Stadi 4

Pulum Tingting i Go Long Vas

Matiu 22:41-45

?I MINIM WANEM? Bifo we yu ridim wan vas, yu mas rerem tingting blong ol man.

Tingbaot from wanem yu yusum vas ya. Bifo we yu ridim wan vas, yu talem ol tok we i pulum man blong tingbaot bigfala poen long vas ya.

Yu mas tingbaot ol narafala vas raonabaot. Sipos yu talem nem blong man we i talemaot ol tok ya o i raetem buk ya, meksua se yu talem stret man.
Soemaot se ol tok blong yu i stanap long Baebol. Taem yu stap toktok long ol man we oli bilif long God, tokbaot Baebol se i “Tok blong God.” Hemia bambae i soemaot se tijing we yu givim i kamaot long God.
Pulum tingting i go long vas. Askem wan kwestin we vas ya bambae i ansarem, tokbaot wan problem we vas ya bambae i givhan blong winim, o talem wan trutok we vas ya bambae i soemaot.

Tingbaot save we ol man oli gat finis long samting we yu tokbaot mo long vas ya. Nating se oli save gud vas ya, traem pulum olgeta blong oli tingting bakegen long hem mo makem sam niufala poen.