Ol Brata Mo Sista Long Fulwol Oli Joen Gud

BLONG 1,500 yia, nesen blong Isrel nomo i karem nem blong Jehova God. Be biaen, Jehova i “lukluk i go long ol man blong ol nesen, blong hem i tekemaot sam long olgeta blong oli karem nem blong hem.” (Wok 15:14) Ol man we oli karem nem blong hem, oli witnes blong hem, nomata weples oli stap long wol. Blong hivimap ol man ya we oli karem nem blong God, ol disaepol oli mekem olsem Jisas i talem, se: “Yufala i mas go long ol man long olgeta nesen, yufala i pulum olgeta oli kam disaepol blong mi, mo yufala i baptaesem olgeta long nem blong Papa, mo long nem blong Pikinini, mo long nem blong tabu spirit. Mo yufala i tijim olgeta blong oli folem olgeta tok ya we mi mi talem finis long yufala.”—Mat. 28:19, 20.

² Taem yu givim laef blong yu i go long Jehova mo yu baptaes, yu yu kam wan disaepol blong Jisas Kraes. Yu yu joen wetem kampani blong ol Kristin brata mo sista long fulwol. Oli joen gud, nating se oli kamaot long wanem kantri o laen, mo nating se oli rij o oli pua. (Sam 133:1) Taswe long kongregesen, yu lavem mo respektem ol narafala Kristin we oli kamaot long defdefren kantri, kala, mo oli no skul gud. I no gat wan samting we i save mekem yumi seraot. Lav we i joenem yumi i strong moa i winim lav we i joenem ol fren, ol man blong wan skul, mo ol famle.—Mak 10:29, 30; Kol. 3:14; 1 Pita 1:22.

TINGTING I JENIS

³ Samfala oli faenem i had blong sakemaot tingting ya blong agensem man from kala blong skin, pati blong politik, o from we hem i no gat mane mo wan hae posisen. I gud olgeta oli tingbaot ol fas Kristin we oli man Jiu. Fastaem, olgeta ya oli agensem ol man blong ol narafala laen, be oli mas sakemaot tingting ya. Jehova i kaen long Pita, taem hem i mekemrere tingting blong Pita bifo we hem i sanem hem i go blong luk komanda blong ami blong Rom, we nem blong hem Konilias.—Wok, japta 10.

⁴ Long wan vison, Pita i luk ol animol we oli no klin folem bilif blong ol man Jiu. Pita i harem wan voes we i talem se hem i mas kilim ol animol ya mo kakae. Pita i no wantem, nao voes we i kamaot long heven i talem se: “Ol samting we God i mekem oli klin finis, yu stop blong talem se oli doti.” (Wok 10:15) Yes, God i givhan long Pita blong i jenisim tingting blong hem. Nao Pita i rere blong go luk man ya blong narafala laen. Taem hem i go luk Konilias, hem i talem long ol man we oli stap se: “Yufala i save gud se folem Loa, i no stret nating blong wan man Jiu i joen o i go klosap long wan man blong narafala laen. Be God i soemaot finis long mi se mi no mas talem se wan man i doti no i no klin long fes blong hem. From samting ya nao, taem olgeta ya oli talem se mi mas kam, mi no talem wan samting, be mi kam nomo.” (Wok 10:28, 29) Samting we i hapen afta, i soemaot long Pita se Jehova i glad long Konilias mo olgeta we oli stap long haos blong hem.

⁵ Sol blong Tasas i wan Farisi we i skul gud. Be hem i mas mekem tingting blong hem i stap daon blong joen wetem ol man we bifo hem i ting se oli nating nomo. Antap moa, hem i mas obei long ol man ya. (Wok 4:13; Gal. 1:13-20; Fil. 3:4-11) Mo tu, yumi save tingbaot olsem wanem ol man olsem Sejas Polas, Denis, Onesimas, mo plante narafala, oli mas jenisim tingting blong olgeta taem oli bilif long gud nius mo kam ol disaepol blong Jisas Kraes.—Wok 13:6-12; 17:22, 33, 34; Flm. 8-20.

HOLEMTAET FASIN YA BLONG JOEN GUD

⁶ Taem yu luk we ol brata mo sista long kongregesen oli lavlavem olgeta, ating samting ya i pulum yu yu kam long Jehova mo oganaesesen blong hem. Yu luksave se hemia nao lav ya we Jisas Kraes i talem se ol disaepol blong hem oli mas gat, i se: “Mi mi givim wan niufala komanmen long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala. Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:34, 35) Mo taem yu luk se ol brata mo sista long fulwol oli lavlavem olgeta, hemia i pulum yu blong yu kam klosap moa long Jehova mo oganaesesen blong hem. Baebol i talem se, long ol las dei, plante man bambae oli joen gud blong wosipim Jehova long pis. Yu yu wan long olgeta ya.—Maeka 4:1-5.

⁷ I gat plante risen from wanem ol man tede oli seseraot. Taswe, maet i luk olsem se ol man we “oli kamaot long olgeta kantri, mo long olgeta traeb, mo long olgeta grup blong man, mo long olgeta lanwis,” oli no save joen gud. (Rev. 7:9) Yu traem tingbaot olsem wanem ol man we oli laef long ol taon tede, oli defren long ol man we oli stap yet long kastom. Mo tu, ol man blong sem kala mo kantri oli stap raorao from bilif blong olgeta. Tingting ya se wan kantri i moagud bitim narafala kantri i mekem se politik i strong, nao ol man oli seseraot. Ol rijman mo ol puaman oli seraot, mo plante narafala samting bakegen i mekem ol man oli seraot. Taswe, ?hu i naf blong mekem ol man blong defdefren kantri, lanwis, grup, mo fasin blong laef, oli joen gud? I gat wan nomo we i naf blong mekem olsem, hemia God Ya We i Gat Olgeta Paoa.—Sek. 4:6.

⁸ Tede Jehova i stap mekem ol man olsem oli joen gud. Mo taem yu givim laef blong yu i go long Jehova mo yu baptaes olsem wan Witnes, yu yu kam wan long olgeta. Yu harem gud blong stap wetem ol man we oli joen gud, taswe yu tu yu mas givhan blong mekem fasin ya i stap strong. Yu mekem olsem taem yu folem tok blong aposol Pol long Galesia 6:10 se: “Taem yumi gat janis, yumi mas mekem i gud long olgeta man, antap moa, long olgeta we oli brata mo sista blong yumi, from we olgeta tu oli bilif.” Yumi folem narafala advaes ya tu se: “Yufala i no mas mekem samting blong man i rao nomo no blong leftemap yufala nomo, be yufala i mas mekem tingting blong yufala i stap daon mo yufala i mas luk ol narafala man se oli hae moa long yufala. Mo long semtaem, yufala i no mas tingbaot yufala nomo, be yufala i mas tingbaot ol narafala man tu.” (Fil. 2:3, 4) Yumi mas gat sem tingting olsem Jehova long ol brata mo sista blong yumi. Olsem nao, bambae yumi gat pis wetem olgeta mo yumi hapi.—Efes. 4:23, 24.

OL BRATA MO SISTA OLI GIVGIVHAN LONG OLGETA

⁹ Aposol Pol i talem wan gudfala pijatok blong soemaot olsem wanem evriwan long kongregesen oli joen gud mo oli givgivhan long olgeta. (1 Kor. 12:14-26) Maet yumi stap longwe long ol narafala brata mo sista, be yumi save givhan long olgeta yet. Sipos samfala oli ronem mo kilim ol brata blong yumi long wan ples, yumi evriwan i harem nogud. Sipos samfala oli sot long plante samting, o disasta i spolem wan ples, o wan faet i kamaot o wan narafala samting olsem, yumi evriwan i hareap blong givim samting we oli nidim, mo blong leftemap tingting blong olgeta.—2 Kor. 1:8-11.

¹⁰ Evri dei, yumi mas prea from ol brata mo sista blong yumi. Samfala oli stap traehad blong winim samting we i traem olgeta. Samfala oli kasem sam trabol we ol man oli harem nius blong hem. Be samfala, ol man oli no save trabol blong olgeta. Maet ol man we oli wok wetem olgeta o famle blong olgeta nomo oli agensem olgeta. (Mat. 10:35, 36; 1 Tes. 2:14) Long taem olsem, yumi wari long olgeta, from we yumi evriwan i wan kampani nomo blong ol brata mo sista long fulwol. (1 Pita 5:9) Mo tu, i gat ol brata we oli wok had long wok blong Jehova mo oli stap lidim wok blong prij long ol kongregesen, mo olgeta we oli lukaot long wok long fulwol. Olgeta evriwan ya, oli nidim we yumi prea from olgeta. Nating sipos yumi no save mekem wan samting blong givhan long olgeta, be taem yumi prea from olgeta, yumi soemaot se yumi lavem olgeta mo yumi intres long olgeta.—Efes. 1:16; 1 Tes. 1:2, 3; 5:25.

¹¹ Long ol las dei ya, i gat plante trabol we i mekem se laef blong ol man i olbaot. Taswe, ol man blong Jehova oli mas rere blong givgivhan long olgeta. Samtaem, i gat ol disasta, olsem etkwek mo bigfala wota i ron mo spolem ol ples. Long taem olsem, ol grup blong givhan long taem blong disasta oli go blong bildim bakegen ol haos, givim kakae mo klos, mo maet mane tu. Ol fas Kristin oli soemaot nambawan eksampol long saed ya. Ol disaepol long Antiok oli tingbaot advaes blong Jisas, nao oli sanem plante samting i go long ol brata long Judia. (Wok 11:27-30; 20:35) Biaen, aposol Pol i leftemap tingting blong ol Kristin long Korin blong oli folem plan blong givhan long olgeta we oli kasem trabol, nao evri samting i save ron gud, i no olbaot. (2 Kor. 9:1-15) Tede, taem wan bigfala trabol olsem i kasem ol brata, oganaesesen mo ol Kristin wanwan oli kwik blong givhan mo givim ol samting we ol brata blong olgeta oli nidim.

OL MAN WE OLI WOK BLONG JEHOVA NOMO

¹² Oganaesesen blong Jehova we i joen gud i stap folem wan gudfala plan blong mekem wok blong hem. Tede, Jehova i wantem se yumi talemaot gud nius blong Kingdom long olgeta ples long wol blong witnes long olgeta nesen. (Mat. 24:14) Long semtaem, Jehova i wantem se yumi folem ol gudfala fasin we hem i glad long olgeta. (1 Pita 1:14-16) Yu mas rere blong putum yu yu stap daon long narafala, mo wok wanples blong mekem gud nius i goaot moa. (Efes. 5:21) Naoia i moa impoten i bitim bifo, yumi no mas tingbaot yumi nomo, be yumi mas mekem wok blong Kingdom fastaem long ol narafala samting long laef. (Mat. 6:33) Sipos yumi mekem olsem mo yumi joen gud blong talemaot gud nius, bambae yumi glad naoia, mo bambae yumi kasem blesing blong olwe long fiuja.

¹³ Yumi ol Witnes blong Jehova, yumi defren long ol narafala man. Yumi wok blong Jehova nomo, yumi gat klin fasin, mo yumi wok strong. (Taet. 2:14) Wosip blong yumi i mekem se yumi defren long ol narafala. Yumi wok gud wetem ol brata mo sista blong yumi long fulwol, mo i olsem we yumi evriwan i toktok wan lanwis nomo, hemia trutok. Mo tu, yumi folem ol trutok ya long laef blong yumi. Jehova i yusum Sefanaea blong talemaot samting ya, i se: “Bambae mi jenisim lanwis blong ol man i kam wan klin lanwis, olsem nao olgeta evriwan oli save singaot long nem blong Jehova, blong oli wok blong hem we solda blong wan i joen long solda blong narawan.”—Sef. 3:9.

¹⁴ Mo tu, Jehova i pulum Sefanaea blong tokbaot fasin blong ol brata mo sista long taem blong yumi, i se: “Ol man Isrel we oli stap yet bambae oli no mekem fasin we i no stret, bambae oli no talem wan giaman tok, mo bambae oli no yusum maot blong olgeta blong trikim man, bambae oli kakae mo oli ledaon, mo bambae i no gat man i save mekem olgeta oli fraet.” (Sef. 3:13) Yumi ol Witnes blong Jehova yumi kasem save long trutok blong Baebol, mo yumi jenisim laef blong yumi blong mekem i laenap wetem ol fasin we Jehova i glad long olgeta. From samting ya, yumi stap joen gud mo yumi glad blong wok tugeta. Hemia samting we ol narafala man oli ting se ol sinman oli no naf blong mekem. Tru ya, yumi defren long ol narafala man, yumi ol man blong Jehova nomo, mo long fulwol, yumi ona long hem.—Maeka 2:12.