Pol i Agensem Plato Long Saed Blong Laef Bakegen Long Ded
APOSOL Pol i tokbaot laef bakegen long ded long 1 Korin 15:35-58 mo long 2 Korin 5:1-10. ?Long tok ya blong hem, hem i folem tingting blong Plato mo ol man Grik long saed blong sol we i no save ded, no tok blong hem i laenap wetem tijing blong Jisas mo i laenap wetem ol narafala haf blong Baebol?
Wan buklet (Immortality of the Soul or Resurrection of the Individual: St. Paul’s View with Special Reference to Plato) we oli raetem long 1974 mo ajbisop blong Grik Otodoks Jyos long Not mo Saot Amerika i agri long hem, i givim wan klia ansa. Afta we buk ya i tokbaot fasin blong laef bakegen long ded we ol vas blong Baebol antap oli tokbaot mo ol tijing blong ol man Grik long taem ya, man ya we i raetem buk ya i talem olsem se:
“Plato i tijim ol man se sol i gohed blong laef olwe mo hem i no save ded samtaem, hem i defren long bodi. Sol we Plato i tokbaot i stap oltaem, hem i no joen long bodi mo hem i no save ded . . . Tabu Pol i no tijim ol tingting ya, hem i no talem se hem i bin mekem olsem . . .
“Aposol Pol i no tingbaot ‘psyche’ no speret se hem i no save ded olsem we hem i defren, hem i defren samting long bodi. Be fasin blong laef bakegen long ded i wan ful samting olsem sol-speret bodi blong man, we i stanap long laef bakegen blong Kraes. Tingting blong Pol long saed blong bodi we i laef bakegen long ded i no minim se ol dedman long beregraon oli save laef bakegen long ded wetem semkaen bodi. “Bilif blong hem, long saed blong bodi i laef bakegen long ded i olsem wan jenis, wan nyufala man, wan samting we i stanap bakegen, olsem wan man, from paoa blong God, hem i sem man we i ded, fasin blong hem, nyufala bodi blong hem mo tingting mo fasin blong hem. Fyuja laef bakegen long ded bambae i no kamaot long yumi, be hem i wan presen blong king we i kamaot long God.”
Yes, laef we i no save finis hem i no stap insaed long man. Be, hem i wan praes, wan gudfala presen we Jeova i yusum Masta blong yumi Jisas Kraes blong givim long ol man we oli stap insaed long Kristin kongregesen.—1 Korin 15:20, 57; Filipae 3:14.
[Tok Blong Pija Long Pej 9]
Man Grik ya, Plato
[Credit line]
Vatican Museum photograph