Jajmen Dei—!Taem Blong Hop!

SIPOS yu yu fraet long jajmen dei, i gud yu luk wanem we Baebol i talem long saed ya. Baebol i ansarem kwestin ya: ?Taem God i jajem ol sinman, i tru se bambae hem i sakem olgeta long helfaea?

Baebol i tokbaot faswan jajmen blong God. Hemia long taem we laen blong ol man i jes stat. Adam mo Iv tufala i gat jans blong stap laef olwe long paradaes long wol. (Jenesis 1:​26-28; 2:​7-9, 15-25) Be tufala i sin, ale God i jajem tufala from. ?Wanem i kamaot long tufala? God i tekemaot presen we i givim long tufala, hemia laef. Hemia i min se tufala i ded. God i talem long tufala se: “Oltaem long laef blong yu, bambae yu stap hadwok tumas, yu stap swet, blong mekem graon ya i karem gudfala kakae, gogo laef blong yu i finis, nao bodi blong yu bambae i gobak bakegen long graon ya we mi mi wokem yu long hem fastaem. Mi mi wokem yu long graon fastaem, mo bambae yu yu kam graon bakegen.”​—⁠Jenesis 3:​16-19.

Hemia i wan strong jajmen, be hem i stret nomo. Be God i no tokbaot helfaea. Taem Adam mo Iv tufala i ded, tufala i gobak long graon bakegen. Laef blong tufala i finis. Baebol i no talem se taem Adam mo ol narafala man oli ded, wan samting we i stap insaed long bodi blong olgeta, i kamaot, i go samples bakegen, mo i harem nogud blong olwe. No gat. Baebol i talem se: “Ol man we oli laef oli save se bambae oli mas ded. Be ol dedman oli no save wan samting nating.”​—⁠Eklesiastis 9:⁠5.

?Yu yu save se Baebol i talem olsemia? ?Mo yu yu save tu se Baebol i no talem tok ya “sol we i no save ded samtaem”? Defren olgeta Baebol i talem se: “Sol we i mekem sin, hem bambae i ded.” (Esikel 18:​4, King James Version) Hemia i agri fulwan wetem rul blong Baebol: “Pei blong sin hem i ded.” (Rom 6:​23, KJ) Rul ya i gat paoa long laef blong yumi evriwan. Olgeta man oli pikinini blong Adam we hem i mekem sin. Taswe yumi evriwan i sinman, mo yumi kasem pei blong sin, hemia ded. Baebol i talem samting ya, i se: “From wan man nomo, sin i kam long wol ya, mo ded i kamaot from sin. Taswe ded i kasem ol man, from we olgeta evriwan oli mekem sin.” (Rom 5:​12, KJ) Dei blong Jajmen i bigfala haf blong plan blong God blong sevem yumi, yumi aot long sin mo ded.

Faondesen Blong Jajmen Dei

Baebol i talem se 2,000 yia bifo, God i putum faondesen blong ol samting we bambae oli kamaot long Jajmen Dei. Hemia taem we Jisas i kam long wol, nao hem i givim stret laef blong hem blong pemaot yumi. Jisas hem wan i talem se: “God i laekem tumas wol ya, taswe hem i givim stret Pikinini blong hem, wan nomo we hem i gat, blong ol man we oli soemaot se oli bilif long hem bambae oli no save lus, bambae oli save kasem laef blong olwe.”​—⁠Jon 3:⁠16, NW.

Sipos yumi soemaot se yumi bilif long Jisas, yumi save kasem sam blesing naoia long saed blong speret from sakrafaes blong hem. God i save fogivim sin blong yumi, mo yumi save kam kolosap long hem. (Jon 14:6; 1 Jon 2:​1, 2) Be yumi sinman yet, yumi no stret. From samting ya, yumi kasem sik mo ded. Yumi no save stap laef blong olwe yet, olsem Jisas i promes. Jajmen Dei nao, bambae i mekem blesing ya i kamaot.

Dei Blong Jajmen

Aposol Jon i luk wan vison blong Jajmen Dei, nao hem i eksplenem olsem: “Nao mi luk wan bigfala waet jea olsem jea blong king, mo i gat wan man i stap sidaon long hem. Wol mo heven, tufala i ronwe long fes blong man ya, mo i no moa gat ples blong tufala. Nao mi luk ol dedman, olgeta we oli no gat nem mo ol haeman, oli stap stanap long fored blong God. Mo oli openem sam buk. Mo oli openem wan narafala buk, hemia buk blong laef. Nao jajmen blong ol dedman i stanap long ol samting we i stap long ol buk ya, stret long ol wok blong olgeta wanwan.”​—⁠Revelesen 20:​11, 12, KJ.

Yes, long vison blong Jon, God hem wan i bos blong Jajmen Dei. Be i gat wan narafala man i joen long bisnes ya tu. Aposol Pol i talem se: “[God] i makemaot wan dei finis, we bambae hem i jajem wol ya long stret fasin. Hem i jusumaot wan man finis blong mekem samting ya.” (Ol Wok 17:​31, KJ) ?Hu ya man ya? Hemia Jisas, we hem nomo i talem se: “Papa blong mi i no mekem wok ya blong jajem ol man. Hem i putum wok ya long han blong Pikinini blong hem.” (Jon 5:​22, KJ) Taswe Jisas hem i Jaj we God i putumap blong jajem ol man long Jajmen Dei.

Hemia i gud nyus long ol man. Ol Gospel long Baebol oli soemaot se Jisas i gat bigfala sore long ol man. Hem i no flas, mo hem i no strong tumas. Hem i ‘wan kwaet man, tingting blong hem i stap daon.’ (Matyu 11:29; 14:14; 20:34) Yumi glad we jaj blong yumi i gat ol fasin ya.

?Wetaem?

?Oraet, be Jajmen Dei bambae i kamaot wetaem? Revelesen i talem se taem “wol mo heven, tufala i ronwe.” Ol tok ya i pulum yumi blong tingbaot tok blong aposol Pita: “Heven mo wol blong naoia tu, tufala i stap wet long faea. Tufala i stap wet long dei blong jajem mo spolem ol man we oli no obei long God.” (2 Pita 3:​7, NW) ?Samting ya i min se prapa graon bambae i lus long faea? No gat. Baebol i klia long poen ya. Prapa graon i no save lus samtaem. “Wol ya . . . bambae i stap olwe. I no gat wan samting we i save spolem hem.” (Ol Sam 104:​5, KJ) Ol vas raonabaot long tok blong Pita oli soemaot se fasin blong laef blong ol man we oli no obei long God, hemia nao samting we bambae God i spolem. Ol man we oli no obei long God bambae oli lus. Be wol ya, no graon ya, i no save lus.​—⁠Jon 12:31; 14:30; 1 Jon 5:⁠19.

Bambae God i spolem ol man we oli no obei long hem, long wan faet. Baebol i talem se nem blong faet ya, Amageden. Plante taem magasin ya, Wajtaoa, i soemaot we faet ya i kolosap. (Revelesen 16:​14, 16) Biaen long faet ya, Setan bambae i stap kalabus long samting olsem wan bigfala hol. Bambae hem i no moa gat paoa long ol man gogo wan taosen yia i finis. Wan taosen yia ya, hemia nao Jajmen Dei. (Revelesen 19:17 kasem 20:⁠3) ?Taem ol man we oli no obei long God oli lus long Amageden, olsem wanem long ol gudfala man we oli obei long God? Bambae oli no ded long faet ya. Bambae oli stap laef, nao Jajmen Dei i kamtru. Baebol i talem se: “Ol man we oli no gat poen bambae oli stap long [wol]. Be . . . ol rabis man, bambae oli lus, oli no moa stap long wol.”​—⁠Proveb 2:​21, 22.

Baebol i sapotem poen ya bakegen, taem hem i tokbaot “wan bigfala kampani blong man, we i no gat man i save kaontem olgeta. Ol man ya oli kamaot long olgeta nesen, mo long olgeta laen, mo long olgeta kantri, mo long olgeta lanwis.” Bigfala kampani ya i mas hivap long wol bifo long Amageden. Olgeta ya oli mas “pastru long taem blong bigfala trabol.” Hemia i min se oli mas stap laef tru long taem blong bigfala trabol we bambae i finisim ol rabis fasin long wol ya. Oli olsem Noa we hem i stap laef tru long en blong wol long taem blong hem. (Revelesen 7:​9-17, NW; 2 Pita 2:⁠5) ?Yu yu save se bigfala kampani ya blong ol Kristin man we oli kamaot long olgeta nesen oli stap naoia long wol? Olgeta ya oli hop se bambae oli laef tru long taem blong bigfala trabol, blong kasem laef we i no save finis long wol ya. From we bigfala kampani ya i stap long wol ya finis, samting ya i pruvum se Jajmen Dei i kolosap nomo.

?Bambae Hu i Kasem Jajmen?

Long Jajmen Dei bambae bigfala kampani ya i kasem jajmen. Be i no olgeta ya nomo. Jon i gohed moa i se: “Solwora i lego ol dedman we oli stap long hem. Mo ded wetem hel tufala i givimbak ol man we oli stap long tufala. Mo olgeta oli kasem jajmen, stret long wok blong olgeta man wanwan.” (Revelesen 20:13, KJ) Vas ya i pruvum bakegen se i no tru we ol man bambae oli harem nogud long hel blong olwe. ?Sipos hel bambae i givimbak ol dedman we oli stap long hem, olsem wanem i save gat man i stap long hel blong olwe? Tok ya hel long Baebol i minim gref blong ol dedman. Ol dedman we oli stap long ples ya oli no save wan samting nating, oli stap wet nomo blong kasem laef bakegen. Long Jajmen Dei, olgeta dedman we oli stap long hel bambae oli kamaot. Hel bambae i emti.​—⁠Eklesiastis 9:10.

?Long Jajmen Dei, hu bambae oli laef bakegen long ded? Aposol Pol i talem se: “Bambae ol dedman oli girap bakegen, ol stret man, wetem olgeta we oli no stret.” (Ol Wok 24:​15, KJ) Taswe ol gudfala man blong God, we oli olsem “ol stret man,” bambae oli laef bakegen. Mo “olgeta we oli no stret,” we oli plante tumas blong kaontem olgeta, bambae oli laef bakegen tu. I klia se olgeta we oli stap slip long beregraon bambae oli laef bakegen. Samfala nomo we sin blong olgeta i bigwan tumas bambae oli no girap bakegen. Olgeta ya, God i jajem olgeta finis se oli no naf nating blong kasem laef.​—⁠Matyu 12:⁠31.

Jajmen

?Oraet, be long Jajmen Dei, wanem bambae i hapen long bigfala kampani blong ol man we oli laef tru long faet ya, Amageden? ?Mo bambae wanem i hapen long olgeta we oli laef bakegen? Baebol i talem se: “Jajmen blong ol dedman i stanap long ol samting we oli raetem finis long ol buk ya, hem i stret long ol wok blong olgeta wanwan.” Bambae God i skelem ol man ya. Olgeta we oli wantem obei long ‘ol samting we oli raetem finis long ol buk ya,’​—⁠i klia se hemia ol samting we God i talem long ol man blong oli mekem long taem ya​—⁠bambae God i raetemdaon nem blong olgeta long “buk blong laef.” (Revelesen 20:​12, KJ) !Nao oli stap wokbaot long rod we i go kasem laef blong olwe!

!Long taem ya nao, ded blong Kraes bambae i givhan long ol man long saed blong bodi! Ol man we nem blong olgeta i stap long buk blong laef bambae oli no moa kasem sik mo ded. Sloslou, bodi blong olgeta bambae i kamgud gogo oli stret gud olgeta. Bambae oli kasem laef we i no save finis, olsem Jisas i promes long olgeta we oli bilif long hem. !Hemia i nambawan blesing! Be bambae i gat sam man we oli no wantem obei long ‘ol samting we oli stap long ol buk ya.’ ?Bambae wanem i hapen long olgeta? Oli no kasem laef blong olwe. Baebol i talem se: “Ol man we nem blong olgeta i no stap long buk blong laef, oli sakem olgeta oli go long lugun blong faea.”​—⁠Revelesen 20:​15, KJ.

?Olsem wanem? ?Hemia i olsem helfaea ya we ol skul blong Krisendom oli tokbaot? No gat. Vas 14 i talem se: “Ded wetem hel, oli sakem tufala i go long lugun blong faea. Hemia i seken ded ya.” (Revelesen 20:​14, KJ) Oli sakem hel i go long lugun blong faea. Taswe lugun ya i no save minim helfaea. Mo tu, ded i no wan samting we man i save holem blong sakem i go samples. No gat. Taswe lugun ya blong faea i no wan samting, hem i wan pija tok nomo. ?Hem i minim wanem? Baebol i talem se: “Hemia i seken ded ya.” Taem oli sakem ded mo hel (Hades) tufala i go long lugun blong faea, i olsem we tufala i “ded,” from we tufala i lus olgeta. Sem mak long ol stronghed man we oli go long lugun blong faea ya. Olgeta oli ded, oli lus. Hemia i seken ded ya. Oli no save laef bakegen samtaem.

Jajmen Dei​—⁠Taem Blong Hop

Taswe taem yumi tingbaot Jajmen Dei, yumi no mas fraet mo harem nogud. Jajmen Dei i taem blong hop, taem blong givim laef long ol man, hemia laef blong olwe we Adam i mestem. ?Ol man we God i jajem olgeta se oli trufala man blong hem, bambae oli kasem wanem blesing? Traem lesin: “!Yu luk! Haos tapolen blong God i stap wetem ol man. Hem bambae i stap wetem olgeta oltaem, nao olgeta bambae oli man blong hem. Mo God hem wan bambae i stap wetem olgeta. Mo hem bambae i ravemaot wora blong ae blong olgeta mo ded bambae i finis. Mo bambae i no gat man i krae from ded, no man we i krae, no man we i harem i soa. Ol samting ya blong bifo oli lus olgeta.”​—⁠Revelesen 21:​3, 4, NW.

Long en blong Jajmen Dei ya blong wan taosen yia, ol gudfala man long olgeta ples long wol bambae oli stret olgeta. Olgeta oli “kasem laef” fulwan. Plan blong God long saed blong Jajmen Dei i kamtru fulwan. (Revelesen 20:⁠5) Baebol i talem se long taem ya nao, God bambae i letem Setan i fri blong traem ol man, laswan. (Revelesen 20:​3, 7-10) Olgeta we oli no foldaon long laswan traem ya, promes blong Baebol bambae i kamtru fulwan long olgeta, i se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—⁠Ol Sam 37:29.

!Jajmen Dei ya i nambawan blesing! Mo i gud tumas we yumi save rere naoia tu. Yumi save stadi long Baebol blong lanem ol samting we God i wantem, mo yumi save stretem laef blong yumi blong mekem i joen wetem wil blong God. Taswe man we i raetem ol Sam i glad blong tingbaot jajmen blong God. Hem i se: “!Heven i mas harem gud, mo wol i mas glad! !Solwora mo ol samting we i stap long hem, oli mas mekem bigfala noes! !Ol garen mo ol samting we i stap long ol, oli mas glad tumas! !Mo long semtaem ya, olgeta tri long bus oli mas singsingaot, oli mas hapi tumas long fes blong Jeova! From hem i kam finis. Hem i kam finis blong jajem wol ya.”​—⁠Ol Sam 96:​11-13, NW.