?Yu Yu Wantem Lanem Moa Long Saed Blong Baebol?

?From Wanem Mi Mas Ridim Baebol?

BAEBOL i defren long olgeta buk—hem i holem ol tijing blong God ya we i gat bigfala lav. (1 Tesalonaeka 2:13) Sipos yu folem ol tijing blong Baebol, bambae yu kasem plante gudfala frut. Bambae yu mekem lav blong yu long God i kam bigwan moa, mo bambae yu kam klosap moa long hem, we hem nao i Man blong Givim “evri samting we oli gud mo evri presen we oli nambawan.” (Jemes 1:17) Bambae yu lanem olsem wanem blong kam klosap long hem tru long prea. Long taem blong trabol, bambae yu save kasem help blong God. Sipos yu mekem laef blong yu i laenap wetem ol rul blong Baebol, bambae God i givim long yu laef ya we i no save finis.—Rom 6:23.

Insaed long Baebol i gat ol trutok we oli givim save long yumi. Olgeta we oli kasem save long Baebol oli kam fri long ol giaman tijing we oli gat paoa long laef blong plante milian man. Eksampol, taem yumi save trutok long saed blong wanem i hapen long man we i ded, yumi no moa fraet se ol dedman oli save spolem yumi, mo yumi no wari se ol famle no fren we oli ded oli stap safa. (Esikel 18:4) Tijing blong Baebol se bambae ol dedman oli laef bakegen, i leftemap tingting blong olgeta we oli bin lusum sam famle no fren long ded. (Jon 11:25) Taem yumi lanem trutok long saed blong ol rabis enjel, yumi luksave se i gat denja sipos yumi joen long wok blong ol rabis spirit, mo trutok ya i givhan long yumi blong kasem save from wanem i gat plante trabol long wol.

Ol rul we God i givim long Baebol, oli soem olsem wanem blong karem ol gudfala frut long laef blong yumi we oli save mekem yumi harem gud moa long saed blong bodi. Eksampol, sipos yumi stap ‘bos long ol fasin blong yumi,’ samting ya i save halpem yumi blong gat gudfala helt. (1 Timoti 3:2, New World Translation) Sipos yumi sakemaot ‘olgeta samting long bodi blong yumi mo long tingting blong yumi we oli stap mekem yumi doti long fes blong God,’ bambae yumi blokem fulap samting we oli save spolem helt blong yumi. (2 Korin 7:1) Sipos yumi folem ol advaes we God i givim long Baebol bambae yumi leftemap glad insaed long mared mo gat respek long laef blong yumi wan.—1 Korin 6:18.

Sipos yu folem Tok blong God, bambae yu kam wan man we i hapi moa. Save blong Baebol i halpem yumi blong gat pis long tingting, stap glad, mo i givim wan gudfala tingting long saed blong fiuja. Save ya i givhan long yumi blong wokem ol naesfala fasin olsem fasin sore, lav, glad, pis, kaen fasin mo bilif. (Galesia 5:22, 23; Efesas 4:24, 32) Ol fasin olsem oli halpem yumi blong kam moagud, nomata sipos yumi wan hasban no waef, wan papa no mama, wan yangfala boe no yangfala gel.

?Samtaem yu stap tingbaot fiuja? Ol profet tok blong Baebol oli soemaot we yumi stap laef long wan impoten taem long histri blong ol man. Ol profet tok ya oli talemaot se laef long wol tede bambae i olsem wanem, mo oli soemaot we i no longtaem bambae God i jenisim wol ya i kam paradaes.—Revelesen 21:3, 4.

Help Blong Kasem Save Long Baebol

Maet yu bin traem blong ridim Baebol, be yu faenem se i hadwok blong kasem save long hem. Maet yu no save weples insaed long Baebol blong faenem ansa long ol kwestin blong yu. Sipos i olsem, yu no mas ting se yu wan nomo yu olsem. Yumi evriwan i nidim help blong kasem save long Tok Blong God. Long samwe 235 kantri, ol Witnes blong Jeova oli tijim Baebol long plante milian man. Bambae ol Witnes oli glad blong givhan long yu tu.

Taem yumi stadi Baebol, i moagud blong stat wetem ol stamba tijing mo gohed long wan fasin we i gat oda long hem. (Hibrus 6:1) Taem yu gohed, bambae yu kam naf moa blong tekem ol “strong kakae”—hemia ol dip save blong trutok. (Hibrus 5:14) Baebol i stamba blong trutok. Ol buk we oli stanap long Baebol, olsem buklet ya ?Wanem Samting We God i Wantem Yumi Blong Mekem?, bambae oli halpem yu blong kasem save long ol vas blong Baebol long saed blong plante defren samting.

?Yu Yu Rere Blong Spenem Taem Evri Wik Blong Kasem Save Long Baebol?

Yu save mekem Baebol stadi long wan taem mo ples we i stret long yu. Plante man oli mekem stadi long haos blong olgeta. Sam oli mekem stadi long telefon. Program blong stadi i no stap long wan klasrum we i gat fulap man, be hem i wan plan we i stret long laef blong yu wan, nomata sipos yu skul gud no nogat. Bambae i no gat ol eksam, mo i no gat samting blong mekem yu yu sem. Bambae yu kasem ansa long ol kwestin blong Baebol, mo bambae yu lanem olsem wanem blong kam klosap long God.

Bambae yu no pem blong mekem stadi ya long Baebol. (Matiu 10:8) Stadi ya i fri long ol man blong eni skul, no long man we oli no gat skul be oli wantem tumas blong lanem olsem wanem blong kam klosap long God.

?Hu i save joen long storian? Fulwan famle blong yu. Eni fren we yu wantem askem long hem blong joen long storian ya, i save joen tu. No, sipos yu wantem, ol Witnes oli save mekem stadi long yu wan nomo.

Plante man oli makemaot wan aoa evri wik blong stadi Baebol. Nating sipos yu save spenem moa taem, no smol taem nomo evri wik, be ol Witnes blong Jeova bambae oli rere blong halpem yu.

Singaot Ol Man Blong Oli Kasem Save

Mifala i leftemap tingting blong yu blong toktok wetem ol Witnes blong Jeova. Blong halpem yu blong mekem olsem, yu save sanem leta long adres ya we i stap daon. Bambae oli mekem plan blong visitim yu blong mekem Baebol stadi we yu no pem.

□ Mi wantem buklet ya ?Wanem Samting We God i Wantem Yumi Blong Mekem?

□ Plis kam luk mi blong mekem wan fri Baebol stadi wetem mi.