Stadi 7

Yusum Ol Save We i Tru

Luk 1:3

?I MINIM WANEM? Yusum ol pruf we i tru blong givhan long ol man blong oli kasem poen.

Lukaot save we i tru. Yusum ol save we i kamaot long Tok blong God, mo sipos yu gat janis, ridimaot stret long Baebol. Sipos yu yusum sayens, wan nius, wan samting we i hapen long wan man, o wan narafala samting blong sapotem ol tok blong yu, jekem fastaem se i tru mo i no gat sam niufala save long saed ya.
No jenisim mining. Eksplenem ol vas blong Baebol stret folem tingting we ol vas raonabaot oli givim, mo stret folem stamba tingting blong Baebol mo ol buk blong “gudfala slef we i waes.” (Mat. 24:45) Sipos yu yusum save we i kamaot long ol narafala buk, meksua se yu no jenisim mining blong hem.

Yu mas lukaot gud se yu no go tumas, nao yu giaman long saed blong ol save ya mo ol namba. Lukaot se yu no jenisim “sam man” i kam “plante man,” o “samtaem” i kam “oltaem,” o “maet i no hapen” i kam “i no save hapen.”
Pulum ol man blong oli tingting long ol save ya. Afta we yu ridim wan vas o yu talem sam save we i kamaot long wan buk, askem ol gudfala kwestin o yusum wan eksampol o pijatok blong givhan long ol man blong oli kasem save.