Mane Blong Givhan Long Wok Ya i Presen Mane Nomo

Ol man we oli rere blong wok fri, oli stap mekem ol wok we buk ya i tokbaot finis. Taswe, praes blong wok ya i no antap tumas. Ol Wetnes blong Jeova oli no kasem pei from minista wok blong olgeta, mo from wok blong seremaot ol buk mo magasin. Olgeta wanwan nomo oli pem ol kaon blong olgeta. Ol elda we oli lukaotgud long ol kongregesen, mo ol man blong givhan, oli no kasem pei from wok blong olgeta. Olgeta wanwan nomo oli pem ol kaon blong olgeta.

Ol memba blong Hed-Kampani mo ol narafala we oli wok fultaem blong prentem ol Baebol, ol buk mo ol magasin, oli kasem rum mo kakae fri, mo smol mane blong pem sam smosmol samting blong olgeta nomo. Samting ya i tru long ol elda we oli wok fultaem long wok blong goraon long ol kongregesen tu.

Oli givimaot ol buk mo magasin fri nomo, long ol man we oli rili glad blong ridim olgeta. Oli yusum ol presen mane nomo blong pem ol pepa mo ol samting we oli yusum blong prentem mo sanemaot ol buk ya. Ol fren blong trutok mo ol Wetnes blong Jeova nomo, oli givim ol presen mane ya. Samfala oli raetem wan pepa we i stret long loa, blong talem se taem oli ded bambae oli livim sam mane olsem wan presen long Sosaete.

Long ol miting blong ol Wetnes blong Jeova long ol kongregesen no long ol asembli, i gat sam smol bokis oli stap. Ol man we oli wantem oli save putum presen mane long olgeta. Oli no mekem kleksin, oli no mekem fasin blong fosem man blong givim haf mane blong hem. Olsem Baebol i talem, man i mas givim presen we i stret long samting we hem i wantem mekem long hat blong hem.—2 Korin 8:12; 9:7.

• ?Olsem wanem oli kasem naf mane blong sapotem wok blong ol Wetnes blong Jeova?