Japta 11

Jon i Mekem Rod Blong Jisas

TAEM Jisas i gat 12 yia nomo, hem i stap askem kwestin long ol tija long haos blong God. Nao seventin yia i pas finis. Yia ya, hem i 29 K.T. Ol tri oli stap putum flaoa. Mo ol man oli stap tokbaot kasen-brata blong Jisas, nem blong hem Jon. Hem i stap prij long ol ples raonabaot long Jodan Reva.

Fulap man oli laekem Jon. Hem i gat wan gudfala bodi, mo toktok blong hem i gud. Oli wokem klos blong hem long hea blong kamel, mo hem i werem strap we oli wokem long skin blong buluk. Hem i stap kakae lokis mo eg blong sugabag we oli stap olbaot long bus. ?Mo wanem mesej blong hem? “Yufala i mas tanem tingting blong yufala from ol sin blong yufala, from we [Kingdom blong heven, NW] i kam kolosap nao.”

Ol man we oli harem mesej ya oli glad long hem. Plante man oli luksave se oli mas tanem tingting blong olgeta from ol sin blong olgeta. Yes, oli mas jenisim tingting blong olgeta, oli mas tanem baksaed long olfala laef we i nogud. Plante man blong ol velej kolosap long Jodan Reva wetem plante man blong Jerusalem tu, oli kam long hem. Nao blong baptaesem olgeta Jon i draonem olgeta long Jodan Reva. ?From wanem?

Baptaes blong Jon i saen blong soemaot se ol man ya oli sore tumas mo oli tanem tingting blong olgeta from ol sin we oli mekem agens long Loa blong Moses. Taswe taem Jon i luk we i gat sam man Farisi mo Sadusi oli stap kam long Jodan, Jon i jajem olgeta. Hem i se: “Yufala i olsem snek. . . . Sipos i tru we yufala i tanem tingting blong yufala from ol sin blong yufala, yufala i mas gat frut blong samting ya long laef blong yufala. Be i nogud yufala i flas, we yufala i stap taltalem long yufala se ‘Yumi ya laen blong Ebraham ya.’ Mi mi talem long yufala, God i save tekem ol ston ya, i save mekem olgeta oli kam laen blong Ebraham. Akis i rere finis blong katemaot ol tri. Olgeta tri we oli no karem ol gudfala frut, bambae oli katemaot olgeta, oli sakem olgeta i go long faea.”

Ol man oli harem gud long tok blong Jon. From samting ya, ol man Isrel long Jerusalem oli sanem sam pris wetem sam Livaet oli kam long Jon. Nao oli askem long hem se: “?Yu yu wanem man?”

Jon i talemaot long klia ples, i se: “Mi ya mi no Mesaea.”

Nao olgeta oli askem se: “?Oraet, be yu hu? ?Yu Elaeja?”

Be Jon i ansa se: “No, mi mi no hemia.”

Nao oli askem se: “?Ale, yu hu? ?Yu profet ya we olgeta bifo oli bin talemaot?”

Be hem i talem se: “No.”

Nao oli askem strong long hem se: “?Ale, be yu wanem man? Mifala i mas gat tok blong talem long olgeta ya we oli sanem mifala. ?Wanem tok blong yu blong talemaot yu?”

Nao Jon i ansa long olgeta, i se: “Mi mi man ya we profet Aesea i tokbaot longtaem finis, i se ‘Wan man i stap singaot long drae ples, i se “Yufala i stretem rod blong [Jeova, NW].” ’ ”

Nao ol man ya oli askem kwestin long Jon bakegen, se: “?Sipos yu yu no Mesaea, mo yu no Elaeja, mo yu no profet ya we olgeta bifo oli bin talemaot, olsem wanem yu stap mekem baptaes?”

Jon i ansa, i se: “Mi mi stap mekem baptaes long wora, be long medel blong yufala, i gat wan man i stap, we yufala i no save hem. Mi mi kam fastaem, man ya i biaen.”

Jon i stap mekem rod blong man ya, from we hem i stap mekem tingting blong ol man i rere blong bilif long Mesaea, we bambae i kam King. Hem i tokbaot Man ya, i se: “Hemia we i stap kam biaen, hem i hae moa long mi. Mi mi no stret, mi no naf blong karem sandel blong hem.” Mo tu Jon i talem se: “Mi mi kam fastaem, be hemia we i stap kam biaen, hem i hae moa long mi, from we hem i stap taem mi mi no bon yet.”

Mesej blong Jon se “[Kingdom blong heven, NW] i kam kolosap nao,” i stap talemaot long ol man se King ya we Jeova i makemaot hem finis, Jisas Kraes, kolosap nao hem i statem minista wok blong hem. Jon 1:6-8, 15-28; Matyu 3:1-12; Luk 3:1-18; Ol Wok 19:4.

▪ ?Jon i wanem kaen man?

▪ ?From wanem Jon i baptaesem man?

▪ ?From wanem Jon i save talem se Kingdom i kolosap nao?