Yumi Nidim Wan Man Blong Lesin Long Yumi
YUMI stap traem blong harem gud mo glad long laef blong yumi. !Be taem yumi kasem trabol, yumi harem gud tumas sipos i gat wan man we yumi save talemaot trabol blong yumi long hem!
Dr. George S. Stevenson i talem se: “Fasin blong tokbaot trabol long wan narafala man i givhan blong mekem yu harem gud bakegen, yu save luksave ol wari blong yu, mo samtaem i givhan long yu blong faenem ansa long trabol blong yu.” Dr. Rose Hilferding i talem se: “Yumi evriwan i mas taltalemaot ol trabol blong yumi. Yumi mas talemaot ol wari blong yumi long narafala man. Yumi mas harem se i gat wan man long wol ya we i stap rere blong lesin mo i kasem save long ol trabol blong yumi.”
Be, i no gat man i save mekem olsem evri taem. From we i no gat taem mo i gat ol narafala samting tu we oli blokem hem, ol man we yumi trastem olgeta maet oli no save stap taem yumi rili nidim blong toktok wetem olgeta, no maet yumi no wantem tokbaot sam samting long ol fren blong yumi nating se oli frengud wetem yumi.
Be long saed blong ol trufala Kristin i gat wan man we i save lesin long olgeta, from rod ya blong prea i open oltaem. Oltaem Baebol i enkarajem yumi blong prea long God, Hemia we i Wokem yumi, we nem blong hem Jeova. Baebol i talem se yumi mas prea wetem fulhat blong yumi, tru long nem blong Jisas, mo prea i mas laenap wetem wil blong God. I stret blong prea from ol trabol blong yumi wanwan. Filipae 4:6 i talem se: “Be sipos yufala i sot long wan samting, . . . yufala i mas askem long [God], mo yufala i mas talem tangkyu tu long hem.” !Hemia wan nambawan presen ya! Hae Rula blong wol mo heven i rere oltaem blong harem mo lesin long ol prea blong ol man blong hem we tingting blong olgeta i stap daon.—Ol Sam 83:18; Matyu 6:9-15; Jon 14:13, 14; 1 Jon 5:14.
?Be i tru se God i stap lesin? Sam man oli gat tingting se prea i save wok sipos man i gat gudhan blong mekem sam samting: Wan man we i prea, i mekem rere ol tingting blong hem mo biaen hem i talemaot tingting ya. Afta we hem i talemaot trabol blong hem, nao biaen hem i lukaot wan rod mo hem i lukluk gud evri samting we maet oli save givhan long hem. Taem hem i winim trabol blong hem, nao hem i save talem se God i mekem, be rili hem i prapa tingting mo wok blong hem nomo, i mekem se ol samting we hem i wantem oli kamtru.
Plante man tede oli ting se fasin blong tingting mo hadwok i save winim trabol blong olgeta, hemia nao trufala fasin blong prea. ?Wanem tingting blong yu? ?Paoa blong prea i gat mak blong hem olsemia? Tru ya, tingting mo wok blong man i mas laenap wetem ol prea blong hem blong kasem ol ansa. ?Be olsem wanem, God i stap givhan long bisnes ya? ?God i lesin taem yu prea? ?Hem i tingbaot ol prea blong yu se oli impoten, hem i tingting long ol samting we yu stap talem long prea mo hem i ansa long olgeta?
Ol ansa blong ol kwestin ya i klia nomo. Sipos God i no stap lesin long ol prea blong yumi, ating prea i blong mekem yumi harem gud nomo long tingting blong yumi. !Be, sipos God i harem mo i lesin mo hem i intres long ol prea blong yumi wanwan, yumi mas gat tangkyu from! Evri dei samting ya bambae i pusum yumi blong yusum gud rod ya we God i givim.
Mifala i askem yu, naoia, blong gohed blong ridim ol haf we oli kamaot biaen.