Hivimap “Ol Gudgudfala Samting” Long Polan

POLAN i wan Katolik kantri. Folem namba blong ol man we oli kaontem long kantri ya, 93% long ol man ya oli memba blong Katolik Skul. Be ol jenis insaed long politik mo long kantri we i hapen i no longtaem, i jenisim tingting mo fasin blong wosip blong olgeta. Stadi i soemaot se 50% long ol man ya nomo oli stap laef olsem ol man Katolik.

Long manis Mei 1989, Polan i luksave folem loa se ol Wetnes blong Jeova i wan ogenaesesen blong skul long kantri ya. Stat long taem ya, kolosap 11,000 nyuwan oli joenem olgeta blong talemaot gud nyus blong Kingdom. Naoia i gat bitim 106,000 man blong talemaot Kingdom we oli stap long bitim 1,300 kongregesen, mo long 1991 200,422 man oli kam long Memoriol blong tingbaot ded blong Kraes. Taswe, profet tok we i tokbaot fasin blong hivimap ‘ol gudgudfala samting blong ol nesen’ i stap gohed naoia long Polan. (Hagae 2:7) I no longtaem i pas, ol Wetnes blong Jeova oli bin holem ol bigfala asembli long Polan. Be taem yumi luk sam long ol smol taon long kantri ya bambae yumi luk olsem wanem wok blong hivimap ol man i stap gohed long kantri ya.

Ol Paenia Oli Openem Rod

Stum hem i wan taon we kolosap 10,000 man oli stap long hem, taon ya i stap kolosap long ples we Vistula Reva i ron i go long Solwora blong Baltik. Longtaem finis i kam i hadwok blong prij long teritori ya. Long 1987 i gat eit pablisa nomo long eria ya. Be, ol samting oli stat blong jenis taem ol paenia, no ol man we oli wok fultaem blong talemaot Kingdom, oli kamtru. !Long namba faef taem we oli holem miting, long wan ples blong sinima, i gat 100 man we oli intres, oli kam! Tu yia afta oli stanemap wan kongregesen. Naoia i gat 90 pablisa we oli gat prapa Haos Kingdom blong olgeta, mo oltaem i gat 150 man oli stap kam long ol miting blong olgeta.

Olsem oltaem, Katolik Skul i agensem olgeta. Wan “spesel man blong skul ya” hemia wan Katolik sista i talem sam gyaman toktok long saed blong ol Wetnes, i talem se olgeta oli stap tijim ol gyaman bilif. Be olsem i stap hapen oltaem, samting ya i tanraon long hem bakegen. Mo tok ya blong hem tu i mekem se ol man oli wantem faenemaot trutok. !Plante long olgeta oli lanem trutok mo naoia oli mekem wok olsem ol paenia! Oli talem se: ‘Taem mifala i stap lanem trutok, mifala i ting se evriwan we i wantem kam wan Wetnes i mas olsem tija blong hem, i min se hem i mas kam wan paenia.’ Yes, tingting blong paenia i kasem ful kongregesen.

From samting ya, kolosap oli mekem 180 Baebol stadi long eria ya. Oli yusum buk ya Yu Save Laef Foreva Long Paradaes Long Wol, blong tijim ol man tu blong rid. Mo long semtaem, ol man ya oli stap lanem trutok. Oltaem oli mekem ten menet Baebol stadi wetem wan grup blong ol man long kalabus taem oli kamaot blong klinim ol rod. Wan long olgeta i givhan long wan Wetnes taem wan woman we i stap pas kolosap i stat blong tok nogud long Wetnes ya. Hem i ron i go long sista ya, i tekem buk ya Laef Foreva long han blong sista ya, mo hem i soem long woman ya, mo i askem woman ya we i stap tok nogud long Wetnes ya i se: “?Yu save rid? ?Wanem samting i stap long ples ya? !Yu yu save laef foreva long Paradaes long wol! ?Yu yu bin harem wan samting olsem finis? ?From wanem yu stap tok nogud long God mo ol man we oli stap wosip long hem?”

Storeyan Blong Taon

Krusvetsa, i wan impoten taon long Polan bifo, Katolik i strong long ples ya. Kam kasem long medel blong 1990, i gat smol namba blong ol Wetnes nomo long medel blong 9,300 man long taon ya. Be Jeova i blesem fasin traehad blong ol man ya blong talemaot Kingdom.

Taem ol man oli luksave se ol lida blong olgeta oli gat tu fes, plante moa man​—olsem ol yangfala​—oli go long ol Wetnes blong faenemaot from wanem i olsem. Long sot taem nomo, oli statem 20 Baebol stadi. Pris blong ples ya i talem sam strong tok long saed blong ol Wetnes blong Jeova, be samting ya i no daonem tingting blong ol man we hat blong olgeta i stret, blong oli no kam long ol miting blong ol Wetnes blong Jeova. Ol man oli tokbaot ol Wetnes long ol stoa mo long ol pablik ples mo long jyos tu. Sikis manis biaen, oli mekem tu bigfala buk stadi. Naoia Krusvetsa i gat wan strong kongregesen we i gat 35 man blong wosip long Jeova oli stap long hem. Oli mekem 75 Baebol stadi mo oli bisi blong hivimap “ol gudgudfala samting” we oli bin kalabus long gyaman skul.

Bogdan i wan long ol man ya, hem i gat 23 yia, hem i kam long wan famle we i strong long Katolik. Hem i talem se: “Mi stap drong, smok, mo mekem ol rabis fasin. Fasin blong mi i olbaot nomo mo mi no kea long ol rul mo ol loa, mo i no gat man i wari long mi. Taem mi stat blong stadi Baebol, mama blong mi i talem se bambae hem i posenem hem wan i ded. From samting ya, mi no moa joen wetem ol Wetnes. Biaen, ol spesel paenia oli givhan long mi, nao mi save fri long ol rabis fasin blong mi. Taem mi baptaes long 1991 Distrik Asembli blong ‘Ol Man We Oli Laekem Fasin Fri’ mi bin jusum fultaem minista wok olsem mak long laef blong mi mo mi stap mekem haftaem paenia stat long taem ya.”

Swavome we i gat twantewan yia i stap kalabus long ol rabis speret mo fasin blong wosip long Setan, we naoia hem i lego olgeta taem hem i luksave se Baebol i agensem ol fasin ya. Hem i talem se, “Be Setan i gohed. Wan naet tep i singsing hem wan taem i no gat man i putum blong i plei, mo mi stap harem ol myusek blong Setan, nating se mi sakemaot finis ol samting long saed blong wosip blong Devel long haos. Mi bin prea long Jeova, mo hem i givhan long mi blong kam strong bakegen long saed blong speret. Wan dokta we papa blong mi i stap askem mi blong go luk hem i luksave se fasin mo bodi blong mi i stap kamgud. Hem i raetem long kad blong mi se: ‘Ol Wetnes blong Jeova oli finisim sik blong hem.’”

Blokem Ol Tingting Blong Wol

Long Saotwes blong Krusvetsa hem i taon blong Sroda Slaska. “Ol gudgudfala samting” oli stap kamaot klia long ples ya tu long smol taon ya we i gat 9,000 man i stap long hem. Long fo yia bifo, i gat wan sista blong yumi long saed blong speret i stap laef long ples ya. Be naoia, namba blong ol pablisa i kasem 47. Fastaem plante Wetnes oli bin stap long ol trap blong ol rabis speret, fasin blong tekem drag, mo ol rabis fasin. Oli harem se fasin blong olgeta i olsem from we long jyos i no gat ol samting long saed blong speret we i save givhan long olgeta be ol pasta oli daonem ol man nomo, oli no givhan long olgeta. Ol Wetnes oli rili givhan long man.

Ol yangfala long kongregesen oli yusum ples blong skul olsem prapa teritori blong olgeta blong prij long hem. Kasa we i gat 18 yia, i se: “Oltaem ol skul fren blong mi oli talem long mi se: ‘Yu stap westem yangfala taem blong yu.’ Be mi no stap kasem plante trabol, mo mi gat risen blong stap laef. Mi bin mekem sam Baebol stadi long skul mo mi no fogetem ol homwok no prapa stadi blong mi wan. Ol gel we oli talem se mi stap ‘westem yangfala taem blong mi’ naoia oli kam mama finis, oli stap harem nogud long ol trabol blong olgeta.”

Long skul ol man oli savegud ol buk mo magasin blong Watch Tower Sosaete. Eksampel, wan tija blong lanwis blong Polan i talem long ol studen blong hem blong oli folem fasin blong raeting we magasin ya Wekap! i stap yusum taem oli raetem store. Eva we i haftaem paenia i faenemaot se i gud blong yusum buklet ya School and Jehovah’s Witnesses. “Mi rili laekem buklet ya. Ol tija blong mi oli savegud buklet ya. Mi neva gat trabol taem mi askem tija blong mi mestem skul blong go long ol bigfala asembli.” Gudfala fasin blong ol yangfala ya i mekem hat blong Jeova i glad.​—Proveb 27:11.

Ol Man Long Kalabus Oli Jenis

Long is blong Sroda Slaska hem i taon blong Selse Opolski, ples ya i gat tu kalabus. Wan hem i kalabus we oli gad gud long hem blong ol man oli no save ronwe. Oltaem ol Wetnes oli stap go long tufala kalabus ya blong talem trutok long ol man we oli stap insaed, plante long olgeta ya tu oli stap kalabus long Bigfala Babilon, hemia ol gyaman skul blong wol.​—Revelesen 18:​1-5.

Ol Wetnes oli stadi Baebol wetem ol man wanwan insaed long kalabus mo ol smol grup blong ol man long kalabus, sam long olgeta oli baptaes finis. Nating se oli mas stap long kalabus go kasem taem we oli save aot long hem, oli stap talemaot gud nyus long ol narafala man insaed long kalabus. Wan man blong kalabus we i rere blong tekem baptaes i mekem bigfala jenis long laef blong hem nao ol man blong lukaot long kalabus oli letem hem i go long haos blong hem wan taem long evri wik. Ol narafala man blong kalabus oli stap raet long ol famle blong olgeta mo oli stap talemaot se taem bambae oli kamaot long kalabus, bambae oli no moa man blong brekem loa, be bambae oli kam ol Wetnes blong Jeova.

Wan bigman blong lukaot long ol kalabus i toktok smol se, ol pris blong Katolik we oli stap kam long kalabus oli no mekem wan samting nating. Hem i askem ol Wetnes se: “?Wanem samting i mekem yufala i naf blong jenisim mo mekem ol man ya oli gat gudfala fasin bakegen?” Wan leta we wan man long kalabus i raetem i go long famle blong hem i givim ansa, hem i se: “Long ples ya long kalabus, ol Wetnes blong Jeova oli stap tokbaot gudfala promes blong God long saed blong nyufala gavman, hemia Kingdom blong Jeova, we i no longtaem bambae hem i rulum wol. Long ples ya mi gat taem blong stap skelem laef blong mi bifo wetem Baebol. Naoia we mi kasem ol nogud frut from, mi mi wantem kam wan friman blong stap aninit long Kingdom blong God. Tede mi mi wan Wetnes blong Jeova, mi baptaes.”

Long narafala kalabus, plante man long kalabus ya oli mas stap 25 yia from we oli bin kilim man i ded. Twelef man oli stap stadi Baebol oltaem. Wan long olgeta i givim laef blong hem long Jeova finis mo i tekem baptaes, mo ol narafala oli stap tingting blong mekem olsem hem. Bos blong lukaot long kalabus i glad long gudfala frut we i kamaot taem ol Wetnes blong Jeova oli tijim ol man long kalabus, nao hem i se: “I no 12 man nomo oli stap long kalabus. Mi gat 600 man. Plis yufala i givhan long mi blong mekem laef blong olgeta i kamgud bakegen. Bambae mi givim olgeta samting we yufala i nidim, be plis yufala i mekemrere plan blong yufala. !Yufala i lukaotgud long olgeta!”

Nao ol brata oli mekem olsem. Oli mekem program blong Baebol we i tokbaot risen blong laef, hop long fyuja, mo from wanem i impoten blong finis long ol rabis fasin. Oli tokbaot ol ekspiryens blong wan man we i stap long kalabus bifo nao i kam wan Wetnes blong Jeova, biaen hem i kam wan elda long kongregesen. Mo tu ol Wetnes oli tokbaot laef blong wan stilman we hem i stilim ol sas ston, wan daemon mo wan man we i stap tekem drag i go long kantri long fasin haed nao biaen tufala i lanem trutok.a Twante man we oli stap long kalabus long taem ya oli luk se program ya i gud mo oli askem plante kwestin, mo sam long olgeta tu oli askem Baebol stadi.

Bilif Mo Fasin Stanap Strong Taem Oli Kasem Traem

Lubajof i wan smol taon we i gat 12,000 man long hem mo i stap kolosap long mak we i seraotem Ukren. Long 1988 wok blong prij long ples ya i gru kwiktaem, taem ol paenia oli kam blong givhan long ol 12 pablisa we oli stap long ples ya. Naoia i gat 72 pablisa blong Kingdom, mo 150 man oli kam long Memoriol long 1991 long nyufala Haos Kingdom we oli bildim.

Long Jun 1991, Pop Jon Pol 2 i visitim Lubajof. Be visit ya i no givim trufala bilif long ol man. Plante long olgeta oli no moa bilif strong mo oli gat kwestin long saed blong risen blong laef mo hop long fyuja. Taem oli no save faenem ol stret ansa long ol lida blong jyos, oli go luk ol Wetnes blong Jeova. Maet oli harem nogud fastaem from we oli tanem baksaed long skul blong olgeta, be trutok blong Baebol we oli stap lanem i givhan long olgeta blong luksave se oli mekem disisin we i stret.

Wan long olgeta hem i Onorata, hem i gat ol ekspiryens olsem, naoia hem i mekem fultaem paenia. Samwe long wan yia bifo, taem hem i stap talem sin blong hem long pris hem i askem hem se wanem nem blong God. Pris i ansa se, “God hem i lav​—hemia i nambawan nem blong hem.” Biaen hem i gohed blong talem long Onorata se: “Yu yu olsem wan baket blong klin wora we taem wan man i sakem wan kala i go insaed, yumi no save mekem wora ya i kam klin bakegen.” Nao hem i luksave tingting blong pris ya. Mo hem i se: “Long taem ya mi wantem kam wan Wetnes blong Jeova. Disisin ya tu yu no save jenisim.”

Kolosap evriwan we oli lanem trutok long Lubajof oli mas stanap strong, taem ol man oli agensem olgeta bigwan. Be samting ya i no slakem lav blong olgeta long trutok blong Baebol mo fasin blong olgeta blong stap long saed blong Jeova.

Elsbeta i talem se: “Fastaem papa mama blong mi oli stap kilim mi long haos. Biaen famle blong mi i kam insaed long Haos-Kingdom. . . . Oli tekem mi i go long haos mo oli stat ‘blong kilim mi blong stretem mi’ wetem wan stik we i gat ol huk long hem. Oli kilim mi mo oli kikim mi olbaot long bodi blong mi, from we mi stap joen wetem ol Wetnes. Oli kilim mi tumas mekem se mi mas go long haospetal kwiktaem. Jeova i givhan long mi, mo mi haremgud bakegen. Ol famle blong mi oli no laekem mi. Taem mi talem samting ya long pris, hem i talem nomo long mi se: “?Yu kam blong toktok smol from we oli slavem yu nomo?’”

Wan sista i talem se: “Evri yia mi stap go long Jenstekova mo wokbaot long ni blong mi mo mekem Saen blong Kros, mi ting se hemia i fasin we wan trufala man Katolik i mas mekem. Naoia mi gat ol mak yet long ol ni blong mi.” Taem hem i kasem 18 yia, hem i lanem trutok mo hem i talem long pris mo famle blong hem se hem i no moa save go long jyos. Oli kilim hem bigwan​—hem i talem se, “oli kilim mi bigwan mekem se bren blong mi i no wokgud. Be long haospetal mi kamgud kwiktaem nao mi save go long Distrik Asembli blong ‘Ol Man We Oli Laekem Fasin Fri.’ Mi mi krae from we mi glad blong luk trufala fasin joengud mo lav long medel blong ol man we oli no gat spesel kastom blong wosip​—samting we mi neva luk long Jens­tekova. Mi mi glad tumas we mi luksave gudfala fasin blong Jeova mo mi lanem blong trastem hem.” Jeova i stap mekem olgeta we oli slak oli kam strong bakegen mo hem i halpem olgeta we oli sakem baden blong olgeta i go long hem.​—Ol Sam 55:22.

Plante man we oli kalabus long Bigfala Babilon naoia oli stap harem tok ya se “yufala i kamaot long hem” long Katolik kantri ya mo i sem mak long narafala ples tu. Sipos hem i wil blong Jeova, ol man blong hem we oli no gat fasin fraet bambae oli gohed blong hivimap plante “gudgudfala samting” moa we oli stap long Polan. Tru ya, plante man bambae oli harem tok ya se: “‘!Yu kam!’ Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.”​—Revelesen 18:4; 22:17.

[Futnot]

[Mape pej 24]

(Lukluk niuspepa)

POLAN

Sztum

Poznan

Kruszwica

Warsaw

Środa Śląska

Częstochowa

Strzelce Opolskie

Lubaczów

[Tok Blong Pija Long Pej 26]

Wok blong talemaot mesej blong Kingdom long Krusvetsa, Polan