Sapotem Wok Blong Kingdom Long Ples Blong Yu Mo Long Fulwol

OL WITNES blong Jehova oli mekem profet tok blong Jisas i kamtru, se long ol las dei, gud nius bambae i kasem “olgeta ples long wol.” (Wok 1:8; Mat. 24:14) Blong mekem wok ya, oli glad blong yusum taem mo paoa blong olgeta. Oli gohed blong lukaot Kingdom blong God fastaem, mo oli trastem Jehova se bambae hem i givim evri samting we oli nidim. (Mat. 6:25-34; 1 Kor. 3:5-9) Frut we i kamaot i soemaot se Jehova i glad mo i blesem wok ya.

LUKAOT LONG WOK BLONG KINGDOM LONG FULWOL

² Taem yumi prij, yumi givimaot ol Baebol mo buk we man i no pem. From samting ya, samfala oli askem se: “?Oli kasem mane wea?” I tru, i nidim mane blong wokem ol Baebol mo buk. I nidim mane tu blong bildim mo fiksimap ol bilding long Betel, mo blong lukaot long olgeta we oli wok long ples ya. I nidim mane blong givhan long olgeta we oli lukaot long wok blong prij, mo olgeta we oli mekem ol narafala wok, blong gud nius i save goaot moa. Mo tu, ol eria elda, ol misinari, ol spesel paenia, mo ol narafala we oli mekem wok blong God fultaem, oli kasem smol mane blong givhan long olgeta blong oli save gohed long wok ya. I klia nomo se i nidim bigfala mane blong mekem wok blong talemaot gud nius i gohed long ples blong yumi mo long fulwol. ?Yumi kasem mane ya olsem wanem?

³ Plante man we oli glad long wok we ol Witnes blong Jehova oli mekem blong tijim ol man long Baebol, oli givim mane blong sapotem wok ya. Be ol Witnes nao oli givim bighaf blong presen mane ya, mo sam long olgeta oli sanem mane i go stret long branj ofis we i lukaot long ples blong olgeta. Oli olsem ol man blong God bifo, we oli glad blong givim plante samting blong bildim haos blong God. (Eks. 35:20-29; 1 Kron. 29:9) Tede, samfala oli raetem wan leta blong talem se afta we oli ded, ol samting we oli gat bambae i go blong sapotem wok blong Kingdom. Ol man wanwan, ol kongregesen, mo ol eria, oli givim smol presen mane tu. Olgeta presen mane ya i mekem se wok blong prij i save gohed.

⁴ Ol Witnes blong Jehova oli harem se i wan ona blong yusum mane mo ol narafala samting blong olgeta blong mekem wok blong prij i gohed. Jisas mo ol disaepol blong hem oli gat wan bokis mane, mo oli yusum mane ya blong pem ol samting we oli nidim. (Jon 13:29) Baebol i tokbaot ol woman we oli yusum sam samting blong olgeta, blong givhan long Jisas mo ol disaepol blong hem. (Mak 15:40, 41; Luk 8:3) Aposol Pol i talem tangkiu from ol samting we ol narafala oli givim, blong givhan long wok blong gud nius we hem i stap mekem. (Fil. 4:14-16; 1 Tes. 2:9) Ol Witnes blong Jehova oli folem sem rod yet. Oli wok strong mo oli givim presen long gladhat. From samting ya, ol man long olgeta ples blong wol we oli laekem trutok, oli save kasem “wota blong laef we i fri nomo.”—Rev. 22:17.

OL SAMTING WE KONGREGESEN I NIDIM

⁵ Kongregesen i yusum presen mane blong pem ol samting we hem i nidim. I no gat kleksin, mo kongregesen i no askem mane long ol man, mo i no talem hamas mane oli mas givim. Long ol haos miting i gat bokis blong presen mane, nao ol man oli save givim “olsem we oli jusumaot finis long hat blong olgeta.”—2 Kor. 9:7.

⁶ Kongregesen i yusum presen mane blong pem ol samting we hem i nidim, mo blong lukaot gud long Haos Kingdom. Mo tu, maet ol elda oli mekem desisen se kongregesen bambae i sanem sam mane i go long branj ofis, blong givhan long wok long fulwol. Oli talemaot plan ya long kongregesen blong evriwan oli save soemaot se oli agri. Long rod ya nao, plante kongregesen oli givim presen mane oltaem blong givhan long wok long fulwol. Sipos evriwan oli luksave samting we kongregesen i nidim mo oli givim presen long gladhat, bambae i no nid blong talemaot se kongregesen i sot long presen mane.

WOK BLONG LUKAOT LONG PRESEN MANE

⁷ Afta long evri miting, tu brata i karemaot mane long bokis blong presen mane, tufala i kaontem, mo raetemdaon. (2 King 12:9, 10; 2 Kor. 8:20) Ol elda bambae oli meksua se mane ya i sef gud, gogo oli sanem i go long branj ofis o oli yusum blong pem samting we kongregesen i nidim. Brata we i lukaot long ol kaon blong kongregesen i mekemrere wan ripot evri manis blong talemaot long kongregesen. Mo evri tri manis, kodineta blong ol elda i jusum wan brata blong jekem ol kaon.

MANE BLONG PEM SAMTING LONG ERIA

⁸ Taem yumi mekem wan dei asembli, o yumi pem sam narafala samting blong eria, yumi yusum presen mane we ol Witnes long eria ya oli givim. I gat ol bokis blong presen mane long ol asembli, mo olgeta we oli kam long asembli, oli save putum presen mane long ol bokis ya. Ol kongregesen oli save givim presen mane long ol narafala taem tu, blong pem ol samting we eria ya i yusum oltaem.

⁹ I gud sipos presen mane long wan eria, hem i naf blong pem ol samting we oli yusum long eria ya, mo i gat smol i stap we oli save givim blong sapotem wok long fulwol. ?Be olsem wanem sipos i no moa gat mane long bang akaon blong eria, blong pem ol samting blong asembli mo blong statem nekis asembli? Maet oli mas givim smol mane blong blokem wan ples blong mekem nekis asembli long hem, o wan narafala samting olsem. Sipos mane i no naf, maet eria elda i mekem plan blong mekem wan mesej i go long ol kongregesen se oli gat janis blong givim presen mane. Ol elda bambae oli tokbaot hamas presen mane kongregesen i save givim. Nao oli talemaot plan ya long kongregesen blong evriwan oli agri long hem.

¹⁰ Taem i gat sam desisen long saed blong mane we ol elda long eria oli mas tokbaot, bambae i gat wan miting blong ol elda long taem blong wan dei asembli. Sipos oli wantem pem wan samting we oli no plan blong pem, oli mas ridimaot blong ol elda oli soemaot sipos oli agri. Taem oli ridimaot, oli mas talem stret mane we bambae oli spenem. Mo evritaem we oli wantem spenem mane blong eria, oli mas ridimaot desisen ya blong ol elda oli save agri.

¹¹ Wanwan taem, bambae oli mekem plan blong jekem kaon blong eria.

GIVHAN LONG OL PUAMAN

¹² Olsem yumi tokbaot finis, Jisas mo ol disaepol blong hem oli gat wan bokis mane. Oli yusum sam long ol mane ya blong givhan long ol puaman. (Mak 14:3-5; Jon 13:29) Tede tu, ol Kristin oli mas givhan long ol puaman, from we Jisas i talem se: “Ol puaman oli stap oltaem wetem yufala.” (Mak 14:7) ?Ol Witnes blong Jehova oli mekem wanem blong givhan long ol puaman?

¹³ Sam samtaem, wan gudfala brata o sista long kongregesen i sot long sam samting, maet from we hem i olfala, i sik, o i kasem wan narafala trabol bakegen. Ol famle mo sam narafala bambae oli harem se oli wantem givhan. Hemia nao samting we aposol Jon i talem, i se: “Sipos wan man i gat plante samting, mo hem i luk se brata blong hem i sot long sam samting, be hem i no sore long hem mo i no wantem givhan long hem, ?olsem wanem hem i save talem se hem i lavem God? Ol smol pikinini, lav blong yumi i no mas kamaot long toktok o long maot nomo, be i mas kamaot long ol wok blong yumi tu, mo i mas tru.” (1 Jon 3:17, 18; 2 Tes. 3:6-12) Taem yumi givim samting we ol gudfala brata mo sista oli nidim, hemia i wan haf blong tru wosip we yumi mekem.—Jem. 1:27; 2:14-17.

¹⁴ Long fas leta we Pol i raetem long Timoti, hem i eksplenem olsem wanem blong givhan long olgeta we oli nidim help. Yu save ridim advaes blong hem long 1 Timoti 5:3-21. Ol Kristin oli mas lukaot long prapa famle blong olgeta. Ol pikinini, ol smol bubu, mo ol narafala famle oli mas givhan long ol olfala blong olgeta mo olgeta long famle we oli sik. Long sam kantri, gavman o sam narafala grup we oli halpem ol man, oli save givhan. Ale, famle o ol narafala oli save givhan long hemia we i trabol, blong i askem help long olgeta. Be samtaem kongregesen i mas givhan long wan brata o sista we i holemstrong long Jehova longtaem finis. Sipos hem i no gat famle, mo gavman i no givhan, ol elda oli save tokbaot samting we kongregesen i save mekem blong givhan long hem. Ol Kristin oli glad blong gat janis blong serem olting blong olgeta, wetem ol brata mo sista blong olgeta we oli trabol.

¹⁵ Long taem ya we laef i had tumas, plante brata mo sista oli trabol from we ol man oli ronem mo kilim olgeta, i gat faet long ples blong olgeta, graon i seksek, wota i ron bigwan, i no gat kakae, o wan narafala trabol olsem. (Mat. 24:7-9) Maet ol kongregesen long ples blong olgeta oli no moa gat samting blong serem, ale Hed Kampani i mekem plan se ol brata long ol narafala ples oli givhan. Hemia i sem mak long samting we i hapen long taem blong ol fas Kristin. Ol Kristin long Esia Maena oli givhan long ol brata long Judia we oli sot long kakae. (1 Kor. 16:1-4; 2 Kor. 9:1-5) Taem yumi folem eksampol blong olgeta, yumi soemaot se yumi lavem ol brata mo sista, mo yumi pruvum se yumi ol tru disaepol blong Jisas Kraes.—Jon 13:35.

GIVIMAOT OL BUK

¹⁶ Ol Baebol mo ol buk blong yumi oli mekem wan bigfala wok blong talemaot gud nius blong Kingdom. Ol elda oli jusum wan man blong givhan blong i lukaot long ol buk long kongregesen. Ol brata ya we oli givimaot ol buk long ol pablisa, oli tinghevi long wok blong olgeta. Oli raetemdaon evri samting, blong mekem se oltaem i gat naf buk long kongregesen.

¹⁷ Ol Kristin we oli givim laef blong olgeta long Jehova finis, oli givim taem, save, paoa, gudhan we oli gat, olting blong olgeta, mo laef blong olgeta, blong mekem wok blong Jehova. Oli mekem olsem from we oli save se Jehova nao i givim ol samting ya long olgeta fastaem. (Luk 17:10; 1 Kor. 4:7) Taem yumi yusum gud ol samting ya, yumi soemaot se yumi lavem Jehova tumas. Yumi wantem tumas blong yusum ol sas samting blong yumi blong ona long Jehova. Yumi save se hem i glad long enikaen presen we yumi givim blong soemaot se yumi lavem hem long olgeta laef blong yumi. (Prov. 3:9; Mak 14:3-9; Luk 21:1-4; Kol. 3:23, 24) Jisas i talem se: “Yufala i kasem fri nomo, mo yufala i mas givim fri nomo.” (Mat. 10:8) Taem yumi yusum laef blong yumi mo olting blong yumi long wok blong Jehova, yumi harem gud tumas.—Wok 20:35.