hem i mekem sam sikman oli kamgud bakegen, taswe hem i soemaot olsem wanem Kingdom ya bambae i blesem ol man long fyuja. Hem i yusum ol pijatok blong eksplenem wanem samting we ol man oli mas mekem blong kasem laef blong olwe. Biaen, oli hangem Jisas long wan wud, gogo hem i ded. Be hem i givim laef ya we i stret olgeta, blong pemaot olgeta man long wol.—Matyu 1:18-24; 3:13-16; 4:17-23; 6:9, 10; japta 13; 20:28; Luk 1:26-37; 2:14; 4:43, 44; 8:1; Jon 3:16; Ol Wok 10:37-39.

Jisas i bin eksplenem se Kingdom blong Mesaea bambae i stat rul long fyuja, long taem blong en blong wol. Long taem ya, bambae hem i rul long heven olsem King. Ol man oli no save luk hem. Be oli mas luksave se hem i stap rul, from we hem i mekem sam samting long saed blong wol tu. Olgeta samting we oli stap hapen long wol naoia, oli soemaot se taem ya i stat finis long 1914, mo hem i stap ron yet. Olsem Jisas i talem finis, gud nyus blong Kingdom i stap goraon long ful wol, olsem wan wetnes long olgeta nesen. From samting ya, plante man long olgeta nesen oli stap hivap long saed blong Kingdom blong God. Bambae oli save sef long taem blong en blong wol ya. Oli save kasem laef blong olwe aninit long rul blong Kingdom blong Mesaea.—Matyu, japta 24 mo 25; Revelesen 7:9-17.

Tede, plante skul oli talem se oli stap mekem wok blong God. ?Be olsem wanem yumi save weswan i rili trufala Kristin skul? Yu yu save stadi long ol vas long Baebol we oli tokbaot Kristin kongregesen blong faswan handred yia. Afta, yu yu save luk hu ya tede i stap folem rod we olgeta long taem bifo oli bin soemaot.

[Futnot]

• ?Olsem wanem laef blong Ebraham mo Isrel i laenap wetem plan blong God?

• ?Wanem samting i kamaot from minista wok mo ded blong Jisas?

• ?Profet tok i talem se wanem samting oli mas makem taem blong yumi naoia?