Japta 31

Ol Wok Blong Jeova—Oli Bigfala Mo Oli Gud Tumas

Revelesen 15:1 kasem 16:21

Stampa tok: Jeova i stap insaed long haos blong hem. Ol enjel oli kafsaedem ol seven besin we oli fulap long kros blong God, oli go long wol

Taem we i kamtru: I stat long 1919 go kasem Amageden

1, 2. (a) ?Wanem namba tri saen we Jon i tokbaot? (b) ?Ol man blong wok blong Jeova oli save longtaem finis long wanem bigfala wok blong ol enjel?

!WAN woman we i bonem wan pikinini boe! !Wan bigfala algita we i wantem kakae pikinini ya! Tufala saen ya long heven we Revelesen japta 12 i tokbaot, tufala i makem long tingting blong yumi se trabol we i stap kamaot longtaem finis bitwin laen blong woman blong God mo Setan wetem laen blong hem, kolosap i kasem en blong hem. Jon i stap tokbaot ol saen ya i se: “Nao mi luk wan saen long skae we i saen blong wan bigfala samting. . . . Nao mi luk wan narafala saen long skae.” (Revelesen 12:1, 3, 7-12) Nao Jon i tokbaot namba tri saen, i se: “Nao mi luk, mo long heven i gat wan bigfala saen we mi sapraes tumas long hem. I gat seven enjel we oli stap tekem seven bigfala trabol i kam. Ol seven trabol ya oli laswan blong ol trabol, from we taem olgeta oli kamtru, be bambae kros blong God tu i finis.” (Revelesen 15:1) Namba tri saen ya tu i gat wan impoten mining long ol man blong wok blong Jeova.

² Yumi save makem se, bakegen hemia ol enjel we oli mas mekem bigfala wok ya, stret long wil blong God. Ol man blong wok blong Jeova oli save samting ya longtaem finis. Taem God i givim toktok long man ya we i raetemdaon Ol Sam, man ya i toktok long ol enjel olsem olgeta ya, i talem long olgeta se: “Yufala ol enjel, yufala i strong, yufala i gat paoa. Yufala i stap obei long ol tok blong Hae God [Jeova, NW], yufala i stap lesin long ol samting we hem i talem. !Yufala i mas presem hem!” (Ol Sam 103:20) Nao long nyu pija ya, God i givim wok long ol enjel, oli mas kafsaedem seven besin we oli fulap long ol laswan panis no trabol.

3. ?Wanem ol seven panis? ?Taem ol enjel oli kafsaedem olgeta, hemia i minim wanem?

³ ?Wanem ol panis ya? Oli olsem krae blong seven pupu, oli minim ol jajmen mesej we oli talemaot tingting blong Jeova long saed blong ol defren haf long wol ya. Mo tu, oli givim woning long saed blong ol jajmen blong Jeova mo laswan samting we bambae i hapen. (Revelesen 8:1 kasem 9:21) Ol enjel oli mas kafsaedem ol panis ya. Hemia i min se ol jajmen blong Jeova bambae oli kamtru, taem ol man we hem i kros long olgeta, oli ded long dei blong bigfala kros blong hem. (Aesea 13:9-13; Revelesen 6:16, 17) Taswe taem ol panis ya oli kamtru, “bambae kros blong God tu i finis.” Be bifo we Jon i eksplenem olsem wanem ol enjel oli kafsaedem ol besin, hem i tokbaot sam man we bambae oli no kasem panis from ol samting insaed long ol besin. Ol man ya, oli no gat mak blong wael anamol i stap long olgeta. Ol gudfala man ya we oli stap tru long Jeova, oli singsing blong presem hem taem oli talemaot dei blong hem blong givim panis long ol man nogud.—Revelesen 13:15-17.

Sing Blong Moses Mo Blong Smol Sipsip

4. ?Naoia Jon i luk wanem?

⁴ Naoia Jon i luk wan narakaen pija bakegen, i se: “Nao mi luk i gat wan samting olsem bigfala lugun i stap we wora blong hem i olsem glas we faea i meks wetem. Nao mi luk ol man ya we bifo oli stap faetem anamol ya we i nogud, wetem pija blong hem, mo hemia we namba blong hem i soemaot nem blong hem, nao oli winim ol samting ya finis. Oli stap stanap daon kolosap long samting ya we i olsem lugun, nao oli stap holem ol gita we God i givim long olgeta.—Revelesen 15:2.

5. ?‘Bigfala lugun we wora blong hem i olsem glas we faea i meks wetem,’ hem i pija blong wanem?

⁵ ‘Bigfala lugun ya we wora blong hem i olsem glas,’ Jon i luk hem bifo finis, hem i stap long fored blong bigfala jea blong Jeova. (Revelesen 4:6) Hem i samting olsem “bigfala lugun we i fulap long wora” (samting blong holem wora long hem) long haos blong God we Solomon i bildim. Ol pris oli go karem wora long ples ya blong oli wasem bodi blong olgeta. (1 King 7:23) Taswe hem i olsem saen blong “wora” ya, hemia Tok blong God, we Jisas i yusum blong klinim kampani blong ol tabu Kristin we oli olsem ol pris. (Efesas 5:25, 26; Hibrus 10:22) Long bigfala lugun ya, “faea i meks wetem” wora blong hem. Samting ya i soemaot se ol tabu man ya oli kasem traem mo ol samting we oli mekem olgeta oli kam klin mo tabu, taem oli stap obei long ol rul blong God blong oli save kasem ol bigfala mak we hem i putum. Mo tu, faea ya i mekem yumi tingbaot se long Tok blong God i gat plante tok panis tu agens long ol enemi blong God. (Dutronome 9:3; Sefanaea 3:8) Sam long ol mesej blong jajmen we oli olsem faea oli kamaot long ol seven laswan panis we ol enjel oli rere blong kafsaedem.

6. (a) ?Ol man we oli stap singsing long fored long samting olsem lugun long heven, oli hu? ?Olsem wanem yumi save samting ya? (b) ?Olsem wanem olgeta “oli winim ol samting ya finis”?

⁶ Long tempel blong Solomon bifo, lugun ya we i fulap long wora i blong ol pris nomo oli yusum. Samting ya i soemaot se ol man ya we oli stanap oli singsing long fored blong bigfala lugun long heven, olgeta tu oli pris. Oli “stap holem ol gita we God i givim long olgeta.” From samting ya, yumi tingbaot ol 24 elda mo 144,000 man, from we tufala grup ya tu i stap singsing wetem ol gita. (Revelesen 5:8; 14:2) Ol man ya we Jon i luk we oli stap singsing, “bifo oli stap faetem anamol ya we i nogud, wetem pija blong hem, mo hemia we namba blong hem i soemaot nem blong hem, nao oli winim ol samting ya finis.” Taswe olgeta ya oli mas minim sam long ol 144,000 we oli laef yet long wol long ol las dei. I tru tumas se grup ya i winim ol samting ya finis. Long bitim 70 yia we i stat long 1919 kam kasem naoia, oli no wantem mak blong wael anamol i stap long olgeta, mo oli no lukluk i go long pija blong hem olsem we hem nomo i save givim pis long ol man. Plante long olgeta oli ded finis, oli stanap strong gogo oli ded. Olgeta ya, naoia oli stap long heven, mo i klia se oli haremgud tumas blong lesin long singsing blong ol brata blong olgeta we oli stap yet long wol.—Revelesen 14:11-13.

7. ?Long Isrel bifo, olsem wanem oli yusum gita? ?Ol gita we God i givim long vison blong Jon oli mas mekem yumi tingbaot wanem?

⁷ Ol gudfala man ya we oli win finis oli holem gita we God i givim long olgeta. Oli olsem ol Livaet long haos blong God long taem bifo, we oli singsing blong presem Jeova wetem ol gita. Mo tu samfala oli talemaot sam profet tok taem gita i stap plei. (1 Kronikel 15:16; 25:1-3) Ol gudfala myusek blong gita i mekem ol singsing blong ol man Isrel i moa naes, taem oli stap singsing blong soemaot glad mo oli prea blong presem mo talem tangkyu long Jeova. (1 Kronikel 13:8; Ol Sam 33:2; 43:4; 57:7, 8) Taem tingting blong olgeta i hevi no oli stap kalabus, i no gat noes blong gita. (Ol Sam 137:2) Taswe ol gita long vison ya oli mas mekem yumi tingrere long wan nambawan singsing we i kamaot biaen, blong presem mo talem tangkyu long God blong yumi.a

8. ?Oli stap sing long wanem singsing? ?Wanem ol tok blong sing ya?

⁸ Hemia nao samting we Jon i talemaot se: “Oli stap sing long sing ya we Moses, man blong God bifo i sing long hem mo we Smol Sipsip blong God i sing long hem, we i talem se Hae God [Jeova, “NW”], Masta blong mifala, yu yu gat olgeta paoa, ol wok blong yu oli bigfala tumas, oli hae tumas. Yu yu king blong olgeta kantri, mo ol fasin blong yu oli stret gud, oli tru. ?Hae God [Jeova, “NW”], hu man i no save ona long yu? ?Hu man i no save leftemap nem blong yu? Yu nomo yu tabu. Bambae ol man blong olgeta kantri oli save kam blong mekem wosip long yu, from we yu yu soemaot finis ol stret fasin blong yu.”—Revelesen 15:3, 4.

9. ?From wanem profet tok i talem se sing ya i “sing ya we Moses . . . i sing long hem”?

⁹ Ol man ya we oli win oli stap sing long “sing ya we Moses . . . i sing long hem.” Hemia i min se sing ya i kolosap sem mak long sing we Moses i sing long hem taem samting olsem i kamaot long hem. Afta we ol man Isrel oli lukluk ol ten panis we oli kam long ol man Ijip mo oli luk ol ami blong ol man Ijip oli draon long Red Si, Moses i lidim olgeta long wan sing blong presem Jeova from we hem i win. Hem i talem se: “Hae God [Jeova, NW], bambae yu yu king oltaem nomo, gogo i no save finis.” (Eksodas 15:1-19) Ol man ya we oli singsing long vison blong Jon oli winim finis wael anamol ya mo oli stap talemaot ol seven laswan trabol. Taswe i stret nomo we olgeta tu oli mas singsing blong presem “king we rul blong hem i no save finis.”—1 Timote 1:17.

10. ?Moses i mekem wanem narafala singsing? ?Mo olsem wanem laswan haf blong singsing ya i stret long bigfala kampani tede?

¹⁰ I gat wan narafala singsing we ol man Isrel oli mekem taem oli mekemrere blong faetem ol man Kenan. Long singsing ya, olfala Moses i talem long nesen ya se: “Mi bambae mi talemaot nem blong Jeova. !Yufala i presem God blong yumi from hem i hae we i hae!” Laswan haf long singsing ya i leftemap tingting blong ol man we oli no blong nesen blong Isrel tu. Mo ol toktok ya we God i givim long Moses oli stret long bigfala kampani blong ol man tede. Hem i se: “Yufala long ol nesen, yufala i mas glad, wetem ol man blong God.” ?From wanem oli mas glad? From we Jeova i rere blong “givimbak from blad blong ol man blong hem, bambae hem i givim panis long ol enemi blong hem.” Stret jajmen ya blong Jeova bambae i mekem ol man we oli trastem Hem oli glad tumas.—Dutronome 32:3, 43; Rom 15:10-13; Revelesen 7:9.

11. ?Olsem wanem sing ya we Jon i harem i stap kamtru tede yet?

¹¹ Yumi save se Moses i glad tumas sipos hem i save laef long dei blong Masta naoia, mo sipos hem i save joen wetem olgeta long heven blong singsing se: “Bambae ol man blong olgeta kantri oli save kam blong mekem wosip long yu.” Nambawan sing ya i stap kamtru bigwan tede tu, olsem yumi stap luk. Hem i no wan vison nomo, be hem i tru. Plante milyan man long “olgeta kantri” oli glad blong kam insaed long ogenaesesen blong Jeova long wol tede.

12. ?Olsem wanem sing ya blong ol man we oli win i olsem “sing ya we . . . Smol Sipsip blong God i sing long hem”?

¹² Be i no Moses nomo i stap sing long sing ya, “Smol Sipsip blong God” tu i sing long hem. ?Olsem wanem hem i mekem olsem? Moses hem i profet blong Jeova long Isrel bifo. Be Moses i talemaot bakegen se bambae Jeova i stanemap wan profet olsem hem. Profet ya, hemia Smol Sipsip ya, Jisas Kraes. Moses hem i “man [blong wok] blong God,” be Jisas hem i Pikinini blong God. Taswe hem i olsem Bigfala Moses. (Dutronome 18:15-19; Ol Wok 3:22, 23; Hibrus 3:5, 6) From samting ya, ol man blong singsing oli sing tu long “sing ya we . . . Smol Sipsip blong God i sing long hem.”

13. (a) ?Olsem wanem Jisas i olsem Moses, nating we hem i hae moa long hem? (b) ?Olsem wanem yumi save joen wetem ol man blong singsing?

¹³ Jisas i olsem Moses, hem i singsing blong presem God mo blong talemaot profet tok se bambae Hem i winim ol enemi blong hem. (Matyu 24:21, 22; 26:30; Luk 19:41-44) Jisas tu i stap wet long taem ya we ol man long olgeta kantri bambae oli presem Jeova. Mo hem i givim laef blong hem olsem “smol sipsip blong God” blong mekem se samting ya i save kamtru. (Jon 1:29; Revelesen 7:9; lukluk Aesea 2:2-4; Sekaraea 8:23.) Moses i laekem tumas nem blong God, Jeova, mo hem i leftemap nem ya. Jisas tu i talemaot nem blong God. (Eksodas 6:2, 3; Ol Sam 90:1, 17; Jon 17:6) Jeova i no save gyaman long ol promes blong hem, taswe ol gudfala promes blong hem bambae oli kamtru. From samting ya, yumi tu, yumi joen wetem ol gudfala man blong singsing, wetem Smol Sipsip, mo wetem Moses, yumi agri long ol tok ya blong singsing se: “?Hae God [Jeova, NW], hu man i no save ona long yu? ?Hu man i no save leftemap nem blong yu?”

Ol Enjel We Oli Holem Ol Besin

14. ?Jon i luk hu i stap kamaot long haos blong God? ?Mo anamol i givim wanem long olgeta?

¹⁴ I stret nomo we yumi harem singsing blong ol tabu man we oli win long faet blong olgeta finis. ?From wanem? From we oli talemaot long wol finis ol mesej blong jajmen we oli stap insaed long ol besin we oli fulap long kros blong God. Be i no ol man long wol nomo we oli insaed long bisnes ya blong kafsaedem ol besin. Jon i gohed long toktok blong hem se: “Nao mi luk we haos blong God long heven i open, mo i gat haos tapolen i stap insaed long hem we i saen blong soemaot we God i stap. Nao ol seven enjel ya we oli stap tekem ol seven bigfala trabol ya i kam, oli kamaot long haos ya. Oli putum waet klos finis we oli beswan, mo oli fasem gol strap i goraon long jes blong olgeta. Nao wan long ol fo anamol ya we oli stap kolosap long jea blong God, hem i givim seven gol besin oli go wanwan long ol seven enjel ya. Ol besin ya oli fulap long kros blong God ya we i laef, we i no save ded samtaem.”—Revelesen 15:5-7.

15. ?From wanem yumi no sapraes we ol seven enjel ya long vison oli kamaot long ples we God hem wan i stap long hem long heven?

¹⁵ Long saed blong haos prea blong ol man Isrel, we i gat ol pija blong ol samting blong heven insaed long hem, hae pris nomo i save go insaed long Tabu Ples we i Tabu Tumas, we Revelesen i talem se hem i “haos blong God.” (Hibrus 9:3, 7) Hem i pija blong ples we Jeova i stap long hem long heven. Be long heven i no Hae Pris Jisas Kraes nomo we i gat bigfala blesing ya blong go insaed long ples we Jeova i stap long hem stret. Ol enjel tu oli save mekem olsem. (Matyu 18:10; Hibrus 9:24-26) Taswe yumi no sapraes we ol seven enjel long vison ya oli stap kamaot long ples we God i stap long hem long heven. Jeova God hem wan i givim wok long olgeta: Oli mas kafsaedem ol besin we oli fulap long kros blong God.—Revelesen 16:1.

16. (a) ?Wanem i soemaot se ol seven enjel ya oli naf gud blong mekem wok ya? (b) ?Wanem i soemaot se sam narafala tu oli givhan long bigfala wok ya blong kafsaedem ol besin?

¹⁶ Ol enjel ya oli naf gud blong mekem wok ya. Oli werem waet klos we oli beswan, samting ya i soemaot se oli klin mo tabu long saed blong speret, mo Jeova i lukluk olgeta olsem we oli stretgud nomo. Mo tu, oli werem strap we oli wokem long gol. Kolosap evritaem, man i fasem wan strap long hem, taem hem i mekemrere blong wok. (Levitikas 8:7, 13; 1 Samuel 2:18; Luk 12:37; Jon 13:4, 5) Taswe ol enjel we oli fasem strap, oli rere blong wok. Mo ol strap ya oli wokem long gol. Long haos tapolen long taem bifo, oli yusum gol long ol samting we i blong God, ol samting blong heven. (Hibrus 9:4, 11, 12) Taswe mining blong hem long Revelesen se, ol enjel ya oli mas mekem wan wok we God nomo i givim long olgeta, we i impoten mo i gudfala tumas. Sam narafala tu oli givhan long bigfala wok ya. Wan long ol fo anamol we oli stap kolosap long jea blong God hem i givim ol besin wanwan long ol enjel ya. I klia se hemia i faswan anamol we i givim ol besin ya. Hem i olsem wan laeon, we i pija blong fasin no fraet. Taswe pija ya i soemaot se oli mas no fraet nating blong talemaot ol jajmen blong Jeova.—Revelesen 4:7.

Jeova Insaed Long Haos Blong Hem

17. ?Jon i talem wanem long yumi long saed blong haos blong God? ?Olsem wanem samting ya i mekem yumi tingbaot haos blong God long Isrel bifo?

¹⁷ Jon i finisim haf blong vison ya wetem tok ya se: “Nao haos ya blong God i kam fulap long smok, from we God i stap long hem long paoa blong hem, mo bigfala laet we i stap saenaot long hem i saen we i saen. Nao i no gat man i save go insaed long haos ya blong God, gogo ol seven bigfala trabol ya we ol seven enjel oli stap tekem i kam, bambae oli kamtru. (Revelesen 15:8) Long Isrel bifo, samtaem wan klaod i kam kavremap haos blong God. Hem i blong soemaot se bigfala paoa blong Jeova i stap, mo samting ya i blokem ol pris oli no save go insaed long hem. (1 King 8:10, 11; 2 Kronikel 5:13, 14; ridim Aesea 6:4, 5.) Long ol taem olsemia, Jeova hem wan i yusum paoa blong hem stret, blong mekem sam samting long wol.

18. ?Wetaem bambae ol seven enjel oli gobak blong mekem ripot long fored blong Jeova?

¹⁸ Tede tu, Jeova i intres bigwan long ol samting we oli stap hapen long wol. Hem i wantem se ol seven enjel oli finisim wok blong olgeta. Hemia i bigfala taem blong jajmen, olsem Ol Sam 11:4-6 i talem se: “Hae God [Jeova, NW] i stap long tabu haos ya blong hem. Hem i king, i stap rulum olgeta man. Hem i stap long heven, i stap lukluk olgeta man long evri ples, i save evri samting we oli stap mekem. God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet. Bambae hem i panisim ol man nogud, i sanem faea we i stap laet, wetem salfa we i hot we i hot, i kamdaon, i bonem olgeta. Bambae hem i sanem win we i hot we i hot blong panisim olgeta.” Ol seven enjel ya bambae oli no gobak blong stanap long fored blong Jeova gogo oli finisim wok ya blong kafsaedem ol seven panis long ol man nogud.

¹⁹ Naoia bigfala oda i kamaot olsem tanda: “Nao mi harem wan tok we i kamaot long haos ya blong God, mo we i singaot bigfala, i talem long ol seven enjel ya, i se ‘Yufala i go, yufala i kafsaedem ol seven besin ya we oli fulap long kros blong God, nao kros blong God bambae i kasem wol.’ ” (Revelesen 16:1) ?Hu i givim oda ya? Hem i mas kamaot long Jeova hem wan, from we paoa mo laet blong hem i blokem ol narafala man oli no save go insaed long haos blong hem. Long 1918, Jeova i kam blong mekem jajmen long haos blong hem long saed blong speret. (Malakae 3:1-5) Taswe ating jes biaen long taem ya, hem i givim oda ya blong kafsaedem ol besin we oli fulap long kros blong God. Ol jajmen mesej we oli stap insaed long ol besin ya, ol man blong God oli stap talemaot strong moa long 1922. Mo oli stap kam strong moa yet long taem blong yumi.

Ol Besin Mo Krae Blong Ol Pupu

20. ?Ol besin we oli fulap long kros blong Jeova oli talemaot wanem mo oli givim woning long wanem? ?Ol enjel oli yusum hu blong kafsaedem ol besin ya?

²⁰ Ol besin we oli fulap long kros blong Jeova oli soemaot olsem wanem Jeova i tingbaot sam samting we oli kamaot long wol. Mo tu, oli givim woning long ol jajmen blong Jeova. Ol enjel oli yusum kampani blong ol tabu Kristin long wol blong kafsaedem ol besin ya. Hemia ol man we oli stap singsing long sing ya blong Moses mo blong Smol Sipsip. Taem grup ya olsem Jon oli stap talemaot gud nyus blong Kingdom, long semtaem, oli stap talemaot klia ol samting we i stap insaed long ol besin blong kros blong God. (Matyu 24:14; Revelesen 14:6, 7) Taswe mesej blong olgeta i gat tu haf blong hem. Hem i mesej blong pis from we oli stap talemaot fasin fri long ol man. Be tu hem i mesej blong faet from oli stap talemaot woning blong “dei ya we God blong yumi i makem blong givimbak.”—Aesea 61:1, 2.

21. ?Olsem wanem ol panis blong God we oli kamaot long ol fo besin, oli go long ol sem samting we krae blong ol fo faswan pupu oli go long olgeta? ?Be olsem wanem oli defren?

²¹ Ol panis we ol fo faswan pupu i talemaot, oli go long graon, solwora, ol reva, ol springwora, mo ol samting we oli givim laet long skae. Ol panis long ol fo faswan besin we oli fulap long kros blong God, olgeta tu oli go long ol samting ya. (Revelesen 8:1-12) Be ol krae blong ol pupu oli talemaot ol panis long “wan haf” long ol samting ya nomo, tu haf i stap. Be ol panis insaed long ol besin we oli fulap long kros blong God, oli go long olgeta haf blong ol samting ya. Krisendom hem i stret long “wan haf” ya we hem i faswan blong kasem panis long dei blong Masta. Be olgeta haf blong wol blong Setan oli kasem panis from ol jajmen mesej blong Jeova mo ol trabol we oli karem long olgeta.

22. ?Olsem wanem ol tri laswan krae blong pupu oli defren? ?Be olsem wanem oli joen wetem tri laswan besin we oli fulap long kros blong Jeova?

²² Ol tri laswan krae blong pupu oli defren, from we Revelesen i kolem olgeta se ol ‘bigfala trabol.’ (Revelesen 8:13; 9:12) Namba wan mo namba tu long trifala ya oli tokbaot ol lokis mo ol ami we oli ron long ol hos. Namba tri i talemaot se Kingdom blong Jeova i stanap. (Revelesen 9:1-21; 11:15-19) Bambae yumi luk we ol tri laswan besin we oli fulap long kros blong God, long sam fasin olgeta tu oli minim sem samting ya. Be long sam fasin oli defren long trifala trabol ya. Naoia yumi luklukgud wanem i kamaot taem ol enjel oli kafsaedem ol besin we oli fulap long kros blong Jeova.

[Futnot]

19. (a) ?Wanem oda i kamaot naoia? ?Hu i givim oda ya? (b) ?Wetaem ol enjel oli stat kafsaedem ol besin?