Ol Ples Long Promes Lan

Kakae Kakae Bred

LONG wan taem Jisas mo ol disaepol blong hem oli stap long wan haos, “oli no gat taem blong kakae” from se i gat plante man tumas i stap. (Mak 3:20) Wan narafala taem Jisas i go insaed long haos blong wan Farisi “blong kakae.” (Luk 14:1) ?Yu ting se hemia i wanem kaen kakae?

Ol man Isrel blong bifo oli tingbaot bred from we Hibru mo Grik tok ya “kakae” i min se “kakae bred.” Yumi kasem save from wanem oli tingting olsem from se oli mekem bred wetem wit no bale we i stampa kakae blong ol.

Plante man tede oli tingbaot ol man Hibru bifo olsem ol man blong lukaot sipsip mo ol disaepol blong Jisas olsem ol man blong kasem fis. Mo i tru se samfala oli mekem kaen wok ya be i no evriwan. Wit hem i bigfala samting long laef blong plante man long taem ya. Samting ya i tru long taem blong Aesak mo Jekob, sipos yumi skelem Jenesis 26:12; 27:37; mo 37:7. ?Mo from we garen i bigfala wok long Galili long taem blong Jisas sam long olgeta we i kam aposol oli bin man blong planem wit?

Maet samting ya i tru, from se oli planem wit long plante ples long Promes Lan, mo sam haf blong Baebol i soemaot samting ya. (Dutronome 8:​7-9; 1 Samuel 6:13) ?Wanem bakegen i joen wetem poen ya?

Afta we ren i foldaon long Oktoba mo Novemba i mekem graon i sofsof, ol man blong planem wit oli stat blong katem graon mo biaen oli planem sid. Ren we bambae i foldaon biaen i halpem ol wit blong gru mo biaen bakegen, long Epril mo Mei, hem i braon kala we i soem se hem i rere blong katem bifo we hot taem i stat. Ol man long ples ya oli savegud taem blong katem wit taswe yumi ridim long Baebol se oli yusum taem ya blong makemaot ol defren taem blong yia. (Jenesis 30:14; Jajes 15:1) ?Yu save talem long wanem taem blong yia oli tekem foto we i stap long lefsaed?a ?Mo wanem taem ya we ol disaepol blong Jisas oli brekem sam kakae blong kon?​—Matyu 12:1.

Taem blong karem wit i wan bigfala wok long ol man blong mekem garen. Ol man blong karem kakae oli katemaot ol han blong wit wetem wan huknaef mo oli fasem olgeta wan ples long ol hif, olsem we yu luk daon. Yes i tru, sam long ol han blong wit maet oli save mestem no maet oli folfoldaon long graon, from samting ya nao Rut i pikimap. (Rut 2:​2, 7, 23; Mak 4:​28, 29) Biaen oli tekem ol hif blong wit i go long floa blong seraotem ol sid, olsem long floa blong Arona. ?Wanem i hapen long ples ya? Baebol i tokbaot “kat blong klinim wit mo samting we ol buluk oli stap pulum.” (2 Samuel 24:​18-22; 1 Kronikel 21:23) Ol hif blong wit oli seraotem olgeta long wan flat ples blong ol ston no long graon we oli hivimap tugeta. Wan buluk no wan narafala anamol i save goraon mo goraon, blong purumbut long wit. Anamol ya i save pulum wan kat blong givhan blong seraotem ol sid blong wit long han blong hem.​—Aesea 41:15.

Ol sid oli rere nao blong sakem i go antap long win long wan savel no wan fok, olsem we yumi luk antap. (Matyu 3:12) Ol man blong mekem garen oli save mekem wok ya long sapa, taem wan win i blou long ol doti blong hem mo karem ol han blong wit i go long saed. Taem oli hivimap ol sid tugeta mo karemaot ol smosmol doti, i rere nao blong putum long stok​—no blong mekem impoten kakae ya, bred.​—Matyu 6:11.

Sipos yu yu wan woman blong haos we yu gat wok blong mekem bred, evri dei bambae yu yusum wan bol mo wan wud blong graenem ol sid blong mekem i kam flaoa, ating flaoa ya i no sofsof tumas. No maet yu save smasem blong gat “flaoa we i beswan,” olsem hemia we Sera i yusum blong mekem “gudfala bisket” blong trifala enjel we oli tekem bodi blong man no we ol man Isrel oli yusum blong givim i go long Jeova. (Jenesis 18:6; Eksodas 29:2; Levitikas 2:​1-5; Namba 28:12) Sera i meksemap flaoa blong wit wetem wora mo hem i tantanem flaoa ya wetem han blong hem gogo hem i rere blong mekem bred long hem.

Daon, yu save luk ol raon bol blong flaoa mo wan we i longfala, we i reregud blong kukum. Ol bigfala raon biskit olsem, oli save putum long ol ston no ol fraepan, olsem we woman ya i stap mekem. ?Samting ya i givhan long yu blong luksave olsem wanem Sera i mekem long ol enjel we oli kam visitim olgeta mo wanem we famle blong Lot i mekem samtaem biaen? Yumi ridim: “Tufala [enjel] i go wetem hem long haos blong hem. Nao Lot i talem long ol man blong hem blong oli kukum sam bred mo oli mekemrere wan gudfala kakae blong givim long tufala strenja ya. Mo taem ol kakae ya i dan, olgeta oli kakae.”​—Jenesis 19:3.

[Futnot]

[Foto Credit Line Blong Pija Long Pej 24]

Pictorial Archive (Near Eastern History) Est.

[Foto Credit Line Blong Pija Long Pej 24]

Pictorial Archive (Near Eastern History) Est.

[Foto Credit Line Blong Pija Long Pej 25]

Pictorial Archive (Near Eastern History) Est.

[Foto Credit Line Blong Pija Long Pej 25]

Garo Nalbandian