“Olgeta Evriwan We Oli Harem Tok Ya Oli Mas Talem . . . Se ‘Yu Kam.’”

Long 1991, long bitim 200 kantri blong wol, bambae ol Wetnes blong Jeova oli wok strong blong mekem samting we stampa vas blong yia i talem, se: “OLGETA EVRIWAN WE OLI HAREM TOK YA, OLI MAS TALEM . . . SE ‘YU KAM.’”

“Tabu Speret wetem hemia we i olsem Woman blong Kraes, tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.”​—REVELESEN 22:17.

1. ?Wanem “wora ya” we Baebol i singaot yumi blong “kam” long hem?

VAS ya i singaot yu blong “yu kam.” ?Yu kam blong mekem wanem? Yu kam blong dring wora, blong mekem se yu no moa tosta. Be hemia i wan spesel kaen wora. Hemia sem kaen wora we Jisas Kraes i tokbaot taem hem i storeyan wetem woman Sameria long wel. Hem i se: “Man we i dring wora ya we mi bambae mi givim long hem, bambae hem i no save tosta bakegen samtaem. Wora ya we mi bambae mi givim long hem i save kam olsem wan springwora we i save ron oltaem insaed long hem, blong givim laef ya long hem we i no save finis.” (Jon 4:14) ?Jisas i kasem wora ya weples?

2. ?Wanem stampa blong “wora ya”? ?Fastaem, wanem samting i mas kamaot, nao biaen, wora ya i save ron?

² Aposol Jon i kasem blesing we hem i luk wan samting olsem wan drim. Long drim ya, hem i luk stampa blong wora ya, olsem hem i talem long Revelesen 22:​1, i se: “Nao enjel ya i soemaot wan bigfala reva long mi. Reva ya i stap ron, mo hem i wora blong laef. Hem i stap saen olsem glas, mo i stap kamaot long bigfala jea ya we God i stap sidaon long hem, wetem Smol Sipsip blong hem.” Yes, stampa blong klin wora ya we i save givim laef, hemia Jeova hem wan, we hem nomo i givim laef long evri samting. Hem i yusum Smol Sipsip, Jisas Kraes, blong givim wora ya long ol man. (Ridim Revelesen 21:6.) Vas ya i tokbaot “bigfala jea ya we God i sidaon long hem, wetem Smol Sipsip blong hem.” From tok ya, yumi save se wora ya blong laef i stat ron afta we Kingdom blong Mesaea i stanap long 1914. Hemia i min se afta we dei blong Masta i stat.​—Revelesen 1:10.

3, 4. ?“Wora ya” i saen blong wanem? ?Hu i save dring long wora ya?

³ ?Wora ya blong laef i saen blong wanem? Hem i saen blong samting we God i mekem blong givim wan gudfala laef long ol man bakegen, wan laef we i no save finis long Paradaes long wol. Wora blong laef i saen blong olgeta samting we hem i mekem blong givim laef tru long Jisas Kraes. ?Yumi save kasem ol samting ya naoia? No gat. Fastaem God i mas tekemaot ol rabis fasin long wol ya, wetem bos blong wol we yumi no save luk hem, hemia Devel Setan. Be yumi save kasem sam haf blong “wora ya” naoia, sipos yumi harem gud nyus blong Kingdom, yumi obei long hem, mo yumi mekem i wok long laef blong yumi.​—Jon 3:16; Rom 12:2.

⁴ Fastaem Jisas i soemaot long Jon wan ‘reva blong laef.’ Nao Hem i talem long Jon from wanem Hem i sanem enjel blong Hem i kam blong givim drim ya long Jon. Nao Jon i harem wan voes we i singaot bigwan, i se: “Tabu Speret wetem hemia we i olsem Woman blong Kraes, tufala i talem se ‘Yu kam.’ Mo olgeta evriwan we oli harem tok ya, oli mas talem olsem tu, se ‘Yu kam.’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.” (Revelesen 22:17) Yes, ol man blong God oli singaot olgeta we oli tosta, blong oli kam ‘dring’ long ol samting we God i givim tru long Smol Sipsip blong hem, blong oli save kasem laef blong olwe long wol.​—Jon 1:29.

Ol Man Oli Nidim Wora Blong Laef​—?From Wanem?

5. ?From wanem ol man oli nidim we God i givim “wora ya” blong laef?

⁵ Sore tumas, faswan papa mama blong ol man tufala i no folem rod we i givim jans long ol pikinini blong tufala blong harem gud blong olwe long Paradaes. Blong ol man oli kasem laef blong olwe, Adam i mas jusum gudfala rod, blong wosip mo obei long God we i wokem hem. Be wan stronghed speret man i yusum paoa blong hem blong pulum Iv, nao Iv i statem wan fasin we i lidim ol man, oli go kasem ded nomo. Mo stret hasban blong hem, hem i folem woman ya long rod ya we i go kasem ded. Adam i papa blong laen blong olgeta man, ale hem i pasem ded i go long olgeta. Taswe yumi save talem se hem nao, hem i karem ded i kam insaed long bigfala famle blong ol man. Baebol i talem se: “Bifo, fastaem olgeta, wan man nomo [i no wan woman] i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) Adam mo If tufala i sin finis, nao biaen nomo, tufala i gat pikinini, tufala i statem famle blong ol man.​—Ol Sam 51:5.

6. ?Blong wanem Jeova i mekem se ol man oli save dring long “wora ya”?

⁶ God i gat plan blong fulumap Paradaes long wol ya wetem ol stret man. ?Bambae God i letem wan samting i blokem plan ya blong i no save kamtru samtaem? Ansa we Baebol i givim i klia nomo: !No gat! Be blong mekem plan ya i kamtru, Jeova i mekem wan samting from lav blong hem. Samting ya bambae i fiksimap bigfala trabol we Adam i mekem. Mo long semtaem, samting we God i mekem bambae i agri wetem fasin we Jeova nomo i stap soemaot fulwan, hemia stret fasin. Hem i yusum ‘reva blong wora blong laef’ blong mekem samting ya. Adam i mekem se ol man we oli obei long God oli no moa save kam kolosap long Stampa blong laef. Be God bambae i yusum “wora blong laef” blong givimbak gudfala laef ya long ol man we oli obei long hem. Long Taosen Yia Rul blong Jisas Kraes, reva ya bambae i fulap olgeta. Taswe, long Taosen Yia Rul blong Kraes, ol man, mo ol dedman we bambae oli laef bakegen tu, oli mas dring long ‘reva blong wora blong laef.’​—Ridim Esikel 47:​1-10; Ol Wok 24:15.

7. ?Ol samting we God i givim we oli olsem “wora ya,” oli stanap long wanem?

⁷ Jeova i harem gud long laef blong hem wan. Mo hem i glad blong givim blesing ya, laef, long sam samting we hem i wokem olgeta. Ol samting we Jeova i mekem blong givim laef long man oli stanap long sakrafaes blong Jisas. (Mak 10:45; 1 Jon 4:​9, 10) Wan narafala samting we God i givim, hemia Tok blong hem. Samtaem Baebol i talem se Tok blong hem i olsem “wora.” (Efesas 5:26) Jeova God i gat raet blong talem long ol man se: “Yu kam.” From we ol man ya oli no kasem ol samting we God i givim long tufala stret man ya, Adam mo If.

Woman Blong Kraes i Singaot Se “Yu kam.”

8. ?Hu ya ol faswan we oli kasem “wora ya”? ?Wetaem?

⁸ “Smol Sipsip” i fasbon speret Pikinini blong Jeova. Olgeta we oli olsem woman blong Smol Sipsip ya, olgeta ya nao oli faswan blong talem bakegen se “Yu kam.” (Revelesen 14:​1, 3, 4; 21:9) Woman long saed blong speret, hem i no singaot long hem wan se “Yu kam.” Hemia i min se hem i no singaot long olgeta we Jeova God i mas hivimap olgeta yet, blong mekemap ful namba blong woman blong Kraes, 144,000. No gat. Hem i singaot long olgeta man we oli wantem kasem stret laef long wol afta long Amageden. (Revelesen 16:​14, 16) En blong rabis fasin blong wol ya i stat long 1914, i kam kasem naoia. Long taem ya nao, yumi harem voes blong “Woman blong Kraes,” we i wok wetem tabu speret blong God.

9. ?Olsem wanem yumi save se wora ya i no blong wan smol grup nomo?

⁹ Yumi glad we laswan buk blong Baebol i talem se ‘wan bigfala hif blong man, we i no gat man i save kaontem olgeta’ bambae oli harem gud nyus blong Kingdom blong God. Nao oli stanap strong long saed blong gavman ya blong God. (Revelesen 7:​9, 10, 16, 17) ?Yu yu stap long medel blong bigfala hif ya blong man? Oraet, “olgeta evriwan we oli harem tok ya, oli mas talem olsem tu, se ‘Yu kam.’”

Tabu Speret Wetem Woman Blong Kraes, Tufala i Talem Se “Yu Kam.”

10. ?Hu ya i stampa blong samting we i olsem wora? ?Olsem wanem yumi save samting ya?

¹⁰ ?From wanem Revelesen 22:17 i no tokbaot God mo i no tokbaot Jisas we i olsem Man we i jes mared? Yumi luk we vas ya i no talem hu nao i sanemaot tabu speret. Be from we vas ya i tokbaot tabu speret, yumi tingbaot Jeova God hem wan. Papa ya i stap insaed long bisnes ya, from we hem nao hem i Stampa blong tabu speret. Mo tu, Pikinini blong hem i agri fulwan wetem Papa blong hem, olsem hem wan i talem: “Mi, mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem.” (Jon 5:19) I tru we Jeova God nomo i givim tok ya we tabu speret mo Woman blong Kraes, tufala i talemaot. Be Jeova i save yusum Jisas Kraes, we hem i olsem “Waes Tok,” blong talemaot long ol man ‘ol tok we i kamaot long hem.’ (Revelesen 22:​6; mo 22:​17, Reference Bible, futnot; Jon 1:1) Taswe i stret nomo we Jisas Kraes we i olsem Man we i jes mared, hem tu i talemaot tok ya long Revelesen 22:17. Yes, yumi save se Jeova God, we hem i Papa blong Man we i jes mared, mo Jisas Kraes, Man we i jes mared, tufala tugeta i joen wetem “Woman blong Kraes” from tabu speret, nao olgeta evriwan oli talem se “Yu kam.”

11, 12. (a) ?Wanem faswan tok i soemaot se plante man oli mas “kam”? (b) ?Taem ol yia oli stap pas, olsem wanem samting ya i kam klia moa?

¹¹ Plante yia finis, voes ya i stap singaot se “Yu kam” long ol man we oli tosta mo oli wantem dring long “wora ya blong laef.” Long 1918, grup ya we i olsem woman blong Kraes, oli stat blong talemaot wan mesej long olgeta we maet oli laef long wol long fyuja. Oli talemaot mesej ya long wan pablik tok, nem blong hem: “Plante Milyan Man We Oli Laef Naoia, Maet Oli Neva Ded.” Tok ya i soemaot se plante man oli save pastru long Amageden, nao biaen oli save kasem laef blong olwe long Paradaes long wol aninit long Rul blong Kingdom blong Mesaea blong God. Be mesej ya i no talemaot klia olsem wanem blong kasem bigfala blesing ya. Hem i talem nomo se olgeta we oli mekem stret fasin bambae oli kasem.

¹² Be plante moa man oli mas harem voes ya we i talem se “Yu kam.” Taswe long 1922, mesej ya i goaot long olgeta we oli wantem mekem wok blong God, se oli mas mekem olsem: “Talemaot King mo Kingdom.” Long 1923, grup ya we oli olsem woman blong Kraes, oli kasem save se “ol sipsip” mo “ol nani” long parabol blong Jisas long Matyu 25:​31-46, tufala kampani ya bambae oli kamkamaot bifo long Amageden. Biaen, long 1929, Wajtaoa blong Maj 15, i karem wan store we nem blong hem se: “Singaot Ol Man Long Kaengud Fasin.” Revelesen 22:17 i stampa vas blong store ya. Mo hem i tokbaot wok blong olgeta we oli olsem woman blong Kraes, we oli mas singaot ol man se “Yu kam.”​—Pej 87-9.a

Ol Narafala Sipsip Tu Oli Talem Se “Yu Kam.”

13, 14. ?I stat long 1930, wanem samting i soemaot moa se plante narafala man bambae oli dring long samting we i olsem wora?

¹³ Long 1932, Wajtaoa i soemaot se “ol narafala sipsip” tu oli mas joen long wok blong singaot long ol man se “Yu kam.” (Jon 10:16) Wajtaoa blong Ogis 1, long pej 232, haf 29, i talem se: “Naoia ol Wetnes blong Jeova oli strong long wok blong olgeta, olsem Jehu bifo. Mo oli mas pulum olgeta we oli olsem Jonadab [ol narafala sipsip] blong joen wetem olgeta, mo blong talemaot long ol narafala se Kingdom blong God i kam kolosap finis.” Nao oli raetem Revelesen 22:17 long haf ya, mo biaen, oli talem se: “Olgeta we tabu speret i makemaot olgeta finis, oli mas leftemap tingting blong ol narafala we oli joen long wok blong talemaot gud nyus blong Kingdom. Oli no nidim we Masta i makemaot olgeta wetem tabu speret blong talemaot mesej blong Masta. No gat. Ol Wetnes blong Jeova oli harem gud from we Jeova i letem olgeta oli karem wora blong laef i go long wan grup we oli save pastru long Amageden, nao biaen, Jeova, from we hem i gud tumas, i givim laef we i no save finis long olgeta long wol.b

¹⁴ I stat long 1934, smol kampani we tabu speret i makemaot olgeta, oli talem long ol narafala sipsip se oli mas givim laef blong olgeta i go long God. Mo blong soemaot samting ya, oli mas baptaes long wora. Biaen, oli mas joen wetem grup we i olsem woman blong Kraes blong talem long ol narafala we oli tosta yet se ‘Yu kam.’ Long taem ya nao, olgeta we oli olsem woman blong Kraes oli singaot klia long ol narafala sipsip we oli tosta, blong oli hivap long “wan kampani nomo” we i gat “wan man nomo blong lukaot long olgeta,” hemia Jisas Kraes. (Jon 10:16) Long 1935, long wan asembli, smol kampani we tabu speret i makemaot olgeta oli sek, from we oli lanem se ol man we oli olsem sipsip, we oli stap singaot olgeta se “Yu kam,” hemia “bigfala hif blong man” we Revelesen 7:​9-17 i tokbaot. Taem oli luksave samting ya, oli girap, oli gohed strong moa long wok blong singaot ol man.

15. ?Olsem wanem “Tabu Speret” tu i singaot se “Yu kam.”?

¹⁵ Taem grup we i olsem woman blong Kraes i singaot se “Yu kam,” hem i agri wetem tabu speret blong God. Tabu speret i mekem mining blong ol profet tok blong Baebol i kam klia. Samting ya i mekem se olgeta long smol kampani blong woman blong Kraes oli singaot ol narafala man. Mesej we oli givim long ol narafala man i stanap long ol profet tok blong Baebol. Mo tabu speret blong God nao i bin talem ol profet tok ya long ol man we oli raetemdaon. Taswe i olsem we tabu speret we i pastru long Kraes mo woman blong hem, hem nao i stap singaot bigfala kampani blong ol sipsip se “Yu kam.”​—Revelesen 19:10.

16. ?Olsem wanem tabu speret mo Woman blong Kraes, tufala i joen blong singaot ol man tede?

¹⁶ Kam kasem naoia, tabu speret mo woman blong Kraes, hemia smol kampani, “tufala i talem se ‘Yu kam.’” Mo smol kampani i stap talem long ol narafala sipsip ya se oli mas talemaot long ol narafala man bakegen se “Yu kam.” ‘Wora blong laef’ we oli save kasem tede, oli no mas holem i stap long han blong olgeta nomo. Oli mas obei long tok blong “Tabu Speret wetem hemia we i olsem Woman blong Kraes,” taem tufala i talem se: “Olgeta evriwan we oli harem tok ya, oli mas talem tu, se ‘Yu kam.’” Olgeta we oli dring, nao oli no moa tosta, oli mas singaot ol narafala. Oli mas singaot long olgeta man, nomata wanem kala, lanwis, nesen no skul blong olgeta. Oli mas singaot long olgeta evriwan long olgeta ples long wol. Ol Wetnes blong Jeova oli singaot mo givhan long ol narafala man blong oli dring long ol samting we oli olsem ‘wora blong laef,’ we ol man oli save kasem naoia, i fri nomo.

17. ?Tede ol man oli save dring long wanem kaen “wora”?

¹⁷ Long olgeta ples long wol, Smol Sipsip ya, Jisas Kraes, i stap lidim bigfala hif blong man, oli go dring long “ol springwora ya we i save givim laef.” (Revelesen 7:17) Wora ya i no doti. Hem i klin, kolkol, gudfala wora we i kamaot stret long hed blong reva. Samting we i olsem wora i no minim save blong Baebol nomo. Hem i minim olgeta samting we God i mekem from Jisas Kraes blong lidim bigfala hif ya blong man long rod we i go kasem gudfala hapi laef blong olwe. Hemia ol samting we God i mekem naoia tu.

Naoia Yu Mas Talemaot

18. ?Wok blong singaot ol man tede i bigfala olsem wanem?

¹⁸ Naoia, namba blong bigfala hif ya blong man, kolosap i kasem fo milyan. Olgeta ya oli gohed strong long wok ya blong talemaot gud nyus blong Kingdom long olgeta ples long wol. Naoia oli stap talemaot Kingdom long 212 kantri. Mo oltaem oli mekem ripot long wok blong olgeta. Jeova God, we hem i Bigfala Man blong Makemaot Taem, hem i stap soemaot longfala tingting long ol man yet. Taswe, smol taem we i stap yet bifo long en blong olfala fasin blong wol ya, bambae bigfala hif ya blong man oli gohed blong singaot moa man. Jeova i save stret taem blong finisim wok ya. Hem i save stret taem we bambae hem i soemaot se hem i Jeova. Plante taem long profet tok blong Baebol, hem i promes blong mekem olsemia.​—Esikel 36:23; 38:​21-23; 39:7.

19. ?From wanem yumi save talem se “wora ya” i fri nomo?

¹⁹ Long smoltaem we i stap yet, bigfala hif ya blong ol man oli joen wetem smol kampani we i woman blong Kraes, nao oli talem se: “Yufala i kam tekem wora ya blong laef, we i olsem presen blong yufala.” Ol man ya we oli stap talemaot gud nyus ya we i save givim laef long ol man, oli mekem wok ya i fri nomo. Oli no kasem pei from wok blong talemaot Kingdom long olgeta ples long wol.

20. ?From we ol man oli dring long “wora ya,” wanem ol blesing we bambae oli kamaot?

²⁰ Wora ya blong laef i stap long olgeta ples long wol. Taswe ol man we oli wantem dring, oli save dring gogo oli fulap, mo oli save kasem laef from. Bambae ol man oli no moa gat sin mo oli save harem gud long laef blong olwe long wol ya nomo. Wol ya bambae i kam wan paradaes, bambae i soemaot se nambawan plan blong Jeova i win. Hem i no wokem wol ya blong nating nomo. Hem i wokem wol ya blong i kam olsem wan bigfala garen blong Iden, wan paradaes we man i save harem gud long hem, we bambae i fulap long ol stret man we oli stap folem fasin blong God.

21. ?Olsem wanem plan we God i mekem long wol fastaem bambae i kamtru?

²¹ I no gat tok we i save eksplenem bigfala blesing ya, mo glad blong ol man we oli stap long nyufala wol ya. Long taem ya, bambae ol man oli mekem wok ya we God i givim long faswan man mo woman, long Jenesis 1:​27, 28. From nambawan fasin blong Jeova blong fiksimap trabol we i kasem ol man, wol bambae i kam olsem wan paradaes bakegen, we i fulap long ol stret man nomo. Yes, taem God i luk evri samting we hem i mekem, bambae hem i luk se oli gud tumas. ?Bambae yu yu stap long taem ya? Sipos yu yu wantem stap, naoia yu mas glad blong dring long wora blong laef, we i olsem presen nomo. “Yu kam,” yu dring gogo yu fulap long wora blong laef mo yu no moa tosta. Wora ya i stap ron naoia, mo bambae i ron fulwan long Wan Taosen Yia Rul blong Kraes long fyuja. Mo olgeta evriwan we oli harem gudfala tok ya, oli mas talem olsem tu, se: “Yu kam.”

[Ol futnot]

?Wanem Ansa Blong Yu?

◻ ?Revelesen 22:17 i tokbaot wanem “wora”?

◻ ?Hu ya i stampa blong “wora ya”?

◻ ?From wanem ol man oli nidim “wora ya”? ?Wora ya i stat ron wetaem?

◻ ?From we vas ya i tokbaot “Tabu Speret,” hem i soemaot wanem? ?Olsem wanem “Woman blong Kraes” i joen long bisnes ya?

◻ Hu i save dring long “wora ya”? ?Bambae oli kasem wanem blesing from?