Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • w91 7/1 pp. 17-22
  • Ol Hapi Yangfala Long Wok Blong Jeova

I no gat video yet long haf ya.

Sori, i gat problem taem i stap lodem video ya.

  • Ol Hapi Yangfala Long Wok Blong Jeova
  • Wajtaoa—1991
  • Ol Sabtaetol
  • Sem Samting
  • Bilif Blong Yu Wan
  • Kasem Save
  • Mekem Fasin Tangkyu i Gru Moa
  • Gohed Moa Blong Mekem Wok Blong God
  • Tekem Disisen Blong Mekem Wok Blong God Foreva
    Save Blong Lidim Long Laef We i No Save Finis
  • Ol Yangfala, Traehad Blong Wantem Tumas Blong Mekem Wok Blong Jeova
    Wajtaoa—2010
  • Ol Yangfala​—?Yufala i Rere Blong Baptaes?
    Wajtaoa Stadi—2016
  • Ol Yangfala—Jusum Blong Mekem Wok Blong Jeova
    Wajtaoa—2006
Luk Moa Samting
Wajtaoa—1991
w91 7/1 pp. 17-22

Ol Hapi Yangfala Long Wok Blong Jeova

“Ol pikinini tu, ol man oli save olgeta from ol samting we oli stap mekem, from fasin blong olgeta, sipos i klin mo i stret, no no gat.”​—⁠PROVEB 20:​11, “New International Version.”

1. ?Wanem sam bigfala samting we Baebol i talem long saed blong Samuel?

TAEM yangfala Samuel i stat blong mekem “minista wok” long haos tapolen blong Jeova long Saelo, maet hem i gat tri, no fo, no faef yia blong hem nomo. Wan wok we hem i mas mekem oltaem i blong openem “ol doa blong haos blong Jeova.” Baebol i talem se: “Samuel i stap gruap moa long bodi blong hem. Mo oltaem Jeova i glad moa long hem, mo ol man tu oli glad moa long hem.” Taem hem i bigman, hem i lidim nesen ya Isrel i kambak long trufala wosip blong God. Hem i mekem wok blong God “gogo laef blong hem i finis.” Nating we hem i kam “olfala mo hea blong hem i waet,” be hem i stap talem long ol man yet blong “fraet long Jeova, mo . . . mekem wosip long hem long trutok.” ?Bambae yu yu glad sipos ol man oli tokbaot yu long gudfala fasin olsem we Baebol i bin talem ol gudfala samting ya long saed blong Samuel bifo?​—⁠1 Samuel 1:24; 2:​18, 26; 3:15; 7:​2-4, 15; 12:​2, 24.

2. ?Ol smosmol pikinini oli lanem wanem long ol miting blong ol man blong Jeova tede?

2 Sipos yu yu wan Wetnes blong Jeova no yu stap go oltaem long ol Kristin miting blong olgeta, traem lukluk ol man we oli sidaon raonabaot long yu long Haos-Kingdom naoia, taem yu yu stap stadi long magasin ya. Ol man ya oli no olfala sem mak. Ating i gat sam man we oli ‘olfala mo hea blong olgeta i waet’ finis. I gat sam papa mama, sam yangfala, sam smol pikinini, mo sam we oli bebi nomo yet. ?Ol smosmol pikinini ya oli stap lanem sam samting? Yes. Traem storeyan wetem samfala we oli stat kam long ol miting taem oli smol nomo. Bambae oli talem stret long yu we taem oli pikinini nomo, oli lanem blong soemaot respek long God, blong laekem ol man blong hem, mo blong tinghae long ol haos wosip blong hem. Sloslou ol smolwan olsem oli stap lanem sam bigfala trutok. Plante yangfala, taem oli gruap moa long save mo fasin tangkyu, oli joen long kampani blong ‘ol gel wetem ol boe, mo ol olfala wetem ol pikinini tu,’ we man blong raetem Ol Sam i tokbaot. Hem i talem long olgeta se oli mas “presem nem blong Hae God [Jeova, NW]. Nem blong hem i hae moa, i winim ol narafala nem.”​—⁠Ol Sam 148:​12, 13.

3. ?Olsem wanem ol yangfala we oli save gud long Baebol oli gat tingting long laef we i defren long olgeta we oli no save gud long Baebol?

3 Sipos yu yu wan yangfala we papa mama blong yu oli tekem yu yu go long ol miting oltaem, yu yu gat wan spesel blesing. Plante yangfala long wol oli trabol tumas from ol problem long wol. Sam long olgeta oli fraet se ol man bambae oli spolem wol ya olgeta. Yu yu save se God bambae i no letem samting ya i hapen. Yu yu save se bambae hem i no letem ol man oli gohed blong spolem naes wol blong yumi. God i gat defren tingting. Baebol i talem se hem bambae i “spolem ol man ya we oli stap spolem wol.” Yu yu save promes blong Baebol, se kolosap nao bambae i gat wan gudfala fyuja, wan nyufala wol we bambae God i mekem stret fasin i stap long hem.​—⁠Revelesen 11:18; Ol Sam 37:29; 2 Pita 3:⁠13.

Bilif Blong Yu Wan

4. ?Taem ol yangfala oli save gud long ol fasin mo wei blong God, oli mas mekem wanem? ?Long saed ya, olsem wanem yangfala Samuel i givim wan gudfala eksampel?

4 Fastaem, ating yu yu stap folem Kristin rod from we papa mama blong yu nomo i pulum yu. Fastaem ating yu yu kam long ol Kristin miting from we tufala i tekem yu nomo. Mo ating yu yu stap go long wok blong prij from we tufala i stap go tu. Be sloslou, yu wan yu stat kasem glad from wok blong Jeova mo fasin blong obei long hem. Mama blong Samuel i soemaot stret rod long Samuel. Be afta, Samuel hem wan i mas folem rod ya. Baebol i talem se: “Ol pikinini tu, ol man oli save olgeta from ol samting we oli stap mekem, from fasin blong olgeta, sipos i klin mo stret, no no gat.”​—⁠Proveb 20:​11, NIV.

5. (a) ?Wanem ol gudfala samting we Baebol i talem long yumi? (b) ?Pol i talem wanem long Timote blong soemaot we Tok blong God i impoten tumas?

5 Baebol i talem ol samting we God i wantem blong yumi mekem. Baebol i soemaot klia olsem wanem blong mekem God i glad. Mo hem i givim fulap save we i blong givhan long yumi nomo. Aposol Pol i talem long yangfala we i stap givhan long hem, Timote, i se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”​—⁠2 Timote 3:​16, 17.

6. ?Buk blong Proveb i talem se save mo waes blong God i impoten olsem wanem?

6 Mo tu, Baebol i talem se yumi mas ‘lesin long advaes we i stretem yumi, mo yumi mas kam waes.’ Hem i talem se yumi mas “holemtaet” ol loa blong God. Yumi mas “singaot long dip save,” mo yumi mas “stap lukaot” fasin luksave olsem we man i stap lukaot wan sas samting we i haed. Sipos yu yu folem advaes ya, “bambae yu save kasem save long fasin fraetgud long Jeova, mo yu save faenem stret save blong God.” Mo tu, yumi save tingbaot advaes ya: “Mo naoia ol pikinini, yufala i lesin long mi. Yes, olgeta we oli holemtaet ol rod blong mi, bambae oli harem gud. Lesin long ol advaes blong stretem yufala mo kam waes from. Yufala i no mas slak blong mekem olsemia. Man we i stap lesin long mi, hem i harem gud. . . . From we man we i faenem mi bambae hem i faenem laef, mo Jeova i soemaot gladhat long hem.” ?Yu yu tinghae long Baebol olsemia? ?Yu yu traehad olsemia blong lanem ol samting we Baebol i stap talem?​—⁠Proveb 2:​1-5; 8:​32-35.

Kasem Save

7. ?Wanem sam samting we oli moa impoten, we yumi mas lanem?

7 Sam yangfala oli save evri samting long saed blong spot. Mo oli save talem nem blong olgeta grup we oli stap singsing. I isi nomo blong olgeta oli lanem ol samting ya mo oli holem i stap long tingting blong olgeta, from we oli intres long samting ya. Be samting we i moa impoten, se: ?Long saed blong God, ol yangfala ya oli save wanem? Tingbaot ol samting we God i mekem finis. Hem i wokem heven mo wol. Hem i talemaot finis ol samting we ol man bambae oli mekem, longtaem finis hem i talemaot ol samting we oli stap kamtru naoia. Baebol i givim fulap save long saed blong God, be i no hemia nomo. Hem i tijim yumi olsem wanem blong mekem God i glad. Hem i lanem yumi olsem wanem blong harem gud long laef naoia, mo olsem wanem yumi save kasem laef we i no save finis long nyufala wol we stret fasin nomo bambae i stap long hem. ?Yu ting se save ya i moa impoten, i bitim we yu save nem blong tim we i win long futbol? ?Mo hem i moa impoten i bitim we yu lanem ol nem blong ol man we oli plei myusek, we i no longtaem ol man bambae oli fogetem olgeta?​—⁠Aesea 42:​5, 9; 46:​9, 10; Emos 3:⁠7.

8. ?Josaea mo Jisas tufala i givim wanem gudfala eksampel?

8 Taem yangfala King Josaea i gat 15 yia blong hem, hem i “stat blong lukaotem God blong bubu blong hem, Deved.” Taem Jisas i gat 12 yia blong hem, hem i stap “sidaon long medel blong ol tija blong ol man Isrel,” long haos blong Jeova. “Hem i stap lesin long tok blong olgeta, mo i stap askem kwestin long olgeta.” Nomata wanem yia blong yu, traem tingbaot: ?Yu yu olsem Josaea mo Jisas? ?Yu yu wantem lanem ol samting we God i mekem finis mo ol samting we bambae hem i mekem long fyuja?​—⁠2 Kronikel 34:3; Luk 2:⁠46.

9. (a) ?Plante yangfala oli gat wanem problem? (b) ?Wanem i save mekem i moa isi blong rid mo blong stadi? ?Samting ya i tru long yu wan?

9 Maet yu yu talem se: ‘Be i hadwok blong stadi.’ Plante man, sam yangfala mo sam olfala tu, oli neva rid plante. From samting ya, i no isi long olgeta blong rid. Sipos yu rid plante, bambae i moa isi long yu. Sipos yu stadi plante, bambae i moa isi blong lanem plante samting. Sloslou yu stap joenem ol nyufala save long ol samting we yu yu save finis. From samting ya, i moa isi blong yu kasem save long olgeta mo blong yu holem olgeta oli stap long tingting blong yu.

10. (a)?Olsem wanem ol Kristin miting oli save givhan long yu moa? (b) ?Long saed ya, wanem ekspiryens blong yu wan?

10 ?Wanem i save givhan long yu blong lanem moa long saed blong God? Ating yu stap go long sam Kristin miting nomo. Blong lanem moa yu save go long olgeta miting. ?Yu yu stap mekemrere ol miting fastaem, mo yu stap givim ansa? Ating yu save mekem olsemia. Wan eksampel: Long haf blong magasin we yumi stap stadi long hem naoia, sipos yu ridim ol vas blong Baebol we mifala i raetem finis, ?yu ting se bambae yu kasem moa save, we i dip moa? ?Yu yu stap raetem sam smol samting kolosap long ol haf long magasin ya, blong yu save tingting bakegen long ol vas, mo wanem we oli lanem long yumi? ?Taem yu ansa long miting, yu yu yusum wan long ol vas ya long ansa blong yu, blong soemaot se yu yu tinghae long ol advaes blong Baebol, we magasin ya i stanap long hem? Wan elda we oltaem hem i stap go long ol miting plante yia finis, hem i talem se: “Sipos mi mi no mekemrere ol haf blong miting fastaem, i hadwok blong mekem tingting blong mi i stap long ol samting we oli kamaot long miting. Be taem mi stadi gud fastaem long ol haf blong miting, mi mi glad tumas blong folem.”

11. ?Olsem wanem ol tok we oli stanap long Baebol oli save givhan long yu moa? ?From wanem samting ya i impoten tumas?

11 Taem yu yu stap lesin long ol tok olsem pablik tok, ?yu yu stap raetemdaon sam tok blong hem? Fasin ya i save givhan long yu blong skelem ol save long tok ya, mo blong mekem se tingting blong yu i stap long ol samting we i kamaot long tok ya. Mo yu save skelem ol samting we yu harem wetem ol samting we yu yu save finis, blong i isi moa blong kasem save mo holem i stap long tingting blong yu. ?Yu stap mekem olsem? Jisas i prea se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:⁠3) ?Ol save we bambae yu kasem laef from, hem i beswan save, no no gat? Makemgud tok blong Baebol long saed ya. Hem i talem se: “Jeova hem wan i givim waes. Save mo fasin luksave oli kamaot long maot blong hem. Taem waes i go insaed long hat blong yu, mo sol blong yu i glad blong kasem save, nao fasin blong tingtinggud bambae i lukaot gud long yu, mo fasin luksave bambae i mekem yu yu stap sefgud.”​—⁠Proveb 2:​6, 10, 11.

Mekem Fasin Tangkyu i Gru Moa

12. ?Wanem sam nambawan samting we God i mekem finis blong yumi?

12 ?Yumi rili gat tangkyu long God from ol samting we hem i mekem long yumi? Hem i wokem wan naes wol mo hem i mekemrere wol ya blong ol laef samting oli save stap long hem. Hem i wokem faswan papa mama blong yumi. From samting ya, yumi save bon. Hem i putum yumi insaed long wan famle we i save halpem yumi, mo insaed long wan kongregesen we oli laekem yumi tumas. (Jenesis 1:​27, 28; Jon 13:35; Hibrus 10:25) Hem i sanem fasbon Pikinini blong hem i kam long wol blong tijim yumi moa long saed blong Hem Wan, mo blong givim laef blong hem blong pemaot yumi, blong yumi save kasem laef we i no save finis. ?Yu yu rili gat tangkyu from ol nambawan presen ya? ?Ol samting ya oli pusum yu blong obei long God taem hem i singaot yu blong lanem moa long saed blong hem mo blong mekem wok blong hem?​—⁠Matyu 20:28; Jon 1:18; Rom 5:⁠21.

13. ?From wanem yu ting se God i intres long ol man wanwan?

13 God we i wokem heven mo wol hem i intres tumas long ol man. Hem i talem se: “[Ebraham hem i] fren blong mi.” Mo hem i talem long Moses se: “Mi mi save nem blong yu.” (Aesea 41:8; Eksodas 33:17) Revelesen i talem se God i gat wan samting olsem wan buk, “buk blong laef.” Buk ya i gat nem blong ol trufala man blong God i stap long hem, “i stat long taem we God i jes wokem wol ya.” ?Bambae nem blong yu tu i stap long buk ya?​—⁠Revelesen 3:5; 17:​8, NW; 2 Timote 2:⁠19.

14. ?Sipos yu yu stap folem ol loa blong God, olsem wanem samting ya i save mekem laef blong yu i moa gud?

14 Ol rul blong God oli wok gud. Sipos yu obei long ol rul blong hem yu save blokem fulap trabol​—⁠rabis fasin long saed blong seks, fasin blong tekem drag, fasin drong, ol bebi we oli bon taem mama i no mared yet, ol rabis sik, raf fasin, fasin blong kilim man i ded mo plante narafala trabol bakegen. Sipos yu folem ol loa blong God, samting ya bambae i givhan long yu blong faenem ol trufala fren, mo blong harem gud moa long laef. ?Yu ting se i moa gud blong mekem olsemia? (1 Korin 6:​9-11) Maet sam yangfala oli gat strong tingting finis blong obei long ol loa blong God. Be oli save kasem moa paoa blong mekem ol samting we i stret nomo. Baebol i talem se: “Hae God [Jeova, NW]. Olgeta we oli stap obei long yu, yu yu stap mekem i gud tumas long olgeta.” Mo tu Baebol i promes se God “i no save lego ol stret man ya we tingting blong olgeta i stap strong long hem.” Yes, ‘hem i no save gowe long ol man we nem blong hem i stap finis long olgeta.’​—⁠Ol Sam 18:25; 37:28; 94:14; Aesea 40:​29-31.

Gohed Moa Blong Mekem Wok Blong God

15. ?Solomon i givim wanem advaes we i kamaot long God i go long ol yangfala?

15 ?Ol mak we yu yu wantem kasem long laef, oli joen wetem olfala wol ya we i stap lus, no wetem nyufala stret wol ya? ?Yu yu stap lesin long God, no yu stap lesin long ol man we oli agensem God, we oli waes long ol tingting blong wol? ?Yu yu stap putum ol pleplei, hae edukesen, no wok blong yu we i kakae fulap taem i fastaem long God mo wok blong hem? Waes King Solomon i raetem ful buk blong Eklesiastis blong soemaot wanem i mas stap fas ples long laef blong yumi. Hem i finisim ol tok blong hem olsem, se: “Yu mas tingbaot Bigfala Man we i wokem yu long yang taem blong yu, bifo we taem blong trabol i kam long yu, bifo we ol yia oli kam we yu yu stap talem se: ‘Mi mi harem nogud long olgeta.’ ” Naoia mi skelemgud olgeta samting finis, mo mi save finisim tok blong mi olsem, se: ‘Fraet long Trufala God mo obei long olgeta loa blong hem. Hemia nao olgeta samting we man i mas mekem.’ ”​—⁠Eklesiatis 12:​1, 13.

16. ?Olsem wanem ol yangfala oli save traehad blong kasem sam moa blesing?

16 Ol Kristin brata blong yu we oli olfala moa long yu​—⁠hemia ol elda, ol paenia, seket mo distrik elda blong yu​—⁠fastaem olgeta oli pikinini tu. ?From wanem olgeta oli kasem ol blesing we oli harem gud long olgeta naoia? From we oli laekem tumas God mo oli wantem mekem wok blong hem. Plante blong olgeta, taem oli yangfala nomo, oli yusumgud taem blong olgeta blong kasem fulap save mo ekspiryens long laef. Oli stadi strong mo joen long ol miting. Oli joen long wok blong tijim ol narafala man. Mo oli traehad blong kasem sam moa blesing bakegen​—⁠olsem wok blong paenia, wok long Betel, no sam narafala wok we i givim blesing long olgeta. Ol yangfala ya oli no ‘spesel.’ Olgeta oli bin intres long ol samting we yu yu intres long olgeta, mo oli bin wari long ol samting we yu yu stap wari long olgeta. Be olgeta oli traehad blong mekem advaes ya i wok long laef blong olgeta, se: “Long wanem wok we yufala i mekem, be yufala i mas mekem long gladhat blong yufala, olsem we yufala i stap wok blong [Jeova, NW], yufala i no stap wok blong ol man nomo.”​—⁠Kolosi 3:23; skelem wetem Luk 10:27; 2 Timote 2:⁠15.

17. ?Wanem i save givhan long ol yangfala blong gohed moa long wok blong God?

17 ?Olsem wanem long yu? ?Yu yu stap tinghae long ol samting long saed blong speret? ?Yu yu jusum ol fren we oli stap putum ol samting long saed blong speret long fas ples long laef blong olgeta? ?Yu yu stap pulum ol narafala blong oli joen wetem wetem yu long ol Kristin wok? ?Yu yu stap joen long Kristin wok wetem olgeta we oli olfala moa long yu, we oli gat moa ekspiryens long yu, blong oli save lanem yu long sam samting, mo blong yu save kasem glad we olgeta oli stap kasem, mo blong letem ol gudfala wok blong olgeta oli leftemap tingting blong yu? Wan Wetnes i stap tingtingbak long wan dei long laef blong hem 20 yia bifo. Dei ya, hem i fastaem we wan man we i olfala moa long hem i singaot hem blong joen long wok blong prij wetem hem. Hem i talem se dei ya i statem wan nyufala taem long laef blong hem: “Hemia fastaem long laef blong mi we mi go prij from we mi nomo mi wantem. Bifo, mi mi stap go prij from we papa mama blong mi tufala i pulum mi nomo.”

18. ?Wanem sam samting yu mas tingbaot bifo we yu tekem baptaes?

18 Sipos yu yu stap gohed gud blong folem ol loa blong God, ating kolosap nao bambae yu tingbaot blong tekem baptaes. Yu no mas fogetem se baptaes i no olsem wan stefeket we i soemaot se yu yu kam bigman finis. No gat. Hem i no blong soemaot se yu yu stap gruap. Mo yu no mas tekem baptaes blong folem ol fren blong yu nomo. Bifo we yu save baptaes, yu yu mas kasem save long ol stampa trutok blong Baebol, mo yu mas stap mekem olgeta oli wok long laef blong yu. Yu mas gat sam ekspiryens blong serem ol save ya wetem ol narafala. Mo yu mas luksave se wok ya i wan impoten haf blong trufala wosip. (Matyu 24:14; 28:​19, 20) Mo yu mas save se taem yu mekem impoten disisin ya finis blong tekem baptaes, yu mas stap mekem laef blong yu i joen wetem ol stret loa blong Baebol.a Long hat blong yu, yu mas givim laef blong yu finis i go long Papa blong yu long heven, we i laekem yu tumas.​—⁠Skelem wetem Ol Sam 40:​8, 9.

19. ?Wetaem wan man i gat raet blong tekem baptaes?

19 Fastaem yu mas tekem disisin ya se nomata wanem i hapen long laef blong yu biaen, bambae yu gohed blong mekem wok blong God. Afta, nao yu save baptaes. Hem i wan saen we i soemaot long ol man se yu yu givim ful laef blong yu i go olgeta long Jeova tru long Jisas Kraes, blong mekem wok blong God. Wan Kristin elda i stap tingbaot wan dei long laef blong hem we i kolosap 50 yia bifo. Long dei ya hem i luksave se: “!Mi mi mas mekem wan samting!” Michelle, wan yangfala Wetnes we hem i tekem baptaes long taon ya Nyukasel, long Engglan, sam yia bifo, hem i talem se: “Taem mi mi gat 13 yia blong mi, mi mi luksave se mi mas givim laef blong mi i go long Jeova mo mi mas tekem baptaes. I no gat samting we i moa gud i bitim we mi mekem wok blong God.”

20. (a) ?Plante taosen yangfala oli soemaot wanem gudfala eksampel finis? (b) ?Oli stap tingbaot disisin ya olsem wanem?

20 Long ol yia we oli jes pas finis, plante taosen yangfala oli tekem baptaes. Olgeta oli stadi long Tok blong God fastaem, mo oli lanem ol fasin blong God. Afta, oli tekem baptaes long wota. Long rod ya, oli glad blong joen wetem plante man we oli olfala moa long olgeta, blong soemaot se oli givim laef blong olgeta i go long God finis. Olgeta oli save se Kristin wok blong olgeta i no finis long taem blong baptaes. Oli statem wan nyufala laef we i blong Jeova nomo. Mo oli gat strong tingting blong mekem wok blong Jeova gogo i no save finis.

[Futnot]

a Samting ya i no min se yu save mekem eskyus long ol rong samting we yu stap mekem, se ‘be mi mi no tekem baptaes yet.’ Taem yumi save ol loa blong God finis, i klia se yumi gat responsabiliti blong obei long hem.​—⁠Jemes 4:⁠17.

?Bambae Yu Yu Ansa Olsem Wanem?

◻ ?From wanem save long saed blong Tok blong God i impoten tumas?

◻ ?Olsem wanem ol Kristin miting oli save givhan long yu moa?

◻ ?Wanem sam blesing we i kam long God, we i mas pusum yumi blong obei long hem?

◻ ?Olsem wanem yu save gohed moa long wok blong God?

◻ ?Wetaem wan man i gat raet blong tekem baptaes?

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem