Ogenaesesen We i Mekem Wok Blong Jeova
Japta 15
Yumi Kasem Gudfala Frut Taem Yumi Obei Long Tiokratik Oda
SIPOS yumi wantem folem gudfala plan blong mekem wok blong Jeova, yumi mas obei long God we hem i King blong heven mo wol. Mo tu, yumi mas luksave se Pikinini blong God i hed blong Kristin kongregesen. I impoten tu blong luksave se i gat sam narafala man bakegen we yumi mas stap daon long olgeta. Taem yumi obei long tiokratik oda ya, yumi evriwan i kasem gudfala frut.
Plan ya se samfala oli hed long ol narafala, i stat long garen blong Iden. Ol oda we God i givim long Jenesis 1:28 mo Jenesis 2:16, 17 oli soemaot plan ya. Ol anamol oli mas obei long man. Adam mo Iv tufala i mas obei long God olsem hed blong tufala mo tufala i mas mekem samting we Hem i wantem. Sipos evriwan oli respektem plan ya we God i putumap, bambae i gat pis mo oda. Rul ya se samfala oli hed long ol narafala i kamaot bakegen long 1 Korin 11:3. Aposol Pol i raetem se: “I gat wan tok we mi wantem yufala i savegud mining blong hem. God, hem i hed blong Kraes, mo Kraes, hem i hed blong man, mo man, hem i hed blong woman blong hem.” Ale, vas ya i soemaot se evriwan oli gat wan narafala we i hed blong olgeta. Jeova nomo i no gat.
Long taem blong yumi, bighaf blong ol man oli no wantem luksave se i gat wan narafala we i hed blong olgeta, mo oli no wantem obei long narafala. ?From wanem? Trabol ya i stat long garen blong Iden, taem faswan papa mama blong yumi i mekem stronghed, nao tufala i no wantem we God i hed mo King blong tufala. (Jen. 3:4, 5) Tufala i ting se bambae tufala i kam fri moa, be nogat. Samting we i rili hapen se, tufala i kam aninit long paoa blong wan rabis spirit man, hemia Setan. Fasin stronghed blong tufala ya i mekem we olgeta man oli kam strenja long God. (Kol. 1:21) Taswe, tede bighaf blong ol man oli stap aninit long paoa blong Setan.—1 Jon 5:19.
Yumi we yumi lanem trutok blong Baebol mo yumi obei long hem, yumi kamaot long paoa blong Setan finis. Yumi givim laef blong yumi long Jeova finis mo yumi tekem baptaes olsem ol Witnes blong Hem, ale yumi glad blong obei long Jeova olsem King blong yumi. Yumi agri wetem King Deved bifo we i luksave Jeova olsem “hed blong olgeta samting.” (1 Kron. 29:11, NW ) Yes, yumi talem wetem tingting daon se: “Hae God [“Jeova,” NW ], hem i God. Hem nomo i mekem yumi, mo yumi man blong hem. Yumi ol man blong hem, yumi olsem ol sipsip blong hem.” (Sam 100:3) Yumi luksave se Jeova i hae we i hae, mo se i stret nomo we yumi obei fulwan long hem from we hem nao i mekem olgeta samting. (Rev. 4:11) From we yumi ol man blong wok blong trufala God, yumi folem Jisas Kraes we hem i givim nambawan eksampol blong obei long God.
?Jisas i lanem wanem from ol trabol we hem i kasem long wol? Hibrus 5:8 i ansa se: “Kraes i Pikinini blong God, be hem i lanem mining blong fasin ya blong obei long God, long ol samting we oli mekem hem i harem nogud long bodi blong hem.” Yes, oltaem Jisas i obei long Papa blong hem we i stap long heven, mo hem i gohed blong mekem olsem taem hem i harem nogud long bodi blong hem tu. Mo tu, Jisas i no mekem wan samting nating folem prapa tingting blong hem. Ol tok we hem i talem oli no kamaot long hem nomo, mo hem i no pulum ol man blong leftemap hem. (Jon 5:19, 30; 6:38; 7:16-18) Long wok blong hem long wol, hem i haremgud tumas blong mekem samting we Papa blong hem i wantem, nating se samting ya i mekem we ol man oli agensem hem mo oli mekem i nogud tumas long hem. (Jon 15:20) Long olgeta trabol ya, Jisas i gohed blong obei long God, mo hem i soemaot samting ya taem “i mekem tingting blong hem i stap daon” gogo “hem i ded long fasin ya we ol man oli nilim hem long [“pos,” NW ].” From we hem i obei fulwan long Jeova, hem i mekem plante blesing oli kamaot. Sam long olgeta: Ol man oli gat janis blong kasem laef we i no save finis, Jisas i kasem haenem long heven, mo hem i leftemap nem blong Papa blong hem.—Fil. 2:5-11, NW; Hib. 5:9.
?OLSEM WANEM YUMI OBEI LONG TIOKRATIK ODA?
Jeova i King blong heven mo wol, taswe i stret nomo we yumi obei fulwan long hem. (Aes. 33:22) Blong luksave samting ya, i gud we yumi ol man blong Jeova, yumi tingting dip long laef blong yumi evri dei. Taem yumi putum God i stap long fasples long laef blong yumi mo yumi mekem wok blong hem, hem i lidim yumi long stret rod. (Sam 16:8) Yumi no wari bitim mak mo kros olsem olgeta we oli no wantem obei long Jeova olsem King blong olgeta. Enemi blong yumi, Setan, oltaem hem i stap putum ol trap blong kasem yumi mo spolem yumi. Be sipos yumi strong blong blokem Setan mo yumi mekem tingting blong yumi i stap daon long fored blong Jeova mo obei long Hem, bambae hem i no letem Setan i spolem yumi.—Mat. 6:10, 13; 1 Pita 5:6-9.
Taem yumi obei long God, hemia i givhan long yumi blong frengud wetem ol narafala man tu. Yumi no kasem ol trabol we ol man blong wol oli kasem taem oli folem prapa tingting blong olgeta nomo. From we yumi obei long Jeova God, yumi gat wan gudfala mared mo famle blong yumi i hapi, mo yumi joengud wetem ol man we yumi wok wetem olgeta mo ol masta tu. Yumi obei long loa blong gavman, mo yumi no mekem samting we tingting blong yumi i save trabol from. Mo tu, yumi kampani wetem ol beswan man long wol, hemia ol Kristin brata sista blong yumi.
Long Kristin kongregesen, yumi luksave se Kraes i hed blong yumi, mo se hem i putumap slef we i stret mo waes blong i lukaot long yumi. Hemia i gat paoa long tingting mo fasin we yumi mekem long ol narafala long kongregesen. Sipos yumi respektem oda we God i putumap long kongregesen, bambae yumi obei long Baebol long olgeta haf blong wosip blong yumi. Bambae yumi mekem olsem long wok blong prij, long ol miting mo long ol ansa mo tok we yumi mekem long ol miting, long fasin fren blong yumi wetem ol elda, mo long fasin blong yumi blong folemgud ol plan we ogenaesesen i mekem.—Mat. 24:45-47; 28:19, 20; Hib. 10:24, 25; 13:7, 17.
From we yumi obei long God mo tiokratik oda, yumi stap long pis mo yumi harem se yumi sef gud. Tiokratik oda ya i no strong tumas long yumi. (1 Jon 5:3) Ol man blong Jeova oli folem ol fasin blong Hem, taswe oli joengud long wan kampani nomo. (1 Kor. 14:33, 40) Samting we yumi luk mo yumi kasem insaed long ogenaesesen blong Jeova i lidim yumi blong gat sem tingting olsem Deved bifo. Deved i tokbaot olsem wanem ol man blong Jeova oli defren olgeta long ol rabis man we oli tokflas from paoa mo mane blong olgeta. Nao biaen, Deved i talem wetem glad se: “Hae God [“Jeova,” NW ] i God blong yumi, mo from samting ya, yumi save harem gud.”—Sam 144:15.
Long mared mo long famle, “man, hem i hed blong woman blong hem.” Long saed blong man, Kraes i hed blong hem, mo long saed blong Kraes, God i hed blong hem. (1 Kor. 11:3) Ol woman oli mas obei long man blong olgeta, mo ol pikinini oli mas obei long papa mama blong olgeta. (Efes. 5:22-24; 6:1) Sipos evriwan long famle oli folem fasin ya blong obei long hemia we i hed blong olgeta, bambae i gat pis long famle.
Man i mas hed long famle blong hem long fasin we i soemaot lav, olsem Kraes i soemaot. (Efes 5:25-29) Sipos man i no strong tumas long famle blong hem mo i no ronwe long wok ya blong hed long famle, woman blong hem mo ol pikinini blong hem bambae oli glad tumas blong obei long hem. God i wokem woman blong i givhan long man mo blong hem i prapa fren blong man blong hem. (Jen. 2:18) Sipos woman i gat longfala tingting mo i sapotem mo respektem man blong hem, bambae man i glad long woman blong hem mo bambae samting ya i givim ona long God tu. (1 Pita 3:1-4) Taem ol hasban mo waef oli respektem advaes blong Baebol long saed blong hed blong famle, oli givim gudfala eksampol long ol pikinini blong olgeta olsem wanem blong obei long God.
From we yumi obei long God, yumi gat stret tingting long “ol haeman” long gavman we “oli stap long prapa ples blong olgeta from God.” (Rom 13:1-7, NW ) Ol Kristin oli folem loa mo pem takis blong olgeta, ale, long rod ya oli ‘givimbak samting we i blong Sisa i go long Sisa, mo samting we i blong God, i go long God.’ (Mat. 22:21) Sipos yumi obei mo folem loa blong gavman long evri samting we i no agensem loa blong Jeova, yumi no westem paoa blong yumi, be yumi yusum long impoten wok ya blong talemaot gud nius blong Kingdom blong God we i rul finis.—Mak 13:10; Wok 5:29.
From we ol Kristin oli folem ol rul blong Baebol, oli traehad blong joengud wetem ol masta blong olgeta mo ol wokman. Samtaem hemia i no isi, be ol man blong God oli traehad blong gat pis wetem olgeta man. Oli no giaman mo stil mo oli mekem we ol masta blong olgeta oli save trastem olgeta. (Rom 12:18; 1 Pita 2:18) From samting ya, oli no joen long ol rao mo faet, mo oli no mekem samting we tingting blong olgeta bambae i stikim olgeta from.
Fasin ya blong obei long tiokratik oda i gat paoa long evri samting we yumi mekem long laef. Bilif blong yumi i mekem se yumi save luk long tingting blong yumi nambawan taem ya we olgeta man bambae oli obei long Jeova God. (1 Kor. 15:27, 28) Olgeta we oli glad blong luksave Jeova olsem King blong olgeta bambae oli kasem bigfala blesing taem oli gohed blong obei long Hem gogo i no save finis.