STATEM WAN STORIAN
LESEN 4
Gat Tingting Daon
Stamba Trutok: “Yufala i mas mekem tingting blong yufala i stap daon mo yufala i mas luk ol narafala man se oli hae moa long yufala.”—Fil. 2:3.
?Pol i Mekem Wanem?
1. Wajem VIDEO, o ridim Ol Wok 26:2, 3. Biaen askem ol kwestin ya:
?Olsem wanem Pol i soem se hem i gat tingting daon, taem hem i toktok long King Agripa?
?Olsem wanem Pol i pulum King Agripa blong i lukluk i go long Jehova mo Baebol, be i no long hem wan?—Yu luk Ol Wok 26:22.
?Yumi Lanem Wanem Long Eksampol Blong Pol?
2. Man i glad moa blong lesin long mesej blong yumi, sipos yumi gat tingting daon mo yumi toktok wetem respek.
Folem Eksampol Blong Pol
3. Toktok wetem respek. No givim tingting long man se yu save evri samting mo ol narafala man oli no save wan samting nating. Toktok wetem man long fasin we i soemaot se yu gat respek.
4. Soemaot klia se ol samting we yu stap tijim oli kamaot long Baebol. Ol samting we Baebol i talem i save tajem hat blong ol man. Taem yu yusum Baebol, yu stap givhan long olgeta blong oli bilif strong moa long Baebol.
5. Stap kwaet. Yu no mas traem pruvum se samting we yu talem i stret. Yumi no wantem agiu. Yumi soem se yumi gat tingting daon taem yumi stap kwaet mo yumi luksave wetaem blong aot. (Prov. 17:14; Taet. 3:2) Sipos yu toktok gud long man, maet nekis taem bambae hem i glad moa blong lesin long mesej blong yumi.