Oli Sanem Pol i Go Long Rom

Namba tri trip blong Pol i finis long Jerusalem. Long ples ya, oli holemtaet hem, mo oli sakem hem i go long kalabus. Wan naet, hem i luk wan vison, nao Jisas i talem long hem se: ‘Bae yu go prij long Rom.’ Oli aot long Jerusalem blong tekem Pol i go long Sisaria, mo hem i stap kalabus tu yia long ples ya. Taem Pol i pas long hedgavman Festas blong i jajem hem, Pol i talem se: ‘Mi wantem go long Rom, blong Sisa i jajem mi.’ Festas i se: “Bambae yu go long Sisa from we yu apil long Sisa.” Oli putum Pol long sip blong i go long Rom, wetem tufala brata ya Luk mo Aristakas.

Taem oli stap long solwota, wan bigfala hariken i kam, we i gohed blong plante dei. Evriwan oli ting se bambae oli ded. Be Pol i talem se: ‘Olgeta, mi luk wan enjel long wan drim, mo hem i talem se: “Pol, yu no fraet. Bae yu kasem Rom, mo evriwan long sip ya bae oli laef.” !Yufala i no fraet! !Bae yumi no ded!’

Hariken ya i gohed blong 14 dei, nao oli luk we oli kam klosap long aelan blong Molta. Sip i rek, mo ol bigfala wef oli brebrekem, be ol 276 man long sip ya oli kasem aelan. Sam oli swim i goso, mo sam narafala oli flot long ol plang blong sip. Ol man Molta oli kaen gud long olgeta, mo oli laetem wan faea blong oli stap wom klosap long hem.

Tri manis biaen, ol soldia oli tekem Pol i go long Rom long wan narafala sip. Taem oli kasem Rom, ol brata oli kam blong mitim hem. Taem Pol i luk olgeta, hem i talem tangkiu long Jehova, mo tingting blong hem i kam strong. Nating se Pol i wan presina, be oli letem hem i rentem wan haos long Rom, mo wan soldia i gad long hem. Hem i stap tu yia long ples ya. Ol man oli stap kam luk hem, mo hem i prij long olgeta, i tokbaot Kingdom blong God, mo i tijim olgeta long saed blong Jisas. Mo tu, Pol i raetem leta long plante kongregesen long Esia Maena mo Judia. I tru tumas se Jehova i yusum Pol blong mekem gud nius i go long ol narafala kantri.