Fasin Tangkyu From Gudfala Presen Ya Laef

!LAEF​—wan sas samting! Sipos yumi no gat laef, yumi no save mekem samting. Taem laef i finis, i no gat wan man long wol we i save givimbak laef long yumi. Sipos yumi kasem trabol we i save spolem laef blong yumi, yumi mekem evri samting blong traem sevem laef ya. !Yes, sam man taem oli kasem trabol oli singaot long God blong halpem olgeta!

Yumi save tingbaot store long Baebol long saed blong wan sip we wan bigfala win i kasem hem. Taem kolosap sip i draon, “ol man long sip oli fraet mo oli singaot long ol god blong olgeta wanwan, blong oli halpem olgeta.” Biaen, olgeta evriwan oli singaot long trufala God se: “O Jeova, plis yu no letem mifala i lus.” Mo tu, store long Baebol i gohed olsem: “Oli stap sakem ol samting insaed long sip i go long solwora, blong mekem hem i no moa hevi.”​—Jona 1:​4-6, 14; lukluk Ol Wok 27:​18, 19.

Ol man long sip ya oli rere blong sakem ol samting blong olgeta we oli tinghae long olgeta blong sevem laef blong olgeta. Yumi save pem olting bakegen​—be yumi no save pem laef. From we God i mekem se yumi wantem lukaotgud long laef blong yumi, taswe yumi ronwe long trabol we i save spolem laef blong yumi. Yumi kakae, yumi werem klos, mo yumi lukaotgud long bodi blong yumi. Taem yumi sik, yumi go luk dokta from yumi wantem kamgud bakegen.

Be Man ya we i Givim laef long yumi hem i askem moa long yumi, hem i no wantem nomo we yumi folem tingting ya we hem i putum long yumi blong lukaotgud long laef blong yumi. Tru ya, laef i wan presen we yumi no save putum wan praes long hem, mo hem i kamaot long Man ya we i hae moa long ol narafala man long heven mo long wol. ?From we yumi rili gat tangkyu long Man ya we i Givim laef mo long presen ya laef, i stret we yumi tinghae long laef? ?Mo samting ya i minim tu se yumi tinghae long laef blong ol narafala?

Yumi no mas sapraes se Loa ya we Jeova God i givim long nesen blong Isrel i gat plante rul long hem blong protektem laef mo bodi blong ol narafala man. (Eksodas 21:29; Dutronome 22:8) Tede tu ol Kristin oli mas tingbaot blong protektem laef blong narafala. Eksampel, sipos yu gat pikinini long haos blong yu, ?yu yu stap livim ol samting olsem ol pin no bidbid no ol sap samting olsem naef i stap olbaot, blong pikinini i save pleplei wetem olgeta mo kasem kil from no solemdaon olgeta? ?Yu yu stap putum ol posen mo ol meresin oli stap antap we ol pikinini oli no save faenem olgeta? ?Sipos wora i kapsaed long floa, yu yu kwik blong waepem blong narafala man i no glis long hem? ?Yu yu stap fiksimap ol trabol long saed blong lektrik kwiktaem? ?Yu stap fiksimap trak blong yu blong i sefgud oltaem? ?Yu yu stap lukaotgud taem yu draevem trak? Sipos yu gat tangkyu from laef mo yu stap tinghae long hem, bambae yu yu lukaotgud long ol samting ya, mo long ol narafala samting olsem.

Be sore tumas, samfala oli no tinghae nating long laef blong olgeta. Eksampel, ?hu man tede i no save se fasin blong smok i stap spolem bodi? Be plante milyan man oli stap smok, nating se taem oli pulum smok ya we i gat posen long hem, evritaem i stap spolem bodi blong olgeta. Plante narafala oli yusum drag, mo plante narafala oli dring alkol bitim mak, ol samting ya oli stap spolem bodi blong olgeta. Bigfala sik ya AIDS i stap kilim plante man i ded long wol mo i no gat meresin blong hem. Be plante blong olgeta oli save blokem sik ya, sipos oli bin ronwe long rabis fasin long saed blong seks, oli no yusum drag, mo oli no tekem blad transfyusen. !Sore tumas, be hemia i soemaot se plante man oli no tinghae nating long laef!​—Rom 1:​26, 27; 2 Korin 7:1.

!Tingting i Save Jenis!

Ol man we oli tinghae long Bigfala Man we i Wokem olgeta, Jeova, oli gat gudfala risen blong tingbaot laef olsem wan sas samting. Laef hem i wan tabu presen long God. Ol man olsem oli rere blong jenisim sam fasin no tingting blong olgeta blong soemaot se oli tingbaot laef olsem wan presen we God nomo i givim. Tingbaot ekspiryens blong Kwaku, wan tija long Gana. Hem i man blong dring alkol oltaem, mo from samting ya hem i stap spolem laef blong hem nomo.

Kwaku i talem se: “Mi mi traehad blong fosem woman blong mi blong gat respek long mi, mo plante taem samting ya i mekem rao mo faet i kamaot, i hapen moa taem mi mi drong. From we mi mi stap dring alkol bitim mak, plante taem mi no moa gat mane, mo plante taem mi no givim mane long famle blong mi blong pem ol samting we oli nidim. I klia from wanem woman blong mi i stap kam kros tumas. Taem mi no moa gat mane (kolosap oltaem), mi mekem enikaen samting blong kasem mane blong pem alkol. Wan taem mi yusum ol mane we mi bin tekem long ol studen, mane ya mi mas yusum blong rejisterem nem blong olgeta blong oli mekem wan tes. Be mi mi go dring alkol wetem, mo tu mi pem ol dring long ol fren blong mi. Be i no longtaem ol frut blong fasin blong mi oli kamaot. Sipos hedmasta blong skul i no bin mekem wan samting, bambae mi lusum wok blong mi tu.

“Laef blong mi i nogud nomo. Mi mi stap sem, be i no longtaem mi no moa sem tu. Nao mi stat blong tingbaot blong kilim mi wan i ded from mi harem se mi mi nogud tumas. Be mi gohed blong dring alkol, mi no save blokem samting ya. Wan dei, mi stap dring long ba, mo mi joen long wan faet, nao wan man i stikim mi wetem naef, long nogud taem ya nao mi mi luksave se fasin blong mi blong laekem tumas alkol, wan dei bambae mi ded from.

“Long ol taem ya we i pas, wanwan taem ol Wetnes blong Jeova oli stap kam long haos blong mifala, oli traehad blong pulum mifala blong intres long Baebol. Woman blong mi mo mi tu oltaem mitufala i haed from we mitufala i no wantem toktok wetem olgeta. Be wan taem, mi sore long olgeta, ale mi lesin long olgeta. Kwiktaem nomo stadi long Baebol i mekem mi mi kasem save long gudfala hop blong laef foreva long nyufala wol blong God. Moa mi gohed blong stadi long Baebol wetem help blong ol Wetnes blong Jeova, moa fasin tangkyu blong mi i kam bigwan long Jeova we hem i Man blong Givim laef, mo tu long presen ya laef we Hem i givim long yumi. Mo tu mi glad blong lanem olsem wanem ol advaes blong Baebol i save givhan long laef blong man. Samting ya i pulum mi blong stretem laef blong mi. Hem i no isi, from oltaem mi mas blokem fasin blong dring alkol mo ol fren blong mi bifo. Be Jeova, Man blong Harem prea, hem i luk se mi mi gat strong tingting blong mekem olsem, nao hem i harem prea blong mi.a

“Nating we woman blong mi i no wan Wetnes blong Jeova yet, be hem i gat respek long mi mo long skul blong mi from bigfala jenis we hem i luk long laef blong mi mo long mared blong mitufala. Ol man we oli stap raonabaot long mitufala, oli no moa nidim blong blokem ol faet bitwin mi mo woman blong mi. Mi mi tinghae tumas long kwaet tingting we naoia mi mi haremgud long hem. Tru ya, fasin tangkyu long Jeova God we hem i Man blong Givim laef, mo fasin blong folem tingting blong hem se laef i tabu, mo fasin blong obei long ol loa blong hem long laef blong yumi, hemia nomo i nambawan rod blong laef.”

God i Wantem Givim Laef Blong Olwe

Ol Wetnes blong Jeova oli bin givhan long plante taosen man, olsem Kwaku, blong oli ‘kasem nyufala laef we God i wokem blong olgeta, we i stret wetem laef blong hem. Ol fasin blong nyufala laef ya oli stret, oli gud, oli tabu, from we oli kamaot long trutok nomo.’ (Efesas 4:24) Ol man ya oli lanem blong tinghae long laef blong olgeta naoia, mo tu long hop blong laef olwe long fyuja long paradaes long wol. Baebol i promes se long Paradaes ya we God bambae i mekem, bambae i no moa gat wan man long wol we i harem nogud from hanggri, from we “Jeova blong ol ami bambae i wokem wan bigfala kakae blong olgeta pipol . . . Bambae i gat ol kakae we i gat oel” long hem.”​—Aesea 25:6.

Nating we laef i wan nambawan presen naoia, be hem i sot nomo. !Yumi evriwan bambae yumi ded, mo ded i wan samting we i nogud tumas! I nogud we i nogud taem yu mas luk wan we yu laekem hem tumas i ded, i godaon long gref blong slip long ples ya we i no gat laef nating. Be aninit long Kingdom blong God, we Kraes i rul long hem, promes ya blong Jeova bambae i kamtru se: “Bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:4.

Long taem ya, presen ya blong laef bambae i go long ol man long nambawan fasin. Ol man we oli laef tru long laswan trabol blong wol ya bambae oli gat jans blong kasem laef fulwan. Mo long taem ya, Jeova God bambae i givimbak nambawan presen ya laef long ol man we oli stap slip long ded, taem hem i mekem olgeta oli laef bakegen. (Jon 5:​24, 28, 29) !Samting ya bambae i minim se olgeta we yumi laekem olgeta tumas wetem ol man blong God long taem bifo bambae oli laef bakegen!

?Ol samting ya oli rili tru? Yes, from we “i no gat wan samting we i strong tumas, nao God i no save mekem.”​—Luk 1:37; lukluk Job 42:2.

Antap moa, Jeova God hem wan i mekem wan samting blong mekem promes blong hem i strong moa. ?Hem i mekem wanem? Hem i givim nambawan Pikinini blong hem we i laekem hem tumas, Jisas Kraes, olsem wan ransom blong pemaot yumi long sin mo ded. Rom 8:32 i talem long yumi se: “God i no holemtaet stret Pikinini blong hem, i letem hem i ded blong sevem yumi evriwan. Hem i givim stret Pikinini blong hem finis, blong i sevem yumi. Bambae hem i no moa save holemtaet ol narafala samting blong hem, bambae i givim olgeta oli go nomo long yumi.” Baebol i talem se samting ya i minim tu se bambae hem i klinim wol ya long ol rabis fasin mo bambae hem i tekemaot olgeta kruked fasin, fasin blong brekem loa, mo raf fasin. (Aesea 11:9) Neva bambae i gat wan man bakegen we i no moa tinghae long laef.

Naoia tu, nating we yumi sinman yet, be yumi save haremgud long laef. ?Hu man we i no laekem blong harem gudfala smel blong kakae we i stap kuk, no harem freswin long wan hot dei, no lukluk wan bigfala hil, naes kala long skae taem san i stap godaon, wan naes reva we i stap ron sloslou, ol naes kala long ol flaoa, no harem gudfala myusek mo singsing blong ol pijin? Traem tingbaot. ?Olsem wanem sipos yumi save haremgud long ol samting olsem gogo i no save finis?

?Yu ting se i waes blong sakem jans blong kasem gudfala laef ya blong olwe from we yumi wantem haremgud blong smoltaem long ol krangke fasin blong laef naoia, we yumi tingbaot yumi nomo? (Lukluk Hibrus 11:25.) Baebol i givim waes advaes ya se “yufala i no moa letem ol rabis samting we tingting blong yufala i wantem, oli bos long yufala. Ol samting we God i wantem, oli mas bos long yufala.” (1 Pita 4:2) Mifala i leftemap tingting blong yu, yes, mifala i pulum yu blong mekem olsemia. Yu mas stadi Tok blong God, Baebol, mo yu mas mekem ol samting we yu lanem oli wok long laef blong yu. (Jon 13:17) !Olsem nao, bambae yu yu save frengud wetem Jeova, God ya we i fulap long gudfala fasin mo sore, we i save givim presen ya long yu, laef blong olwe!

[Futnot]

[Tok Blong Pija Long Pej 5]

?Ol fasin blong laef blong yu oli stap soemaot se yu yu tinghae long laef?

[Tok Blong Pija Long Pej 7]

!Nyufala wol blong God bambae i givim jans long yumi blong haremgud long laef blong olwe!